હોલીવુડ સ્ટાર અને દિવ્યાંગ અધિકારોના પ્રણેતા આરજે મિટ્ટેનું ટેક્સાસમાં નિધન, ફેન્સમાં ઘેરો આઘાત
હોલીવુડ અને ટેલિવિઝનની દુનિયામાંથી એક આઘાતજનક અને હૃદયદ્રાવક સમાચાર સામે આવ્યા છે. લોકપ્રિય અમેરિકન ટીવી શ્રેણી ‘બ્રેકિંગ બેડ’માં શાનદાર અભિનય દ્વારા ઘરે-ઘરે જાણીતા બનેલા અભિનેતા RJ Mitteનું માત્ર ૩૪ વર્ષની વયે નિધન થયું છે. તેમના અચાનક અને અકાળ અવસાનથી સમગ્ર મનોરંજન જગત અને વિશ્વભરમાં ફેલાયેલા તેમના ચાહકો ઊંડા આઘાતમાં સરી પડ્યા છે.
સોમવારે ટેક્સાસના બ્રાઉન્સવિલેમાં તેમના નિધનની સત્તાવાર પુષ્ટિ કરવામાં આવી છે. જો કે, હજુ સુધી તેમના મૃત્યુનું સત્તાવાર કારણ સામે આવ્યું નથી, પરંતુ મીડિયા અહેવાલો અનુસાર આ આત્મહત્યાનો માલો હોઈ શકે છે, જેની સ્થાનિક પોલીસ હાલ ઊંડાણપૂર્વક તપાસ કરી રહી છે. તેમના પરિવારે ‘હોલીવુડ રિપોર્ટર’ને એક ભાવુક નિવેદન આપતા જણાવ્યું છે કે, “અમને અત્યંત ભારે હૈયે અને દુઃખ સાથે એક શાનદાર સોશિયલ વર્કર, દિવ્યાંગોના અધિકારો માટે લડનાર યોદ્ધા અને આપણા વ્હાલા આરજે મિટ્ટેના નિધનની જાણકારી આપવી પડી રહી છે.”
‘વોલ્ટર વ્હાઇટ જુનિયર’ તરીકે અમર થઈ ગયું પાત્ર
RJ Mitteએ કલ્ટ-ક્લાસિક શ્રેણી ‘બ્રેકિંગ બેડ’ની તમામ પાંચ સીઝનમાં તેમના શક્તિશાળી અભિનય દ્વારા પ્રેક્ષકોના હૃદય પર અમીટ છાપ છોડી હતી. તેમણે આ શોમાં ‘વોલ્ટર વ્હાઇટ જુનિયર’નું પાત્ર ભજવ્યું હતું, જેને વિશ્વભરમાં ખૂબ જ પ્રેમ મળ્યો હતો. નોંધનીય છે કે, પડદા પરના તેમના પાત્રની જેમ જ, તેઓ વાસ્તવિક જીવનમાં પણ ‘સેરેબ્રલ પાલ્સી’ (મગજનો લકવો) સાથે જીવતા હતા. પડદા પર પોતાના પાત્રને સંપૂર્ણ પ્રમાણિકતા સાથે જીવંત કરવા માટે તેમણે પોતાના જીવનના કઠિન સંઘર્ષો અને અનુભવોનો સહારો લીધો હતો. તેઓ માત્ર એક અસાધારણ અભિનેતા જ નહીં, પરંતુ એક મજબૂત વ્યક્તિત્વ ધરાવતા વ્યક્તિ પણ હતા, જેમણે હોલીવુડમાં દિવ્યાંગ કલાકારોના અધિકારો અને ગરિમા માટે અવાજ ઉઠાવ્યો હતો.
સંઘર્ષોથી ભરેલું જીવન અને શાનદાર કારકિર્દી
RJ Mitte IIIનો જન્મ ૨૧ ઓગસ્ટ, ૧૯૯૨ના રોજ જેક્સન, મિસિસિપીમાં થયો હતો. જન્મ સમયે ઇમરજન્સી સિઝેરિયન સેક્શન દ્વારા તેમને બચાવી લેવામાં આવ્યા હોવા છતાં, શરૂઆતમાં તેઓ શ્વાસ લઈ શક્યા ન હતા, જેના પરિણામે તેમને ‘હાયપોક્સિક-ઇસ્કેમિક એન્સેફાલોપથી’ (hypoxic-ischemic encephalopathy) નામની સ્થિતિનો સામનો કરવો પડ્યો હતો. ત્યારબાદ રોય ફ્રેન્ક મિટ જુનિયર અને ડાયના મિટ દ્વારા તેમને દત્તક લેવામાં આવ્યા હતા, જોકે જ્યારે તેઓ માત્ર બે મહિનાના હતા ત્યારે જ તેમના દત્તક માતા-પિતા અલગ થઈ ગયા હતા. ત્રણ વર્ષની ઉંમરે તેમને ‘સેરેબ્રલ પાલ્સી’ હોવાનું નિદાન થયું હતું.
આરજે મિટ્ટેએ માત્ર ‘બ્રેકિંગ બેડ’ પૂરતો જ પોતાનો અભિનય સીમિત રાખ્યો ન હતો, પરંતુ આ ઉપરાંત તેમણે ‘સ્વિચ્ડ એટ બર્થ’, નેટફ્લિક્સની લાઈવ-એક્શન સિરીઝ ‘ધ ગાર્ડિયન્સ ઓફ જસ્ટિસ’, ‘હૂઝ ડ્રાઇવિંગ ડગ’, થ્રિલર-ડ્રામા ‘ટાઇમ શેર’, કોમેડી ફિલ્મ ‘સ્ટેન્ડિંગ અપ ફોર સની’, ‘ધ ઓક રૂમ’ અને કમિંગ-ઓફ-એજ ડ્રામા ‘ટ્રાયમ્ફ’ જેવા પ્રોજેક્ટ્સમાં પણ શાનદાર અભિનયનું હુનર બતાવ્યું હતું. વર્ષ 2014માં તેમને ‘બ્રેકિંગ બેડ’ માટે પ્રતિષ્ઠિત સ્ક્રીન એક્ટર્સ ગિલ્ડ અવૉર્ડથી પણ નવાજવામાં આવ્યા હતા. અભિનય ઉપરાંત તેઓ સમાજસેવા સાથે પણ ઊંડાણપૂર્વક જોડાયેલા હતા; તેમણે ‘યુનાઇટેડ સેરેબ્રલ પાલ્સી’ અને ‘શ્રાઇનર્સ ચિલ્ડ્રન્સ’ માટે બ્રાન્ડ એમ્બેસેડર તરીકે કામ કર્યું હતું અને ‘મિટ્ટે ફાઉન્ડેશન’ના પ્રમુખ પણ રહ્યા હતા.
પ્રશંસકો અને સહ-કલાકારોએ આપી શ્રદ્ધાંજલિ
આરજે મિટના અચાનક અવસાન બાદ સોશિયલ મીડિયા પર શોકની લહેર ફરી વળી છે. ચાહકો અને હોલીવુડના સાથી કલાકારો ભીની આંખોએ તેમને યાદ કરી રહ્યા છે અને ઓનલાઇન શ્રદ્ધાંજલિ આપી રહ્યા છે. ચાહકોનું કહેવું છે કે તેમણે એક એવું પાત્ર ભજવ્યું અને તેને સુંદર રીતે કંડાર્યું જે લોકોના હૃદયમાં હંમેશા અમર રહેશે.
