વરુણ ચક્રવર્તીએ ભૂલ કરી…: મિસ્ટ્રી સ્પિનરની કઈ વાતથી પૂર્વ ભારતીય ક્રિકેટર દુઃખી છે?
T20 વર્લ્ડ કપ 2026 પૂરો થયા બાદ હવે ભારતીય ખેલાડીઓના પ્રદર્શનનું વિશ્લેષણ કરવામાં આવી રહ્યું છે. આ ટૂર્નામેન્ટમાં ભારત તરફથી વરુણ ચક્રવર્તીએ વિકેટો તો ઝડપી, પરંતુ તે રન રોકવામાં સાવ નિષ્ફળ સાબિત થયો હતો. વરુણની આ બોલિંગ શૈલીને લઈને હવે પૂર્વ ભારતીય લેગ સ્પિનર અમિત મિશ્રાએ મોટી પ્રતિક્રિયા આપી છે. મિશ્રાના મતે વરુણે વર્લ્ડ કપ દરમિયાન ખોટી ટેકનિકનો ઉપયોગ કર્યો હતો, જે તેને ભારે પડી ગયો.
અમિત મિશ્રાનું તીખું વિશ્લેષણ: ‘વધુ પડતી ઝડપ બની અવરોધ’
પૂર્વ ક્રિકેટર અમિત મિશ્રાએ વરુણની બોલિંગ પર વાત કરતા જણાવ્યું હતું કે, વરુણે વર્લ્ડ કપમાં દબાણ હેઠળ આવીને પોતાની કુદરતી શૈલી ગુમાવી દીધી હતી. મિશ્રાએ કહ્યું, “વરુણે જરૂરિયાત કરતા વધુ ઝડપી બોલિંગ કરવાનું શરૂ કરી દીધું હતું, જેના કારણે તેની મુખ્ય તાકાત છુપાઈ ગઈ. ગત આઈપીએલમાં તે ધીમો બોલ, ટોપ સ્પિન, ગુગલી અને લેગ સ્પિનનો સચોટ ઉપયોગ કરતો હતો. પરંતુ વર્લ્ડ કપમાં જ્યારે બેટ્સમેનો રન બનાવી રહ્યા હતા, ત્યારે તે દબાણમાં આવી ગયો અને આ વિવિધતા બતાવી શક્યો નહીં.”
મિશ્રાએ વધુમાં ઉમેર્યું કે, “જ્યારે પિચ પરથી મદદ મળી રહી હોય, ત્યારે તમારે વિકેટ લેવા માટે બહુ વધારે પ્રયાસો ન કરવા જોઈએ, માત્ર સાદી બોલિંગ પર ધ્યાન આપવું જોઈએ. વરુણને એ સમયે કોઈએ સમજાવવાની જરૂર હતી કે તેણે પોતાની મૂળ તાકાત પર ટકી રહેવું જોઈએ.”
T20 વર્લ્ડ કપ 2026 માં વરુણનું પ્રદર્શન
આંકડાકીય રીતે જોઈએ તો વરુણ ચક્રવર્તીનું પ્રદર્શન મિશ્ર રહ્યું હતું. તેણે 9 મેચમાં 14 વિકેટ ઝડપી હતી અને તે જસપ્રીત બુમરાહ સાથે સંયુક્ત રીતે ભારત માટે સૌથી વધુ વિકેટ લેનાર બોલર રહ્યો હતો. જોકે, મુખ્ય સમસ્યા તેનો ઈકોનોમી રેટ હતો. વરુણે સમગ્ર ટૂર્નામેન્ટ દરમિયાન 9.25 ની મોંઘી ઈકોનોમી સાથે રન આપ્યા હતા, જે સામાન્ય રીતે ટી-20 ફોર્મેટમાં સ્પિનર માટે યોગ્ય માનવામાં આવતું નથી.
સેમીફાઈનલમાં ઈંગ્લેન્ડ સામેની ધોલાઈ
વરુણ માટે સૌથી ખરાબ દિવસ ઈંગ્લેન્ડ સામેની સેમીફાઈનલ મેચનો રહ્યો હતો. આ મહત્વની મેચમાં અંગ્રેજ બેટ્સમેનોએ વરુણની બોલિંગની રીતસરની ધોલાઈ કરી હતી. તેણે પોતાની 4 ઓવરના સ્પેલમાં 16 ની ઈકોનોમી રેટ સાથે 64 રન લુટાવ્યા હતા. આટલા બધા રન ખર્ચવાને કારણે ભારત પર દબાણ વધ્યું હતું. અમિત મિશ્રાના મતે જો વરુણે પોતાની ટેકનિકમાં ફેરફાર ન કર્યો હોત, તો કદાચ પરિણામ કંઈક અલગ હોત.
