આજે પેટીએમ, એરટેલ અને સ્પાઇસજેટ સહિત આ શેરો પર રહેશે નજર

ગિફ્ટ નિફ્ટીમાં ૭૨ પોઈન્ટનું ગાબડું: જાણો આજે કયા શેરો રહેશ ફોકસમાં

ભારતીય શેરબજારમાં સોમવારના નકારાત્મક બંધ બાદ મંગળવારે, ૧૮ ઓગસ્ટ ૨૦૨૬ના રોજ પણ રોકાણકારો માટે સાવચેતીભર્યો માહોલ જોવા મળી રહ્યો છે. આંતરરાષ્ટ્રીય સ્તરે ઊર્જાના વધતા ભાવ અને ભૌગોલિક તણાવ વચ્ચે વૈશ્વિક સંકેતો નબળા પડ્યા છે. ગિફ્ટ નિફ્ટી (GIFT Nifty) ઇન્ડેક્સ સોમવારના બંધથી આશરે ૭૨.૭૦ પોઈન્ટ ઘટીને ૨૪,૩૨૦ની નજીક ટ્રેડ કરી રહ્યો હતો, જે સૂચવે છે કે ભારતીય બેન્ચમાર્ક સૂચકાંકો સેન્સેક્સ અને નિફ્ટી આજે ગેપ-ડાઉન ઓપનિંગ સાથે લાલ નિશાનમાં ખુલી શકે છે.
નોંધનીય છે કે સોમવારે સેન્સેક્સ ૨૮૧ પોઈન્ટ ઘટીને ૭૭,૭૨૮.૧૬ અને નિફ્ટી ૫૦ ઇન્ડેક્સ ૭૮ પોઈન્ટના ઘટાડા સાથે ૨૪,૨૮૭.૬૫ ની સપાટીએ બંધ રહ્યો હતો. આ સમગ્ર સાવચેતીભર્યા વાતાવરણ વચ્ચે પણ કેટલાક ચોક્કસ શેરો પોતાના કંપની સ્તરના સમાચાર અને ટ્રિગર્સને કારણે ટ્રેડિંગ સેશનમાં ભારે હલચલ દર્શાવી શકે છે.

પ્રમુખ કંપનીઓના મહત્વના સમાચાર અને બ્લોક ડીલ

• પેટીએમ (Paytm – One97 Communications): બજારના અહેવાલો મુજબ, પેટીએમ બ્રાન્ડની પેરેન્ટ અને પ્રમોટર એન્ટિટી ‘રેઝિલિયન્ટ એસેટ મેનેજમેન્ટ BV’ બ્લોક ડીલ દ્વારા કંપનીમાં પોતાનો ૪.૯૮% સુધીનો હિસ્સો વેચે તેવી શક્યતા છે. આ મોટા સોદાને પગલે આજે પેટીએમના શેરમાં મોટો ઉછાળો કે અસ્થિરતા જોવા મળી શકે છે.
• ભારતી એરટેલ (Bharti Airtel): એરટેલ પેમેન્ટ્સ બેંકે તેના નેતૃત્વમાં મોટા ફેરફારની ઘોષણા કરી છે. કંપનીના સ્થાપક અને નોન-એક્ઝિક્યુટિવ ચેરમેન સુનીલ ભારતી મિત્તલ આવનારી ૩૦ સપ્ટેમ્બરથી પોતાનો કાર્યકાળ પૂર્ણ કરીને બોર્ડમાંથી રાજીનામું આપશે.
• નેટવેબ ટેક્નોલોજીસ (Netweb Technologies): હાઇ-પરફોર્મન્સ કમ્પ્યુટિંગ સર્વર બનાવતી આ કંપનીએ રૂ. ૧,૨૦૦ કરોડ સુધીનું ભંડોળ એકત્ર કરવા માટે ક્વોલિફાઇડ ઇન્સ્ટિટ્યૂશનલ પ્લેસમેન્ટ (QIP) શરૂ કર્યું છે. કંપનીએ આ માટે ઇશ્યૂ પ્રાઇસ પ્રતિ શેર રૂ. ૪,૭૧૦ થી રૂ. ૪,૭૯૦ની રેન્જમાં નક્કી કરી છે.

ફાર્મા અને એવિએશન સેક્ટરના મુખ્ય અપડેટ્સ

• લ્યુપિન લિમિટેડ (Lupin): ફાર્મા ક્ષેત્રની આ અગ્રણી કંપનીને યુએસ હેલ્થ રેગ્યુલેટર (USFDA) તરફથી અતિશય ઊંઘની સારવાર માટે વપરાતી પિટોલિસન્ટ (Pitolisant) ટેબ્લેટ્સના જેનરિક વર્ઝન માટે અંતિમ મંજૂરી મળી ગઈ છે. આ મંજૂરીથી લ્યુપિનના અમેરિકી બિઝનેસને મોટો વેગ મળશે.
• સ્પાઇસજેટ (SpiceJet): એરલાઇન કંપની માટે એક રાહતના સમાચાર આવ્યા છે. વિમાન ભાડે આપનારી એક કંપની સાથે છેલ્લી ઘડીએ સમાધાન થઈ જતાં, નેશનલ કંપની લો ટ્રિબ્યુનલ (NCLT) એ સ્પાઇસજેટ સામે દાખલ કરાયેલી આઠ નાદારી અરજીઓ પરનો પોતાનો આખરી ચુકાદો હાલ પૂરતો મુલતવી રાખ્યો છે.

એક્વિઝિશન અને ઓર્ડર જીતનારા શેરો

કોર્પોરેટ ક્ષેત્રે અન્ય કેટલાંક હસ્તાંતરણ (Acquisitions) પણ ફોકસમાં રહેશે. લોયડ્સ એન્જિનિયરિંગ વર્ક્સ લિમિટેડે સ્ટીલ ઇન્ફ્રા સોલ્યુશન્સ (SISCOL) માં ૫૧.૧૩% હિસ્સો ખરીદીને તેને પોતાની હોલ્ડિંગ કંપની બનાવી લીધી છે. તો બીજી તરફ સંવર્ધન મધરસન ઇન્ટરનેશનલ તેની પેટાકંપની દ્વારા શેનઝેન ઓટોક્રુઇસ ટેકનોલોજીમાં નિયંત્રણાત્મક હિસ્સો હસ્તગત કરવા જઈ રહી છે.
હેલ્થકેર ક્ષેત્રે મણિપાલ હેલ્થ એંટરપ્રાઇસેસે બેંગલુરુ સ્થિત કિન્ડર હોસ્પિટલની સંપત્તિઓને રૂ. ૧૩૦ કરોડમાં હસ્તગત કરવા સોદો કર્યો છે. આ ઉપરાંત, હાઇવે ઇન્ફ્રાસ્ટ્રક્ચર્સને NHAI તરફથી રૂ. ૮૦.૧૭ કરોડનો કન્ટ્રાક્ટ મળ્યો છે અને ડીસીએક્સ સિસ્ટમ્સ (DCX Systems) ને ગ્રાહકો પાસેથી રૂ. ૧૫.૧૯ કરોડના નવા ખરીદી ઓર્ડર પ્રાપ્ત થયા છે, જેમના શેર પર આજે રોકાણકારોની ખાસ નજર રહેશે.