જ્યારે ‘મંજુલિકા’થી થરથર કાંપતો હતો અક્ષય કુમારનો લાડલો: વિદ્યા બાલને વર્ષો જૂના રહસ્ય પરથી ઉંચક્યો પડદો
બોલિવૂડમાં કેટલીક ફિલ્મો એવી હોય છે જે દાયકાઓ પછી પણ ભૂલાતી નથી, અને ‘ભૂલ ભુલૈયા’ તેમાંથી એક છે. વિદ્યા બાલને આ ફિલ્મમાં જે રીતે ‘મંજુલિકા’નું રૌદ્ર સ્વરૂપ પડદા પર ઉતાર્યું હતું, તેણે માત્ર દર્શકોને જ નહીં, પણ તેના કો-સ્ટાર અક્ષય કુમારના પરિવારને પણ ચોંકાવી દીધા હતા. વિદ્યાએ તાજેતરમાં જ ખુલાસો કર્યો કે અક્ષયનો પુત્ર આરવ તેના મંજુલિકાના પાત્રથી એટલો બધો ડરી ગયો હતો કે વર્ષો સુધી તે વિદ્યાને જોઈને ગભરાઈ જતો હતો.
લોકો આજે પણ મને ‘મંજુલિકા’ તરીકે જ ઓળખે છે: વિદ્યા બાલન
વિદ્યા બાલને એક ઈન્ટરવ્યુમાં હસતા હસતા જણાવ્યું કે, “આ ખરેખર અદ્ભુત છે કે આજે પણ લોકો મારી પાસે આવે છે અને મારી એક્ટિંગના વખાણ કરે છે. ઘણા લોકો તો એવા છે જે મારું અસલી નામ પણ નથી જાણતા, તેઓ મને માત્ર ‘મંજુલિકા’ તરીકે જ ઓળખે છે.” આ સાંભળીને બાજુમાં બેઠેલા અક્ષય કુમારે પણ હસતા હસતા ટકોર કરી હતી કે, “મારો દીકરો આરવ પણ તને મંજુલિકા જ કહે છે!”
ટ્વિંકલ ખન્નાએ સંભળાવ્યો હતો આરવનો એ ડરામણો કિસ્સો
વિદ્યાએ આગળ વાત વધારતા કહ્યું કે, એકવાર અક્ષયની પત્ની ટ્વિંકલ ખન્નાએ તેને આરવ વિશે એક કિસ્સો સંભળાવ્યો હતો. ટ્વિંકલે કહ્યું હતું કે, “આરવ ઘરે ‘આમી જે તોમાર’ ગીત વગાડી રહ્યો હતો અને તેના પર ડાન્સ કરી રહ્યો હતો. ડાન્સ કરતા કરતા અચાનક તેને મંજુલિકાનો પેલો ડરામણો ચહેરો યાદ આવી ગયો અને તે ગીત અધવચ્ચે જ છોડીને દોડતો મારી પાસે આવી ગયો કારણ કે તે ખૂબ જ ડરી ગયો હતો.”
વિદ્યાએ ઉમેર્યું કે આરવ માત્ર તે સમયે જ નહીં, પણ ઘણા વર્ષો સુધી મંજુલિકાના પાત્રથી ફફડતો રહ્યો હતો. બાળપણમાં જોયેલી એ ફિલ્મ અને વિદ્યાનું એ પાવરફુલ પરફોર્મન્સ આરવના મનમાં એવું વસી ગયું હતું કે તે વિદ્યા બાલન અને મંજુલિકા વચ્ચેનો તફાવત સમજી શકતો નહોતો.
‘ભૂલ ભુલૈયા’ની ભવ્ય સફળતા અને સ્ટાર કાસ્ટ
પ્રિયદર્શન દ્વારા નિર્દેશિત ‘ભૂલ ભુલૈયા’માં અક્ષય કુમાર અને વિદ્યા બાલન ઉપરાંત શાઈની આહુજા, અમીષા પટેલ, પરેશ રાવલ, રાજપાલ યાદવ અને અસરાની જેવા દિગ્ગજ કલાકારો હતા. રાજપાલ યાદવનું ‘છોટા પંડિત’નું પાત્ર અને વિદ્યાનું ‘મંજુલિકા’નું નૃત્ય આજે પણ સોશિયલ મીડિયા પર મીમ્સના સ્વરૂપે વાયરલ રહે છે. આ ફિલ્મ એક સાયકોલોજીકલ થ્રિલર હતી જેણે કોમેડી અને હોરરનું બેજોડ મિશ્રણ પૂરું પાડ્યું હતું.
