બેડમિન્ટનમાં યુગ પરિવર્તન: 21-પોઈન્ટનો નિયમ રદ, નવી 3×15 સિસ્ટમથી ભારતીય સ્ટાર્સ નારાજ
બેડમિન્ટન જગતમાં અત્યારે એક જ ચર્ચા છે અને તે છે સ્કોરિંગ સિસ્ટમમાં થયેલો ફેરફાર. બેડમિન્ટન વર્લ્ડ ફેડરેશન (BWF) એ ડેનમાર્કના હોર્સન્સમાં યોજાયેલી તેની વાર્ષિક સામાન્ય સભા (AGM) માં એક ઐતિહાસિક નિર્ણય લીધો છે. વર્ષોથી ચાલી આવતી ‘બેસ્ટ ઓફ થ્રી’ અને 21 પોઈન્ટની સિસ્ટમને હવે સ્થાને 3×15 સ્કોરિંગ સિસ્ટમ દાખલ કરવામાં આવશે. આ નિર્ણયને કારણે રમત ઝડપી બનશે, પરંતુ અનુભવી ખેલાડીઓમાં તેને લઈને ભારે અસંતોષ જોવા મળી રહ્યો છે.
શું છે નવી સ્કોરિંગ સિસ્ટમ?
અત્યાર સુધી બેડમિન્ટન મેચમાં એક સેટ 21 પોઈન્ટનો હતો અને ત્રણમાંથી જે ખેલાડી બે સેટ જીતે તેને વિજેતા જાહેર કરવામાં આવતો હતો. પરંતુ નવા નિયમ મુજબ:
હવે મેચ 15 પોઈન્ટના 3 સેટની રહેશે.
મેચ જીતવા માટે ખેલાડીએ 15 પોઈન્ટના ત્રણ સેટમાંથી બે સેટ જીતવા પડશે.
આનો અર્થ એ છે કે મેચનો સમય ઘટશે અને ખેલાડીઓએ શરૂઆતથી જ આક્રમક રમત રમવી પડશે.
BWF ના અધ્યક્ષ ખુનિંગ પટામા લીસ્વદત્રાકુલે આ ફેરફારને આવકારતા જણાવ્યું હતું કે, રમતને વધુ રોમાંચક બનાવવા અને નવી પેઢીના પ્રેક્ષકોને આકર્ષવા માટે આ ફેરફાર અનિવાર્ય હતો.
જાન્યુઆરી 2027 થી અમલીકરણ
આ નવી પોઈન્ટ સિસ્ટમ તાત્કાલિક લાગુ કરવામાં આવશે નહીં. BWF ના જણાવ્યા અનુસાર, આ પ્રસ્તાવ બે તૃતીયાંશ બહુમતી સાથે પસાર કરવામાં આવ્યો છે અને તે 4 જાન્યુઆરી થી સત્તાવાર રીતે લાગુ થશે. ખેલાડીઓને આ નવી પદ્ધતિ મુજબ પોતાની રમત અને ફિટનેસમાં ફેરફાર કરવા માટે પૂરતો સમય આપવામાં આવ્યો છે. જોકે, ટૂંકા સેટનો અર્થ એ છે કે ખેલાડી પાસે મેચમાં વાપસી (Comeback) કરવાનો સમય ખૂબ ઓછો રહેશે.
પીવી સિંધુ અને સાયના નહેવાલની આકરી પ્રતિક્રિયા
ભારતના બેડમિન્ટન સ્ટાર્સ અને ખાસ કરીને મહિલા સિંગલ્સમાં ભારતનું નામ રોશન કરનાર ખેલાડીઓએ આ નિર્ણય સામે નારાજગી વ્યક્ત કરી છે.
સાયના નહેવાલ: પૂર્વ વર્લ્ડ નંબર 1 સાયના નહેવાલે દુઃખ વ્યક્ત કરતા કહ્યું કે, “સુધારા કરવાની આંધળી દોટમાં રમતે પોતાની અસલ ઓળખ અને વાસ્તવિકતા ગુમાવી દીધી છે.” સાયનાના મતે લાંબી રેલીઓ અને ધૈર્યની કસોટી એ બેડમિન્ટનનો જીવ છે, જે આ ટૂંકી સિસ્ટમમાં કદાચ જોવા નહીં મળે.
પીવી સિંધુ: બે વખતની ઓલિમ્પિક મેડલ વિજેતા પીવી સિંધુએ પણ આ ફેરફાર પ્રત્યે અસંતોષ વ્યક્ત કર્યો છે. સિંધુ જેવા ખેલાડીઓ પોતાની સ્ટેમિના અને લાંબી ગેમ રમવાની ક્ષમતા માટે જાણીતા છે, નવી સિસ્ટમમાં તેમની આ તાકાત કદાચ ગૌણ બની જશે.
કોચ વિમલ કુમાર: પૂર્વ મુખ્ય કોચ વિમલ કુમારે પણ આ નિર્ણયને ખેલાડીઓ માટે પડકારજનક ગણાવ્યો છે.
The #BWF membership has voted to approve the adoption of the 3×15 scoring system.
Read more https://t.co/DkFphb3fgo#badminton pic.twitter.com/18o22irlHf
— BWF (@bwfmedia) April 25, 2026
રમત પર શું અસર પડશે?
નિષ્ણાતોનું માનવું છે કે 15 પોઈન્ટની સિસ્ટમથી મેચો ટૂંકી થશે, જે ટેલિવિઝન બ્રોડકાસ્ટર્સ માટે ફાયદાકારક છે કારણ કે મેચનો સમય નિશ્ચિત કરી શકાશે. જોકે, ખેલાડીઓ માટે:
ભૂલની કોઈ જગ્યા નહીં: 21 પોઈન્ટની ગેમમાં જો તમે શરૂઆતમાં પોઈન્ટ ગુમાવો તો વાપસીની તક રહેતી, પણ 15 પોઈન્ટમાં એક-બે ભૂલ પણ ભારે પડી શકે છે.
વ્યૂહરચનામાં બદલાવ: ખેલાડીઓએ હવે રક્ષણાત્મક રમતને બદલે શરૂઆતથી જ એટેકિંગ મોડમાં રહેવું પડશે.
સ્ટેમિના વિરુદ્ધ સ્પીડ: હવે રમત સહનશક્તિ (Endurance) ને બદલે ગતિ (Speed) અને ત્વરિત રિફ્લેક્સ પર વધુ નિર્ભર રહેશે.
