સેન્સેક્સ ૩૦૦ પોઈન્ટ ઉછળીને ફરી નીચે આવ્યો, આઈટી શેરોમાં વેચવાલીનું દબાણ

ક્રૂડ ઓઈલ સસ્તું થતા એશિયન બજારો મજબૂત, પણ ભારતીય બજારમાં કેમ છે સુસ્તી?

ભારતીય શેરબજાર માટે આજનો દિવસ ઉતાર-ચઢાવ વાળો રહ્યો છે. ઈઝરાયેલ-ઈરાન યુદ્ધના તણાવ વચ્ચે આંતરરાષ્ટ્રીય સ્તરે ક્રૂડ ઓઈલના ભાવમાં થયેલી નરમાઈથી શેરબજારની શરૂઆત સકારાત્મક થઈ હતી. સેન્સેક્સ ૩૨૩ પોઈન્ટ વધીને ૭૫,૮૨૫ પર ખુલ્યો હતો, જ્યારે નિફ્ટી ૮૫ પોઈન્ટના સુધારા સાથે ૨૩,૪૯૩ પર ટ્રેડિંગ શરૂ કર્યું હતું. જોકે, ટૂંકા ગાળામાં જ આઈટી સેક્ટર અને ટાટા ગ્રુપના શેરોમાં વેચવાલીનું દબાણ આવતા બજાર તેની શરૂઆતની તેજી ટકાવી શક્યું નથી.

એશિયન બજારોમાં મજબૂતીનો ટ્રેન્ડ

ક્રૂડ ઓઈલના ભાવમાં ઘટાડો થવાને કારણે વૈશ્વિક બજારોમાં રાહત જોવા મળી છે. સોમવારે યુએસ માર્કેટ ૧% વધીને બંધ થયા બાદ આજે એશિયન બજારોમાં પણ ગ્રીન સિગ્નલ જોવા મળ્યા છે:

• તાઈવાન માર્કેટ: ૫૦૦ પોઈન્ટનો ઉછાળો

• હોંગકોંગ (હેંગસેંગ): ૨૪૫ પોઈન્ટની તેજી

• જાપાન (નિક્કેઈ): ૧૨૨ પોઈન્ટનો સુધારો

• કોરિયા અને સિંગાપોર: પણ સકારાત્મક ઝોનમાં ટ્રેડ કરી રહ્યા છે.

રિલાયન્સ જિયોનો IPO: ભારતનો સૌથી મોટો પબ્લિક ઇશ્યૂ?

આજના ટ્રેડિંગ સત્રમાં સૌથી મોટા સમાચાર રિલાયન્સ ઇન્ડસ્ટ્રીઝ તરફથી આવ્યા છે. મુકેશ અંબાણીએ પોતાની ટેલિકોમ શાખા ‘જિયો પ્લેટફોર્મ્સ’ ને સ્ટોક એક્સચેન્જ પર લિસ્ટ કરવાની કવાયત શરૂ કરી દીધી છે. અહેવાલો મુજબ, કંપની હાલમાં ૬ મોટી ઇન્વેસ્ટમેન્ટ બેંકો સાથે આ સંભવિત IPO માટે મંત્રણા કરી રહી છે.

છેલ્લા ૨૦ વર્ષમાં રિલાયન્સ ગ્રુપની કોઈ મોટી કંપનીનો આ પહેલો લિસ્ટિંગ પ્રયાસ હશે. બજારના વિશ્લેષકો માને છે કે જો જિયોનો IPO બજારમાં આવશે, તો તે ભારતીય શેરબજારના ઇતિહાસનો સૌથી મોટો IPO સાબિત થઈ શકે છે, જે LIC અને હ્યુન્ડાઈ જેવી કંપનીઓના રેકોર્ડ તોડી શકે છે.

મધ્યસ્થ બેંકોની ધિરાણનીતિ પર બજારની નજર

આ સપ્તાહ શેરબજાર માટે અત્યંત મહત્વનું છે કારણ કે વિશ્વની ૫ મુખ્ય મધ્યસ્થ બેંકો તેમની ધિરાણનીતિ જાહેર કરવાની છે. ઓસ્ટ્રેલિયાની રિઝર્વ બેંક આજે જ વ્યાજ દરો અંગે નિર્ણય લેશે, જેમાં ૪.૧% સુધી વધારાની શક્યતા છે. આ ઉપરાંત, યુએસ ફેડરલ રિઝર્વ, યુરોપિયન સેન્ટ્રલ બેંક, બેંક ઓફ ઇંગ્લેન્ડ અને બેંક ઓફ જાપાનની નીતિઓ બજારની દિશા નક્કી કરશે.

ભારતીય બજાર અત્યારે ‘વેઇટ એન્ડ વોચ’ ની સ્થિતિમાં છે. એકબાજુ જિયોના IPO ના સમાચાર તેજીનો માહોલ બનાવી રહ્યા છે, તો બીજીબાજુ વૈશ્વિક વ્યાજ દરો અને યુદ્ધની સ્થિતિ રોકાણકારોને સાવધ કરી રહી છે. ટૂંકા ગાળાના રોકાણકારોએ અત્યારે આઈટી અને ફાઈનાન્શિયલ સ્ટોક્સમાં વોલેટિલિટી માટે તૈયાર રહેવું જોઈએ.