ઈવી બજારમાં મોટો ધડાકો: JBM ઓટોમાં ₹2,850 કરોડનું વિરાટ રોકાણ કરી શકે છે બેન કેપિટલ
ભારતીય ઈલેક્ટ્રિક વ્હીકલ (EV) ક્ષેત્રમાં એક મોટો ધમાકો થવા જઈ રહ્યો છે. વૈશ્વિક સ્તરે જાણીતી અમેરિકન ઈન્વેસ્ટમેન્ટ કંપની બેન કેપિટલ (Bain Capital) ભારતના ઈવી માર્કેટમાં એક મોટો દાવ ખેલવાની તૈયારી કરી રહી છે. પ્રાપ્ત અહેવાલો મુજબ, બેન કેપિટલ અને JBM ઓટોના ઈલેક્ટ્રિક વ્હીકલ બિઝનેસ વચ્ચે આશરે 300 મિલિયન ડૉલર (લગભગ ₹2,850 કરોડ) સુધીના રોકાણ માટે ગંભીર વાટાઘાટો ચાલી રહી છે. આંગીન રોકાણના બદલામાં બેન કેપિટલને JBM ની EV યુનિટમાં મોટી માઈનોરિટી (લઘુમતી) ભાગીદારી મળી શકે છે.
ડીલનું માળખું અને ભવિષ્યની યોજનાઓ
આ મામલા સાથે જોડાયેલા સૂત્રોના જણાવ્યા અનુસાર, હાલમાં બેન કેપિટલ અને JBM ઓટો વચ્ચે વાટાઘાટોનો તબક્કો ચાલી રહ્યો છે. આ ચર્ચામાં રોકાણની કુલ રકમ, હિસ્સેદારીની ટકાવારી અને ડીલના આખા માળખાને આખરી ઓપ આપવામાં આવી રહ્યો છે. બેન કેપિટલ આ કારોબારમાં જોઈન્ટ કન્ટ્રોલ (સંયુક્ત નિયંત્રણ) લેવાના વિકલ્પ પર પણ ગંભીરતાથી વિચાર કરી રહી છે.
જો આ ડીલ સફળ થાય છે તો JBM ઓટોને પોતાના ઈલેક્ટ્રિક વ્હીકલ બિઝનેસને ઝડપથી વિસ્તારવા માટે એક મોટું ભંડોળ મળી જશે. અત્રે ઉલ્લેખનીય છે કે JBM ઓટો પહેલા મુખ્યત્વે ઓટો પાર્ટ્સ બનાવવાના બિઝનેસ સાથે જોડાયેલી હતી, પરંતુ છેલ્લા કેટલાક સમયથી કંપનીનો પૂરો ફોકસ ઈલેક્ટ્રિક અને ક્લીન મોબિલિટી સેક્ટર પર શિફ્ટ થયો છે.
ઈલેક્ટ્રિક બસ માર્કેટમાં JBM નો એકહથ્થુ દબદબો
JBM ઓટો ભારતની ઈલેક્ટ્રિક બસ બનાવતી અગ્રણી કંપનીઓમાંની એક છે. કંપનીના પોતાના દાવા મુજબ, ઈલેક્ટ્રિક ટારમેક બસ સેગમેન્ટમાં તેનો દબદબો છે અને તે આશરે 79% જેટલી માર્કેટ હિસ્સેદારી ધરાવે છે. આ સિવાય ઈન્ટરસિટી ઈલેક્ટ્રિક લક્ઝરી કોચ સેગમેન્ટમાં પણ કંપનીનો હિસ્સો 50% થી વધુ છે.
કંપનીએ દિલ્હી-NCR માં ચીન બહાર દુનિયાની સૌથી મોટી ઈન્ટીગ્રેટેડ ઈલેક્ટ્રિક બસ ફેક્ટરીઓમાંથી એક સ્થાપિત કરી છે. અધિકૃત આંકડાઓ અનુસાર, 2026 ની પ્રથમ છમાસિક ગાળામાં JBM ગ્રુપની 804 ઈલેક્ટ્રિક બસો રજિસ્ટર થઈ હતી. JBM ઓટો માટે EV કારોબાર હવે સૌથી ઝડપથી ગ્રોથ આપનારો બિઝનેસ બની ગયો છે. કંપનીને વર્તમાન નાણાકીય વર્ષમાં ₹7,000 થી ₹7,500 કરોડનું કુલ રેવેન્યુ મળવાની આશા છે, જેમાં ઈવી બિઝનેસનો હિસ્સો આશરે 45% રહેવાનો અંદાજ લગાવવામાં આવ્યો છે.
EV કારોબારથી સતત વધી રહી છે આવક
નાણાકીય વર્ષ 2026 માં JBM ના EV કારોબારમાંથી મળતું રેવેન્યુ 16% વધીને ₹2,307 કરોડ પહોંચી ગયું હતું, જે કંપનીના કુલ વેચાણના આશરે 38% જેટલું હતું. માત્ર માર્ચ ત્રિમાસિક ગાળાની વાત કરીએ તો, EV કારોબારનું રેવેન્યુ વાર્ષિક ધોરણે 11.4% વધીને ₹831 કરોડ નોંધાયું હતું. આ સમયગાળા દરમિયાન આ સેગમેન્ટનો નફો 44.5% ના જબરદસ્ત ઉછાળા સાથે ₹106 કરોડ સુધી પહોંચી ગયો હતો.
કંપની પાસે આગામી અઢી વર્ષમાં 9,000 થી વધુ ઈલેક્ટ્રિક બસોની ડિલિવરી આપવાનો મજબૂત ઓર્ડર બુક છે. આ આંકડાઓ પરથી સ્પષ્ટ થાય છે કે આવનારા સમયમાં EV કારોબાર જ JBM ની ભવિષ્યની ગ્રોથનો મુખ્ય આધાર બનશે.
JBM નું સંપૂર્ણ EV ઈકોસિસ્ટમ
JBM ઓટો માત્ર ઈલેક્ટ્રિક બસો બનાવવા સુધી મર્યાદિત નથી, પરંતુ તેણે એક આખું ઈકોસિસ્ટમ તૈયાર કર્યું છે. કંપની બેટરી સિસ્ટમ, ઈલેક્ટ્રોનિક્સ, ડિજિટલ ફ્લીટ સોલ્યુશન અને EV ચાર્જિંગ ઈન્ફ્રાસ્ટ્રક્ચર જેવા અનેક ક્ષેત્રોમાં સક્રિયપણે કામ કરી રહી છે.
બસ મેન્યુફેક્ચરિંગ: કંપનીનો ઈલેક્ટ્રિક બસ બનાવવાનો કારોબાર ‘JBM ઈલેક્ટ્રિક વ્હીકલ’ હેઠળ ચાલે છે, જેની વાર્ષિક ઉત્પાદન ક્ષમતા 20,000 બસોની છે. આ યુનિટમાં JBM ઓટો 85% હિસ્સેદારી ધરાવે છે.
બેટરી અને કમ્પોનન્ટ: કંપનીનો બેટરી અને અન્ય કમ્પોનન્ટનો બિઝનેસ ‘JBM ગ્રીન એનર્જી’ દ્વારા સંચાલિત થાય છે. કંપનીની બેટરી મેન્યુફેક્ચરિંગ ક્ષમતા વધીને વાર્ષિક 6 GWh થઈ ગઈ છે. આ બેટરીઓનો ઉપયોગ ઈલેક્ટ્રિક બસો ઉપરાંત ઈલેક્ટ્રિક ટુ-વ્હીલર, થ્રી-વ્હીલર, LCV (હળવા કોમર્શિયલ વાહનો) અને એનર્જી સ્ટોરેજ સિસ્ટમમાં પણ કરી શકાય છે.
વિદેશી બજારોમાં પણ ઝડપી વિસ્તાર
JBM ઓટો માત્ર ભારતીય બજાર સુધી સીમિત ન રહેતા વૈશ્વિક સ્તરે પણ પગપેસારો કરી રહી છે. કંપની યુરોપ, અખાતના દેશો (ગલ્ફ દેશો), આફ્રિકા, સિંગાપોર અને એશિયા-પેસિફિક બજારોમાં ઝડપથી પોતાનો વિસ્તાર કરી રહી છે. યુરોપિયન માર્કેટ માટે કંપનીએ જર્મનીના ફ્રેન્કફર્ટમાં પોતાનું મુખ્યાલય સ્થાપિત કર્યું છે અને ત્યાંના સ્થાનિક નિયમો અનુસાર લેફ્ટ-હેન્ડ ડ્રાઈવ ઈલેક્ટ્રિક બસો તૈયાર કરી છે.
આ ઉપરાંત, બેટરી એનાલિટિક્સ અને ફ્લીટ મેનેજમેન્ટને વધુ સક્ષમ બનાવવા માટે JBM એ ‘Hitachi ZeroCarbon’ જેવી વૈશ્વિક ઈન્ટરનેશનલ કંપનીઓ સાથે હાથ મિલાવ્યા છે. આ ભાગીદારીથી બેટરીનું વધુ સારું મોનિટરિંગ, સમયસર મેન્ટેનન્સ અને બસોનો વધુ કાર્યક્ષમ ઉપયોગ શક્ય બનશે. બેન કેપિટલ સાથેની આ સંભવિત ડીલ JBM ને વૈશ્વિક સ્તરે વધુ ઊંચાઈ પર લઈ જવામાં મદદરૂપ સાબિત થઈ શકે છે.
