‘સંજુ સેમસન પર બંદૂક કેમ તાકવી?’: વૈભવ સૂર્યવંશીના ડેબ્યૂ માટે વધતા હોબાળા વચ્ચે BCCI ના પૂર્વ પસંદગીકાર સબા કરીમનો મોટો સવાલ
૧૫ વર્ષીય ક્રિકેટિંગ સેન્સેશન વૈભવ સૂર્યવંશીના ઇન્ટરનેશનલ ડેબ્યૂને લઈને હાલમાં વિશ્વ ક્રિકેટમાં ભારે ઉત્સુકતા જોવા મળી રહી છે. ઘણા દિગ્ગજો તેને તાત્કાલિક પ્લેઇંગ ઇલેવનમાં સામેલ કરવાની માંગ કરી રહ્યા છે, જેના કારણે ફેન્સ અને નિષ્ણાતોની ધીરજ ખૂટી રહી હોય તેવું લાગે છે. જો સૂર્યવંશી અત્યારે ડેબ્યૂ કરે છે, તો તે મહાન સચિન તેંડુલકરને પાછળ છોડીને ભારત માટે રમનારો સૌથી યુવા આંતરરાષ્ટ્રીય ક્રિકેટર બની જશે.
પરંતુ, દરેક વ્યક્તિ આ ઉતાવળ સાથે સહમત નથી. BCCI ના ભૂતપૂર્વ રાષ્ટ્રીય પસંદગીકાર સબા કરીમે ભારતીય ટીમ મેનેજમેન્ટના સાવચેતીભર્યા વલણનું જોરદાર સમર્થન કર્યું છે. તેમણે દલીલ કરી છે કે માત્ર ૧૫ વર્ષના ખેલાડીને રમાડવા માટે સિનિયર વિકેટકીપર-બેટ્સમેન સંજુ સેમસનને પ્લેઇંગ ઇલેવનમાંથી પડતો મૂકવો ખૂબ જ અન્યાયી રહેશે.
સબા કરીમનો સવાલ: “સેમસને એવું તે શું ખોટું કર્યું છે?”
સ્ટાર સ્પોર્ટ્સના લોકપ્રિય શો ‘ફોલો ધ બ્લૂઝ’ (Follow the Blues) માં વાતચીત કરતી વખતે સબા કરીમે ભારતના વર્તમાન સંયોજનનો બચાવ કર્યો હતો. તેમણે સંજુ સેમસનની સ્થિતિ અને તેની ક્ષમતા પર ભાર મૂકતા કહ્યું:
“મને આ તબક્કે વૈભવને સીધો રમાડવાનો કોઈ વિચાર યોગ્ય નથી લાગતો. સંજુ સેમસન એક શાનદાર ખેલાડી અને સાબિત થયેલો મેચ વિજેતા છે. તેની તાજેતરની આઈપીએલ સીઝન ખૂબ જ શાનદાર રહી હતી. આ સિવાય, આ વર્ષની શરૂઆતમાં ભારતના વિજયી ટી૨૦ વર્લ્ડ કપ અભિયાનમાં તે ‘પ્લેયર ઓફ ધ ટુર્નામેન્ટ’ રહ્યો હતો. તો પછી આપણે અત્યારે શું સાબિત કરવા માંગીએ છીએ? સંજુ સેમસન પણ અત્યારે એ જ વિચારતો હશે ને કે– ‘બધા અચાનક મારા પર બંદૂક કેમ તાકી રહ્યા છે?’”
સબા કરીમના મતે, સૂર્યવંશી માટે અત્યારે સૌથી મોટી સકારાત્મક બાબત એ છે કે તે માત્ર ૧૫ વર્ષની કાચી ઉંમરે ભારતીય સિનિયર ડ્રેસિંગ રૂમનો હિસ્સો બન્યો છે અને દિગ્ગજો સાથે સમય વિતાવી રહ્યો છે.
“વૈભવ સૂર્યવંશી માટે આ એક અદ્ભુત લર્નિંગ કર્વ (શીખવાનો તબક્કો) છે. તેને એ સમજવાની જરૂર છે કે ભારતીય ટીમની પ્લેઇંગ ઇલેવનમાં સ્થાન મેળવવા માટે ઘણી મહેનત કરવી પડે છે. આ આંતરરાષ્ટ્રીય વાતાવરણ તેને એક ક્રિકેટર અને એક વ્યક્તિ તરીકે પરિપક્વ બનવામાં મદદ કરશે. ભલે તેની પાસે અસાધારણ પ્રતિભા છે, પરંતુ જ્યારે તમે આવા અતિ-સ્પર્ધાત્મક વાતાવરણમાં આવો છો, ત્યારે તમારે તમારી તકની ધીરજપૂર્વક રાહ જોવી જ પડે છે.”
“૧૫ સભ્યોની ટીમમાં હોવું એ પણ સપનું સાકાર થવા સમાન”: ચેતેશ્વર પૂજારા
આ જ પેનલનો હિસ્સો રહેલા ભારતના અનુભવી ટેસ્ટ બેટ્સમેન ચેતેશ્વર પૂજારાએ પણ સબા કરીમના સૂર માં સૂર પુરાવ્યો હતો. પૂજારાએ આ યુવા ખેલાડીને સકારાત્મક રહેવાની સલાહ આપતા જણાવ્યું:
“વૈભવ માટે આ એક ખૂબ જ મોટી તક છે. ભલે તેને પ્લેઇંગ ઇલેવનમાં હજુ સુધી તક ન મળી હોય, પરંતુ ભારતીય ટીમની મુખ્ય ૧૫ સભ્યોની સ્ક્વોડમાં સ્થાન મેળવવું એ પણ નાની વાત નથી. આ ઉંમરે તેના માટે આ એક સપનું સાકાર થવા જેવી ક્ષણ છે. જ્યારે તેને ભવિષ્યમાં પ્લેઇંગ ઇલેવનમાં કેપ મળશે, ત્યારે તે તેનાથી પણ મોટી અને યાદગાર ક્ષણ હશે.”
પૂજારાએ આગળ ઉમેર્યું, “તેણે પોતાની તક માટે થોડી રાહ જોવી જ પડશે. વૈભવ માટે એ બહુ મોટી વાત છે કે તેને સિનિયર ક્રિકેટર્સ અને વર્લ્ડ ક્લાસ કોચ સાથે ટ્રેનિંગ કરવાનો અને તેમની પાસેથી ઘણું બધું શીખવાનો મોકો મળી રહ્યો છે. તે કોઈ શંકા વિના એક અદ્ભુત પ્રતિભા છે, પણ ઉતાવળ કરવાના બદલે સમય આપવો જરૂરી છે.”
આઈપીએલમાં મચાવી હતી ધૂમ
બિહારના વતની એવા વૈભવ સૂર્યવંશીએ IPL 2026 માં રાજસ્થાન રોયલ્સ તરફથી રમતા સનસનાટી મચાવી દીધી હતી. તેણે પૂરી ટૂર્નામેન્ટ દરમિયાન આક્રમક બેટિંગ કરીને કુલ ૭૭૬ રન ફટકાર્યા હતા. આ જ કારણ છે કે તેને આયર્લેન્ડ અને ઇંગ્લેન્ડ પ્રવાસ માટે ભારતીય ટીમમાં સામેલ કરીને આંતરરાષ્ટ્રીય સ્તરે લાઈમલાઈટમાં લાવવામાં આવ્યો છે.
