T20 વર્લ્ડ કપ 2026: ઓસ્ટ્રેલિયાને મોટો ઝટકો, શક્તિશાળી ઓલરાઉન્ડર પ્રથમ મેચમાંથી બહાર
T20 World Cup 2026: ICC T20 વર્લ્ડ કપ 2026માં અત્યાર સુધી 10 મેચો રમાઈ ચૂકી છે, પરંતુ પાંચ વખતની વિશ્વ ચેમ્પિયન ઓસ્ટ્રેલિયા ટીમ હજી સુધી ટૂર્નામેન્ટમાં ઉતરી નથી. હવે ઓસ્ટ્રેલિયા પોતાની અભિયાનની શરૂઆત 11 ફેબ્રુઆરીએ આયરલેન્ડ સામે કરવાની છે. જોકે, આ મહત્વપૂર્ણ મેચ પહેલા જ કાંગારૂ ટીમને મોટો ફટકો પડ્યો છે.
ઓસ્ટ્રેલિયાનો સ્ટાર ઓલરાઉન્ડર અને ધમાકેદાર બેટ્સમેન ટિમ ડેવિડ ઈજાના કારણે પ્રથમ મેચમાંથી બહાર થયો છે. આ સમાચાર ઓસ્ટ્રેલિયન કેમ્પ માટે ચિંતાજનક માનવામાં આવી રહ્યા છે.
આયરલેન્ડ સામે ટિમ ડેવિડ નહીં રમે
ઓસ્ટ્રેલિયાના કેપ્ટન મિચેલ માર્શએ સત્તાવાર રીતે પુષ્ટિ કરી છે કે ટિમ ડેવિડ આયરલેન્ડ સામેની મેચમાં ઉપલબ્ધ નહીં હોય. ટિમ ડેવિડ હજી સુધી પોતાની હેમસ્ટ્રિંગ ઇજામાંથી સંપૂર્ણ રીતે સાજો થયો નથી.ટીમ મેનેજમેન્ટ કોઈ પણ પ્રકારનો જોખમ લેવા માગતું નથી. તેઓ ડેવિડને પૂરતો સમય આપવા માગે છે જેથી તે સંપૂર્ણ ફિટ બની શકે અને આગળની મેચોમાં ટીમ માટે મહત્વપૂર્ણ ભૂમિકા ભજવી શકે.
બોક્સિંગ ડે બાદથી મેદાન બહાર
ટિમ ડેવિડે બોક્સિંગ ડે બાદથી કોઈ મેચ રમી નથી. બિગ બેશ લીગ દરમિયાન હોબાર્ટ હરિકેન્સ માટે બેટિંગ કરતી વખતે તેઓ ઈજાગ્રસ્ત થયા હતા. ત્યારબાદ તેઓ સતત રિહેબિલિટેશન અને રિકવરી પ્રક્રિયામાં રહ્યા છે.
ગયા અઠવાડિયે ટિમ ડેવિડ શ્રીલંકામાં ઓસ્ટ્રેલિયન ટીમ સાથે જોડાયા હતા અને ત્યારથી તેમણે કડક ટ્રેનિંગ શરૂ કર્યું હતું. જોકે, ટીમના ફિઝિયો અને મેડિકલ સ્ટાફના મતે તેઓ હજી મેચ રમવા માટે સંપૂર્ણ રીતે તૈયાર નથી.
મેટ રેન્શોને મળી શકે છે તક
મેચ પૂર્વ પ્રેસ કોન્ફરન્સ દરમિયાન જ્યારે મિચેલ માર્શને ટિમ ડેવિડ અંગે પૂછવામાં આવ્યું, ત્યારે તેમણે કહ્યું:
“અમે તેમને આવતા કેટલાક મેચોમાં ફરી રમતા જોઈશું.”
માર્શે આયરલેન્ડ સામેની મેચ માટે પોતાની પ્લેઇંગ ઇલેવન જાહેર કરી નથી, પરંતુ એવું માનવામાં આવી રહ્યું છે કે જો ટિમ ડેવિડ બહાર રહેશે, તો મેટ રેન્શોને ટીમમાં સામેલ કરવામાં આવી શકે છે.મેટ રેન્શોએ અત્યાર સુધી માત્ર 3 T20 આંતરરાષ્ટ્રીય મેચો રમી છે, પરંતુ તેમને ઘરેલું ક્રિકેટ અને બિગ બેશ લીગનો સારો અનુભવ છે. આવી સ્થિતિમાં ટીમ મેનેજમેન્ટ તેમને તક આપી શકે છે.
નેથન એલિસ સંપૂર્ણ ફિટ, ઓસ્ટ્રેલિયાને રાહત
જ્યારે એક તરફ ટિમ ડેવિડના બહાર થવાથી ઓસ્ટ્રેલિયાને નુકસાન થયું છે, ત્યારે બીજી તરફ ટીમને એક સારા સમાચાર પણ મળ્યા છે. સ્ટાર ફાસ્ટ બોલર નેથન એલિસ હવે સંપૂર્ણ રીતે ફિટ છે અને આયરલેન્ડ સામેની મેચ માટે ઉપલબ્ધ રહેશે.
આ વર્લ્ડ કપમાં નેથન એલિસ પર ખાસ જવાબદારી રહેશે, કારણ કે મિચેલ સ્ટાર્ક, જોશ હેઝલવુડ અને પેટ કમિન્સ ત્રણેય આ ટૂર્નામેન્ટમાં હાજર નથી.
- હેઝલવુડ – એચિલીસ ઈજાના કારણે બહાર
- કમિન્સ – પીઠની ઈજાના કારણે બહાર
- સ્ટાર્ક – T20 આંતરરાષ્ટ્રીય ક્રિકેટમાંથી નિવૃત્તિ
આવી સ્થિતિમાં,2011 પછી પહેલી વાર એવું બનશે કે ઓસ્ટ્રેલિયા આ ત્રણેય દિગ્ગજ ફાસ્ટ બોલરો વિના T20 વર્લ્ડ કપ રમશે.
યુવા બોલરો પર રહેશે જવાબદારી
નેથન એલિસ સાથે આ વર્લ્ડ કપમાં ઝેવિયર બાર્ટલેટ અને બેન દ્વાર્શુઇસ ફાસ્ટ બોલિંગ વિભાગ સંભાળશે. આ યુવા બોલરો માટે પોતાને સાબિત કરવાની મોટી તક હશે.
