7-સીટર ઇલેક્ટ્રિક કારોની ધમાકેદાર એન્ટ્રી: Maruti YMC થી લઈને Tata Safari EV સુધીની ગાડીઓ ટૂંક સમયમાં થશે લોન્ચ
ભારતીય ઓટોમોબાઈલ માર્કેટમાં હાલના સમયમાં 7-સીટર એસયુવી (SUV) અને એમપીવી (MPV) સેગમેન્ટ ખૂબ જ ઝડપથી આગળ વધી રહ્યું છે. મોટા પરિવારો અને લાંબી મુસાફરીના શોખીનો માટે આ ગાડીઓ હંમેશાં પહેલી પસંદ રહી છે. પરંતુ હવે આ સેગમેન્ટમાં એક મોટો બદલાવ આવી રહ્યો છે. અત્યાર સુધી પેટ્રોલ અને ડીઝલ એન્જિન સુધી સીમિત રહેલો આ ટ્રેન્ડ હવે ઇલેક્ટ્રિક વ્હીકલ્સ (EV) તરફ વળી રહ્યો છે. વિનફાસ્ટ, ટાટા અને મારુતિ સુઝુકી જેવા દિગ્ગજ બ્રાન્ડ્સ ભારતીય બજારમાં પોતાની નવી 7-સીટર ઇલેક્ટ્રિક ગાડીઓ ઉતારવાની જોરશોરથી તૈયારી કરી રહ્યા છે. ચાલો જાણીએ આ આગામી શાનદાર ઇલેક્ટ્રિક કારો વિશે વિગતવાર માહિતી.
વિનફાસ્ટ વીએફ એમપીવી7 (VinFast VF MPV7)
વિયેતનામની જાણીતી ઇલેક્ટ્રિક વાહન નિર્માતા કંપની વિનફાસ્ટ ભારતીય બજારમાં પગપેસારો કરવા માટે સંપૂર્ણપણે તૈયાર છે. કંપનીએ તાજેતરમાં જ પોતાની પહેલી 7-સીટર એમપીવી, ‘વિનફાસ્ટ વીએફ એમપીવી7’ રજૂ કરી છે. ભારતમાં આ ગાડીના સત્તાવાર લોન્ચિંગ પહેલાં, કંપનીએ દેશમાં પોતાની ખાસ રાઇડ-હેલિંગ સર્વિસ ‘ગ્રીન એન્ડ સ્માર્ટ મોબિલિટી’ (GSM) શરૂ કરવાની યોજના પણ જાહેર કરી છે.
જો આ કારના ફીચર્સની વાત કરીએ તો, માર્કેટના અહેવાલો મુજબ આ મોડલમાં થોડા મર્યાદિત ફીચર્સ અને કલર ઓપ્શન જોવા મળી શકે છે, જેથી તેની કિંમત બજેટમાં રાખી શકાય. પાવરફોર્મન્સની બાબતમાં, આ એમપીવીમાં 60.13 kWh નો શક્તિશાળી બેટરી પેક આપવામાં આવે તેવી પૂરેપૂરી શક્યતા છે. કંપનીનો દાવો છે કે આ બેટરી સિંગલ ચાર્જ પર લગભગ 517 કિલોમીટરની શાનદાર રેન્જ આપશે, જે લાંબી સફર માટે ઉત્તમ સાબિત થઈ શકે છે.
ટાટા સફારી ઇવી (Tata Safari EV)
ઇલેક્ટ્રિક વ્હીકલ સેગમેન્ટમાં ટાટા મોટર્સ ભારતમાં પહેલેથી જ લીડર રહ્યું છે. ગયા વર્ષે ટાટાએ પોતાની હેરિયર ઇવી (Harrier EV) રજૂ કરીને ધૂમ મચાવી હતી, અને હવે કંપની પોતાની સૌથી લોકપ્રિય અને પ્રીમિયમ એસયુવી સફારીનું ઇલેક્ટ્રિક વર્ઝન લોન્ચ કરવા જઈ રહી છે. આ કલ્ટ એસયુવી ‘ટાટા સફારી ઇવી’ આ વર્ષના તહેવારોની સીઝન (Festive Season) ની આસપાસ માર્કેટમાં એન્ટ્રી કરી શકે છે.
ડિઝાઇનની વાત કરીએ તો, સફારી ઇવીનો આઉટલુક તેના રેગ્યુલર પેટ્રોલ-ડીઝલ મોડલ જેવો જ રહેશે, પરંતુ તેને ઇલેક્ટ્રિક લુક આપવા માટે કેટલાક ખાસ બદલાવ કરવામાં આવશે. આમાં નવી ક્લોઝ્ડ ગ્રીલ (બંધ ફ્રન્ટ ફેસિયા), ખાસ એરોડાયનેમિક એલોય વ્હીલ્સ અને અપડેટ ડિઝાઇન સાથેની નવી એલઇડી (LED) ટેલ લેમ્પ્સ જોવા મળશે.
પરફોર્મન્સ માટે આ કારમાં 65 kWh અને 75 kWh ના બે બેટરી પેક ઓપ્શન મળી શકે છે. નાની બેટરી અંદાજે 538 કિમીની રેન્જ આપશે, જ્યારે મોટી બેટરી સિંગલ ચાર્જ પર 622 થી 627 કિલોમીટર સુધીની જોરદાર રેન્જ આપવા સક્ષમ હશે. આ ઉપરાંત, આ કારના ટોપ-એન્ડ વેરિઅન્ટમાં ઓલ-વ્હીલ ડ્રાઇવ (AWD) સેટઅપ પણ મળી શકે છે, જે તેને ઓફ-રોડિંગ માટે પાવરફુલ બનાવશે.
ટાટા અવિન્યા એક્સ (Tata Avinya X)
ટાટા મોટર્સ માત્ર વર્તમાન મોડલ્સના ઇલેક્ટ્રિક વર્ઝન સુધી સીમિત નથી, પરંતુ કંપની ભવિષ્ય માટે તદ્દન નવા પ્લેટફોર્મ પર પણ કામ કરી રહી છે. કંપની આગામી સમયમાં એક નવું અને પ્રીમિયમ સેલ્સ નેટવર્ક શરૂ કરવા જઈ રહી છે, જેના હેઠળ માત્ર પ્રીમિયમ ઇલેક્ટ્રિક વાહનો જ વેચવામાં આવશે. આ શ્રેણીમાં ‘ટાટા અવિન્યા એક્સ’ સૌથી મોટું આકર્ષણ બનશે. અવિન્યાને થોડા વર્ષો પહેલા ઓટો એક્સપોમાં કોન્સેપ્ટ કાર તરીકે રજૂ કરવામાં આવી હતી, જેણે પોતાની લુકથી બધાને આશ્ચર્યચકિત કર્યા હતા.
ટાટા અવિન્યા એક્સ એક પ્રીમિયમ ક્રોસઓવર કાર હશે, જે ગ્રાહકોની જરૂરિયાત મુજબ 5-સીટર, 6-સીટર અને 7-સીટર વેરિઅન્ટમાં ઉપલબ્ધ કરાવાશે. આ લક્ઝુરિયસ કારની લંબાઈ લગભગ 5 મીટર જેટલી હશે. આ ગાડીમાં ટાટાના અત્યાર સુધીના કોઈપણ મોડલ કરતાં વધુ એડવાન્સ, કનેક્ટેડ અને આધુનિક ફીચર્સ જોવા મળશે, જે મુસાફરોને ફર્સ્ટ-ક્લાસ ફ્લાઇટ જેવો અનુભવ કરાવશે.
મારુતિ સુઝુકી વાયએમસી કોન્સેપ્ટ (Maruti Suzuki YMC Concept)
ભારતની સૌથી મોટી કાર નિર્માતા કંપની મારુતિ સુઝુકી પણ હવે ઇલેક્ટ્રિક વાહનોની રેસમાં પાછળ રહેવા નથી માંગતી. કંપની પોતાની પહેલી 7-સીટર ઇલેક્ટ્રિક એમપીવી પર ઝડપથી કામ કરી રહી છે, જેનું ઇન્ટરનલ કોડનેમ ‘YMC’ રાખવામાં આવ્યું છે. આ નવી કાર તાજેતરમાં રજૂ કરાયેલી મારુતિ સુઝુકી ઇ-વિટારા (e-Vitara) ના આધુનિક આર્કિટેક્ચર અને પ્લેટફોર્મ પર આધારિત હશે. હાલમાં આ ગાડીનું ભારતીય રસ્તાઓ પર સખત ટેસ્ટિંગ ચાલી રહ્યું છે અને અહેવાલો અનુસાર તે વર્ષ 2026 ના અંત સુધીમાં માર્કેટમાં લોન્ચ થઈ શકે છે.
મારુતિની આ પહેલી ઇલેક્ટ્રિક 7-સીટર કારમાં ગ્રાહકોને પ્રીમિયમ અનુભવ આપવા માટે કોઈ કસર બાકી રાખવામાં નહીં આવે. આમાં મોટી ઇન્ફોટેનમેન્ટ ટચસ્ક્રીન, અત્યંત વિશાળ કેબિન, આરામદાયક કેપ્ટન સીટો, 360-ડિગ્રી કેમેરા, સેફ્ટી માટે લેવલ-2 એડાસ (ADAS), વાયરલેસ ચાર્જિંગ, વેન્ટિલેટેડ અને પાવર્ડ સીટો, સ્માર્ટ કનેક્ટેડ-કાર ટેક્નોલોજી અને આકર્ષક પેનોરેમિક ગ્લાસ રૂફ જેવા શાનદાર ફીચર્સ મળવાની આશા છે.
