નવી RAM ખરીદ્યા વગર પણ લેપટોપ ચાલશે સુપરફાસ્ટ: અપનાવો આ સ્માર્ટ ટિપ્સ
આજના આધુનિક અને ડિજિટલ યુગમાં લેપટોપ કે કમ્પ્યુટર આપણી દૈનિક કામગીરીનો એક અભિન્ન ભાગ બની ગયા છે. પરંતુ જ્યારે આ ઉપકરણો સ્લો કે હેંગ થવા લાગે છે, ત્યારે સામાન્ય કામ પૂરું કરવામાં પણ મુશ્કેલી પડે છે. સિસ્ટમ સ્લો થવાનું મુખ્ય કારણ તેની રેમ (RAM) ફુલ થઈ જવાનું હોય છે. જો સમયસર ધ્યાન ન આપવામાં આવે તો સિસ્ટમ અચાનક ક્રેશ પણ થઈ શકે છે. થોડા સમય પહેલા સુધી 4GB કે 8GB RAM પૂરતી માનવામાં આવતી હતી, પરંતુ નવી ટેકનોલોજી અને ભારે સોફ્ટવેરના કારણે હવે તે પણ ઓછી પડી રહી છે.
હાલના સમયમાં મેમરી ચિપ્સ અને સ્ટોરેજ ઘટકોનો ઉત્પાદન ખર્ચ વધવાને કારણે બજારમાં નવી RAM ખરીદવી અત્યંત મોંઘી થઈ ગઈ છે. આવી સ્થિતિમાં નવું હાર્ડવેર ખરીદીને ખિસ્સા પર ભાર વધારવાને બદલે કેટલીક સરળ અને અસરકારક ટેક ટિપ્સ અપનાવીને તમે તમારા લેપટોપને ફરીથી સ્પીડી બનાવી શકો છો.
RAM કેવી રીતે કામ કરે છે?
RAM એ સિસ્ટમની એક અસ્થાયી (Temporary) સ્ટોરેજ છે, જેને શોર્ટ ટર્મ સ્ટોરેજ પણ કહેવામાં આવે છે. કમ્પ્યુટર તમામ ચાલુ પ્રોસેસ, ઇન્સ્ટ્રક્શન્સ અને ડેટાને કામ પૂરતો જ RAM માં સ્ટોર કરે છે. જ્યારે એકસાથે ઘણી બધી એપ્સ ઓપન થવાથી RAM ભરાઈ જાય છે, ત્યારે સિસ્ટમ મેઈન સ્ટોરેજ ડ્રાઈવ (HDD કે SSD) નો ઉપયોગ કરવા લાગે છે. સ્ટોરેજ ડ્રાઈવની સ્પીડ મૂળભૂત રીતે ધીમી હોવાથી લેપટોપ અચાનક સ્લો થઈ જાય છે.
લેપટોપને ફાસ્ટ બનાવવાના ૫ સરળ ઉપાયો
૧. લેપટોપને રિસ્ટાર્ટ કરો: RAM ને તાત્કાલિક ફ્રી કરવા માટે સિસ્ટમને રિસ્ટાર્ટ કરવી એ સૌથી સહેલો અને કારગર ઉપાય છે. સિસ્ટમ બંધ થતાં જ RAM માં સ્ટોર થયેલો તમામ અસ્થાયી ડેટા ગાયબ થઈ જાય છે અને રિબૂટ થયા પછી RAM એકદમ ખાલી થઈને સ્પીડ વધારી દે છે.
૨. બિનજરૂરી બ્રાઉઝર ટેબ્સ બંધ કરો: ઇન્ટરનેટ બ્રાઉઝરમાં ઓપન થયેલી દરેક સિંગલ ટેબ ૧૦૦MB થી લઈને ૧GB સુધીની મેમરી વાપરે છે. તેથી જે ટેબનો ઉપયોગ ન હોય તેને તરત જ બંધ કરી દેવી જોઈએ.
૩. બેકગ્રાઉન્ડ એપ્સ બંધ કરો: મલ્ટીટાસ્કિંગ કરતી વખતે આપણે ઘણી એપ્સ ખુલ્લી મૂકી દઈએ છીએ. વાસ્તવમાં આ એપ્સનો ઉપયોગ ન થતો હોય તો પણ તે બેકગ્રાઉન્ડમાં RAM નો વપરાશ કરતી હોય છે. ટાસ્ક મેનેજર દ્વારા આવી એપ્સને બંધ કરવાથી મેમરી ફ્રી થાય છે.
૪. સ્ટાર્ટઅપ એપ્સ ડિસેબલ કરો: જો લેપટોપ ઓન થવામાં વાર લાગતી હોય તો તેની પાછળ ઓટો-સ્ટાર્ટ થતી એપ્સ જવાબદાર હોય છે. ટાસ્ક મેનેજરમાં ‘Startup’ ટેબમાં જઈને આ બિનજરૂરી પ્રોગ્રામ્સને ડિસેબલ કરવાથી સિસ્ટમ ઝડપથી બૂટ થાય છે.
૫. સિસ્ટમ અપડેટ અને એન્ટીવાયરસ: લેપટોપના વિન્ડોઝ અને સોફ્ટવેરને સમયસર અપડેટ રાખવાથી જૂના બગ્સ (Bugs) દૂર થાય છે. સાથે જ વાયરસ કે માલવેરના કારણે સિસ્ટમ સ્લો ન થાય તે માટે એક સારું એન્ટીવાયરસ સોફ્ટવેર રાખવું પણ અત્યંત જરૂરી છે.
