રાધાકિશન દામાણીની કંપનીની મુશ્કેલી વધી? ક્વિક કોમર્સની એન્ટ્રીથી ડીમાર્ટના માર્જિન પર ખતરો
ડીમાર્ટ (DMart) ના નામે જાણીતી કંપની, એવન્યુ સુપરમાર્ટ્સના શેર સોમવારે બીએસઈ (BSE) પર ૪.૨ ટકા તૂટીને ૪,૩૯૫ રૂપિયાના સ્તરે પહોંચ્યા હતા. કંપનીએ શનિવારે તેના ચોથા ક્વાર્ટર (Q4FY26) ના પરિણામો જાહેર કર્યા હતા, જેમાં ૧૯ ટકાના વધારા સાથે ૬૫૬.૫૯ કરોડ રૂપિયાનો ચોખ્ખો નફો નોંધાયો છે. કંપનીની આવક પણ ૧૯ ટકા વધીને ૧૭,૬૮૩.૮૬ કરોડ રૂપિયા રહી છે. પીએલ કેપિટલ અને એચડીએફસી સિક્યોરિટીઝે આ શેર પર પોતાના રેટિંગ અને ટાર્ગેટ પ્રાઈસ જાહેર કર્યા છે.
ગ્રાહકોની માંગમાં તેજી અને સ્ટોરનું વિસ્તરણ
એચડીએફસી સિક્યોરિટીઝના જણાવ્યા અનુસાર, ડીમાર્ટે ચોથા ક્વાર્ટરમાં ૧૯% વાર્ષિક મહેસૂલ વૃદ્ધિ નોંધાવી છે, જે વધીને ૧૭૨ અબજ રૂપિયા થઈ ગઈ છે. આ વૃદ્ધિ પાછળનું મુખ્ય કારણ ‘સેમ સ્ટોર સેલ્સ ગ્રોથ’ (SSSG) માં આવેલી તેજી છે, જે ગત વર્ષના ૮.૧% થી વધીને ૧૦.૮% થઈ ગઈ છે. મેનેજમેન્ટના જણાવ્યા મુજબ, ભૌગોલિક રાજકીય તણાવને કારણે માર્ચ-૨૬માં ગ્રાહકોની માંગમાં કામચલાઉ વધારો જોવા મળ્યો હતો, જોકે મહિનાના અંત સુધીમાં સ્થિતિ સામાન્ય થઈ ગઈ હતી.
વિસ્તરણની બાબતમાં કંપનીએ આક્રમક અભિગમ અપનાવ્યો છે:
-
ચોથા ક્વાર્ટરમાં ૫૮ નવા સ્ટોર ખોલવામાં આવ્યા છે.
-
નાણાકીય વર્ષ ૨૦૨૫માં આખા વર્ષ દરમિયાન ૫૦ સ્ટોર ખોલવામાં આવ્યા હતા.
-
હવે કંપનીના કુલ સ્ટોર્સની સંખ્યા ૫૦૦ પર પહોંચી ગઈ છે.
ઓપરેટિંગ પરફોર્મન્સ અને સેલ્સ ડેન્સિટી
બ્રોકરેજ ફર્મના મતે, સેલ્સ ડેન્સિટીમાં વાર્ષિક ધોરણે ૩ ટકાનો વધારો થયો છે. ઓપરેટિંગ પ્રોફિટ માર્જિન (EBITDAM) માં પણ સુધારો જોવા મળ્યો છે, જે ૩૭ બેઝિસ પોઈન્ટ્સ વધીને ૭.૨% રહ્યો છે. આ સુધારો મુખ્યત્વે ઓપરેટિંગ લેવરેજને કારણે થયો છે. કંપનીનો EBITDA ૧૨.૩ અબજ રૂપિયા રહ્યો છે, જે વાર્ષિક ધોરણે ૨૫.૫% નો વધારો દર્શાવે છે. નાણાકીય વર્ષ ૨૦૨૬ ના અંતે કંપની પર ૭ અબજ રૂપિયાનું ચોખ્ખું દેવું હતું.
બ્રોકરેજ હાઉસની રેટિંગ અને ભવિષ્યનો અંદાજ
એચડીએફસી સિક્યોરિટીઝ (HDFC Securities)
એચડીએફસી સિક્યોરિટીઝે ડીમાર્ટના શેર પર પોતાની ‘ADD’ રેટિંગ જાળવી રાખી છે. તેમણે નાણાકીય વર્ષ ૨૦૨૭/૨૮ માટે પ્રતિ શેર કમાણી (EPS) ના અંદાજોમાં કોઈ મોટો ફેરફાર કર્યો નથી.
-
ટાર્ગેટ પ્રાઈસ: ૪,૩૦૦ રૂપિયા પ્રતિ શેર.
-
વ્યૂહરચના: બ્રોકરેજ માને છે કે સ્ટોર વિસ્તરણ અને માર્જિનમાં સુધારો સારો છે, પરંતુ તેની સાતત્યતા જળવાઈ રહે તે જોવું મહત્વનું છે.
પીએલ કેપિટલ (PL Capital)
પીએલ કેપિટલે ચેતવણી આપી છે કે ‘ક્વિક કોમર્સ’ (ઝડપી ડિલિવરી સેવાઓ) થી વધતી જતી સ્પર્ધા ડીમાર્ટ રેડી (D’Mart Ready) ની વૃદ્ધિને મર્યાદિત કરી શકે છે.
-
શહેરોમાં ઘટાડો: ડીમાર્ટે છેલ્લા એક વર્ષમાં ૭ શહેરોમાંથી પોતાનો કારોબાર સમેટી લીધો છે અને હવે તે માત્ર ૧૮ શહેરો પૂરતું મર્યાદિત છે.
-
માર્જિન અંદાજ: સ્પર્ધાને કારણે નાણાકીય વર્ષ ૨૦૨૭/૨૮ માં EBITDA માર્જિન ૭.૧% થી ૭.૩% રહેવાની શક્યતા છે.
-
નવા સ્ટોર: એવી અપેક્ષા છે કે કંપની નાણાકીય વર્ષ ૨૦૨૭/૨૮ માં લગભગ ૭૫ નવા સ્ટોર ખોલશે.
-
રેટિંગ અને ટાર્ગેટ: પીએલ કેપિટલે ‘HOLD’ રેટિંગ આપી છે અને ટાર્ગેટ પ્રાઈસ વધારીને ૪,૪૧૦ રૂપિયા કરી છે.
