ઈમરાન ખાનના સમર્થનમાં ૧૪ દિગ્ગજો મેદાને: ગાવસ્કર-કપિલનો પાક. સરકારને પત્ર

ઈમરાન ખાનના સમર્થનમાં વિશ્વના ૧૪ દિગ્ગજ સુકાનીઓ મેદાને: ગાવસ્કર-કપિલ સહિતના સ્ટાર્સે પાક. સરકારને લખ્યો પત્ર

પાકિસ્તાનના પૂર્વ વડાપ્રધાન અને વિશ્વવિજેતા ક્રિકેટ કેપ્ટન ઈમરાન ખાન હાલ જેલની સજા કાપી રહ્યા છે, ત્યારે તેમના સ્વાસ્થ્ય અને જેલની સ્થિતિને લઈને આંતરરાષ્ટ્રીય સ્તરે ચિંતા વ્યક્ત કરવામાં આવી છે. ક્રિકેટ જગતના ૧૪ મહારથીઓ, જેમાં ભારતના સુનીલ ગાવસ્કર અને કપિલ દેવ જેવા દિગ્ગજો સામેલ છે, તેમણે પાકિસ્તાન સરકારને એક પત્ર લખીને ઈમરાન ખાન સાથે માનવીય અને ન્યાયી વ્યવહાર કરવાની અપીલ કરી છે.

ક્રિકેટ જગતના દિગ્ગજોની ન્યાય માટે અપીલ

તાજેતરમાં મીડિયા અહેવાલોમાં દાવો કરવામાં આવ્યો હતો કે જેલમાં બંધ ઈમરાન ખાનની આંખોની રોશની સતત ઘટી રહી છે અને તેમનું સ્વાસ્થ્ય બગડી રહ્યું છે. આ અહેવાલો બાદ ૧૭ ફેબ્રુઆરીના રોજ વિશ્વના વિવિધ દેશોના ૧૪ ભૂતપૂર્વ કેપ્ટનોએ એક સંયુક્ત નિવેદન જારી કર્યું હતું. આ પત્રમાં સુનીલ ગાવસ્કર, કપિલ દેવ, એલન બોર્ડર, ક્લાઈવ લોયડ અને સ્ટીવ વૉ જેવા દિગ્ગજોએ હસ્તાક્ષર કર્યા છે.

પત્રમાં જણાવાયું છે કે, “અમે અમારા રાષ્ટ્રીય ક્રિકેટ ટીમોના પૂર્વ સુકાનીઓ તરીકે, ઈમરાન ખાન સાથે જેલમાં થઈ રહેલા કથિત વ્યવહાર અને ત્યાંની સ્થિતિ અંગે ઊંડી ચિંતા વ્યક્ત કરીએ છીએ. ઈમરાન ખાન માત્ર પાકિસ્તાનના જ નહીં, પણ વિશ્વ ક્રિકેટના લેજન્ડ છે અને રમત પ્રત્યેનું તેમનું યોગદાન અમૂલ્ય છે.”

ઈમરાન ખાન: એક રમતવીર અને નેતા

દિગ્ગજોએ તેમના પત્રમાં ૧૯૯૨ના વર્લ્ડ કપ વિજયને યાદ કરતા લખ્યું હતું કે, ઈમરાન ખાને કૌશલ્ય, હિંમત અને નેતૃત્વના જોરે પાકિસ્તાનને ઐતિહાસિક વિજય અપાવ્યો હતો, જે પેઢીઓ માટે પ્રેરણારૂપ છે. તેમણે વધુમાં ઉમેર્યું કે, “અમારામાંથી ઘણા તેમની સામે રમ્યા છે અને તેમની સાથે મેદાન શેર કર્યું છે. અમે તેમની રમત પ્રત્યેની સ્પર્ધાત્મક ભાવનાના પ્રશંસક રહ્યા છીએ.”

ક્રિકેટ સિવાય, ઈમરાન ખાને પાકિસ્તાનના વડાપ્રધાન તરીકે દેશનું નેતૃત્વ કર્યું છે. પત્રમાં ભારપૂર્વક કહેવામાં આવ્યું છે કે લોકશાહી રીતે ચૂંટાયેલા પૂર્વ વડાપ્રધાન અને ગ્લોબલ સ્પોર્ટિંગ આઈકોન તરીકે તેઓ ગરિમાપૂર્ણ વ્યવહારના હકદાર છે.

સ્વાસ્થ્ય અંગે ગંભીર ચિંતા

જેલમાં ઈમરાન ખાનની બગડતી તબિયત, ખાસ કરીને તેમની આંખોની નબળી પડતી જતી દ્રષ્ટિ અંગે ખેલાડીઓએ પાકિસ્તાન સરકારને વિનંતી કરી છે કે તેમને તાત્કાલિક યોગ્ય તબીબી સુવિધાઓ અને માનવીય વાતાવરણ પૂરું પાડવામાં આવે. “અમે ફેયર પ્લે (નિષ્પક્ષ રમત) અને સન્માનના મૂલ્યોને સમજીએ છીએ, અને ઈમરાન ખાન જેવા વ્યક્તિત્વ સાથે પણ આવો જ ન્યાય થવો જોઈએ,” તેમ પત્રના અંતે જણાવાયું હતું.

આ પત્ર પર હસ્તાક્ષર કરનારાઓમાં માઈકલ આથર્ટન, ગ્રેગ ચેપલ, ઈયાન ચેપલ, બેલિન્ડા ક્લાર્ક, ડેવિડ ગોવર, નાસિર હુસેન અને જોન રાઈટ જેવા મોટા નામો સામેલ છે. હવે જોવાનું એ રહેશે કે પાકિસ્તાન સરકાર આ આંતરરાષ્ટ્રીય દબાણ અને ખેલ જગતના માંધાતાઓની અપીલ પર કેવો પ્રતિસાદ આપે છે.