અમેરિકાની સૌથી મોટી તપાસ એજન્સી, ફેડરલ બ્યુરો ઓફ ઇન્વેસ્ટિગેશન (FBI) ને એક નવો ડિરેક્ટર મળ્યો છે. ભારતીય મૂળના કાશ પટેલને FBIની જવાબદારી સોંપવામાં આવી છે. રાષ્ટ્રપતિ ડોનાલ્ડ ટ્રમ્પે ભારતીય મૂળના કાશ પટેલને FBIના નવમા ડિરેક્ટર તરીકે નિયુક્ત કરવા માટેના કમિશન પર સત્તાવાર રીતે હસ્તાક્ષર કર્યા. યુએસ સેનેટમાં મતદાન બાદ કાશ પટેલને FBI ડિરેક્ટર તરીકે પુષ્ટિ આપવામાં આવી. ભારતીય મૂળના કાશ પટેલને તેમના પક્ષમાં ૫૧ અને વિરુદ્ધ ૪૯ મત મળ્યા. બે રિપબ્લિકન સાંસદોએ પણ તેમની વિરુદ્ધ મતદાન કર્યું.
એફબીઆઈના ડિરેક્ટર તરીકે નિયુક્ત થયા પછી, કાશ પટેલે રાષ્ટ્રપતિ ડોનાલ્ડ ટ્રમ્પના રાજકીય દુશ્મનોની તપાસ કરવાનું વચન આપ્યું હતું. તેમણે એમ પણ કહ્યું કે તેઓ FBI ને એક પારદર્શક, જવાબદાર અને ન્યાય પ્રત્યે પ્રતિબદ્ધ એજન્સી બનાવશે. “જેઓ અમેરિકનોનું નુકસાન ઈચ્છે છે – તેમને અમારી તરફથી આ ચેતવણી ગણો. અમે તમને દુનિયાના દરેક ખૂણામાં શોધી કાઢીશું. મિશન ફર્સ્ટ, અમેરિકા હંમેશા. ચાલો કામ પર લાગીએ,” પટેલે સોશિયલ મીડિયા પ્લેટફોર્મ X પર લખ્યું.
કાશ પટેલ કેટલા શિક્ષિત છે?
કશ્યપ પ્રમોદ વિનોદ પટેલ ઉર્ફે કાશ પટેલનો જન્મ 25 ફેબ્રુઆરી, 1980 ના રોજ ન્યુ યોર્કના ગાર્ડન સિટીમાં ગુજરાતી માતાપિતાને ત્યાં થયો હતો. તેમના માતા-પિતા ૧૯૭૦ના દાયકામાં યુગાન્ડાથી કેનેડા આવ્યા હતા અને પછી યુનાઇટેડ સ્ટેટ્સમાં સ્થાયી થયા હતા. કાશ પટેલે પોતાનું પ્રારંભિક શિક્ષણ લોંગ આઇલેન્ડની ગાર્ડન સિટી હાઇ સ્કૂલમાંથી મેળવ્યું. અહીંથી તેમણે પોતાનું શાળાકીય શિક્ષણ પૂર્ણ કર્યું અને પછી તેમણે ગ્રેજ્યુએશન માટે રિચમંડ યુનિવર્સિટીમાં પ્રવેશ મેળવ્યો. તેમણે 2002 માં આ યુનિવર્સિટીમાંથી ઇતિહાસ અને ફોજદારી ન્યાયમાં બી.એ. કર્યું.
સ્નાતક થયા પછી, કાશ પટેલે વકીલ બનવાનું નક્કી કર્યું અને ન્યૂ યોર્કની પેસ યુનિવર્સિટી સ્કૂલ ઓફ લોમાં પ્રવેશ મેળવ્યો. અહીંથી તેમણે 2005માં જ્યુરિસ ડોક્ટર (JD) કર્યું અને વકીલ બન્યા. તેમણે 2004 માં યુનિવર્સિટી કોલેજ લંડન, યુકેમાંથી આંતરરાષ્ટ્રીય કાયદામાં પ્રમાણપત્ર પણ મેળવ્યું. ત્યારબાદ કાશ પટેલે વકીલ તરીકે પોતાની કારકિર્દી શરૂ કરી. જાહેર બચાવકર્તા તરીકે, તેમણે હત્યાથી લઈને ડ્રગ્સની હેરફેર સુધીના ઘણા હાઇ-પ્રોફાઇલ કેસ લડ્યા.
