Buy, Sell કે Hold? DMart ના શેરમાં હવે શું કરવું? ક્વાર્ટર પરિણામો પછી દિગ્ગજ બ્રોકરેજ હાઉસે બદલી નાખી આખી ‘ગેમ’
ભારતના રિટેલ સેક્ટરના કિંગ ગણાતા રાધાકિશન દમાણીની કંપની એવેન્યુ સુપરમાર્ટ્સ (DMart) ના શેર હંમેશાથી રોકાણકારોના ફેવરિટ રહ્યા છે. પરંતુ કંપનીના તાજેતરના જૂન ક્વાર્ટર (Q1) ના નાણાકીય પરિણામો જાહેર થયા પછી, દલાલ સ્ટ્રીટના દિગ્ગજ નિષ્ણાતો અને મોટા બ્રોકરેજ હાઉસીસ વચ્ચે એક મોટો વૈચારિક જંગ શરૂ થઈ ગયો છે. પરિણામો પ્રથમ નજરે અંદાજ મુજબના દેખાઈ રહ્યા છે, પરંતુ તેની અંદર છુપાયેલા કેટલાક આંકડાઓએ બજારના એનાલિસ્ટ્સને બે ભાગમાં વહેંચી દીધા છે. મોટા શહેરોમાં વેચાણની ગતિ ધીમી પડવી અને ૧૦-૨૦ મિનિટમાં ડિલિવરી આપતી ક્વિક કોમર્સ એપ્સ તરફથી મળી રહેલી આકરી સ્પર્ધાને કારણે બજારમાં ચિંતાનો માહોલ છે, જેના કારણે ઘણા બ્રોકરેજે પોતાના ટાર્ગેટ પ્રાઇસ ઘટાડ્યા છે, તો કેટલાક હજુ પણ કંપનીના મજબૂત મોડલ પર ભરોસો રાખી રહ્યા છે.
વેચાણ સ્થિર અને ક્વિક કોમર્સનો મોટો પડકાર
દેશના આર્થિક ક્ષેત્રે મોટું નામ ધરાવતી બ્રોકરેજ ફર્મ Emkay એ DMart ના શેર પર સ્પષ્ટપણે ‘Sell’ (વેચો) નું રેટિંગ જાળવી રાખ્યું છે અને તેનો ટાર્ગેટ પ્રાઇસ ઘટાડીને ૩,૭૦૦ રૂપિયા કર્યો છે. તેમનું વિશ્લેષણ દર્શાવે છે કે કંપનીના બિઝનેસ ગ્રોથના સંકેતો નબળા પડી રહ્યા છે. ખાસ કરીને મોટા મેટ્રો શહેરોમાં આવેલા જુના સ્ટોર્સમાં ગ્રાહકોની સંખ્યા અને વેચાણ લગભગ સ્થિર થઈ ગયું છે. રિપોર્ટ પ્રમાણે, સ્ટોર્સમાં કસ્ટમર ટ્રાન્ઝેક્શન ભલે ૧૩.૪ ટકા વધ્યા હોય, પરંતુ સરેરાશ બિલની વેલ્યુમાં માત્ર ૧.૫ ટકાનો મામૂલી વધારો થયો છે, જે દર્શાવે છે કે લોકો હવે માત્ર જરૂરી અને સસ્તો સામાન ખરીદી રહ્યા છે. આ ક્વાર્ટરમાં કંપનીએ માત્ર ૩ નવા સ્ટોર ખોલ્યા છે, જે ગયા વર્ષના સમાન ગાળાના ૯ સ્ટોર્સની સરખામણીએ ઘણા ઓછા છે. ઓનલાઇન વિંગ ‘DMart Ready’ નો ગ્રોથ પણ ઘટીને ૫.૫ ટકા થઈ ગયો છે અને કંપનીએ સાત શહેરોમાંથી પોતાનો ઓનલાઈન બિઝનેસ સમેટી લેવો પડ્યો છે. નિષ્ણાતોના મતે, ૭૦ ગણા ફોરવર્ડ P/E વેલ્યુએશન પર આ શેર અત્યારે ઘણો મોંઘો દેખાઈ રહ્યો છે.
વૈશ્વિક સ્તરની દિગ્ગજ ફર્મ Goldman Sachs પણ આ નકારાત્મક પ્રવાહમાં સહમત દેખાય છે. તેમણે પણ ‘Sell’ રેટિંગ સાથે ૪,૦૦૦ રૂપિયાનો ટાર્ગેટ સેટ કર્યો છે. તેમના મતે, કંપનીની સ્ટેન્ડઅલોન આવક ભલે ૧૫.૧ ટકા વધી હોય, પરંતુ તે અગાઉના ક્વાર્ટરના ૧૯ ટકા ગ્રોથ કરતા ઘણી ધીમી છે. સૌથી ચિંતાજનક બાબત એ છે કે મેટ્રો શહેરોમાં ‘લાઇક-ફોર-લાઇક’ (એટલે કે જૂના સ્ટોર્સનો ઓર્ગેનિક ગ્રોથ) ઘટીને ૫.૫ ટકા પર આવી ગયો છે. બ્લિંકિટ, ઝેપ્ટો અને ઇન્સ્ટામાર્ટ જેવી ક્વિક કોમર્સ કંપનીઓએ મેટ્રો શહેરોમાં ડીમાર્ટના માર્કેટ શેર પર સીધો પ્રહાર કર્યો છે. કર્મચારીઓનો વધતો પગાર ખર્ચ અને નવા સ્ટોર્સના વિસ્તરણ પાછળ થતા ખર્ચે કંપનીના ઓપરેટિંગ પ્રોફિટ (EBITDA) માર્જિનને પણ મર્યાદિત કરી દીધું છે.
નાના શહેરોમાં મજબૂત પકડ અને આશાનું કિરણ
આ નકારાત્મક ચિત્રની વચ્ચે, HDFC Securities જેવી કેટલીક સ્વદેશી બ્રોકરેજ ફર્મ્સ થોડી આશાવાદી છે. તેમણે સ્ટોક પર ‘Add’ રેટિંગ આપતા ૪,૧ block૫૦ રૂપિયાનો ટાર્ગેટ રાખ્યો છે. તેમનું કહેવું છે કે ભલે મેટ્રો શહેરોમાં વેચાણ ફ્લેટ રહ્યું હોય, પરંતુ નોન-મેટ્રો એટલે કે નાના શહેરોના બજારોમાં ડીમાર્ટનો ગ્રોથ ૧૪ થી ૧૫ ટકા જેટલો મજબૂત રહ્યો છે. આ જ રીતે Elara Capital એ ‘Accumulate’ રેટિંગ સાથે ૪,૭૦૦ રૂપિયાનો લક્ષ્યાંક આપ્યો છે. તેમનું માનવું છે કે લાંબા ગાળે એફએમસીજી (FMCG) પ્રોડક્ટ્સની કિંમતોમાં સંભવિત વધારો અને આગામી સમયમાં થનારા નવા સ્ટોરના વિસ્તરણથી કંપની ફરી બેઠી થશે.
સૌથી રસપ્રદ અને હકારાત્મક વલણ Motilal Oswal તરફથી આવ્યું છે. તેમણે ડીમાર્ટ પર પોતાનો ભરોસો કાયમ રાખતા ‘Buy’ (ખરીદો) નું રેટિંગ આપ્યું છે અને ટાર્ગેટ પ્રાઇસ ૪,૭૫૦ રૂપિયાથી વધારીને સીધો ૪,૮૦૦ રૂપિયા કરી દીધો છે. મોતીલાલ ઓસ્વાલનું માનવું છે કે ટૂંકા ગાળામાં ભલે ગ્રોથની રફતાર ધીમી પડી હોય, પરંતુ ડીમાર્ટનું મૂળભૂત ‘વેલ્યુ-ફોર-મની’ (ઓછા ભાવે સારો સામાન) નું બિઝનેસ મોડલ અને મજબૂત સ્ટોર ઇકોનોમિક્સ એટલું પાવરફુલ છે કે તે લાંબા ગાળે કોઈપણ મોટી સ્પર્ધા સામે ટકી જશે. આ સિવાય અન્ય બ્રોકરેજમાં મિશ્ર પ્રતિસાદ છે—જેમ કે Jefferies એ ‘Hold’ સાથે ૪,૫૦૦ રૂપિયા, જ્યારે CLSA એ સૌથી વધુ ૫,૭૨૩ રૂપિયાનો બુલિશ ટાર્ગેટ આપીને ખરીદીની સલાહ આપી છે.
રોકાણકારો માટે સ્પષ્ટ તારણ એ છે કે જો તમે શોર્ટ ટર્મ ટ્રેડર છો તો ક્વિક કોમર્સના દબાણને કારણે શેરમાં થોડી અસ્થિરતા જોવા મળી શકે છે, પરંતુ જો તમે લાંબા ગાળાના રોકાણકાર છો, તો ડીમાર્ટનું મોડલ હજુ પણ મજબૂત અને ભરોસાપાત્ર છે.
