જંગલ, પહાડ કે કાદવ બધું જ થશે ફેઈલ! ભારતમાં લોન્ચ થવા જઈ રહી છે આ દમદાર ઓફ-રોડિંગ SUVs
ભારતીય બજારમાં છેલ્લા કેટલાક સમયથી ઓફ-રોડ એસયુવીની માંગમાં જબરદસ્ત ઉછાળો જોવા મળ્યો છે. સાહસના શોખીનો હવે એવી ગાડીઓ પસંદ કરી રહ્યા છે જે માત્ર રસ્તા પર જ નહીં, પણ પહાડો, જંગલો અને કાદવ ભરેલા રસ્તાઓ પર પણ સરળતાથી ચાલી શકે. ગ્રાહકોના આ ક્રેઝને જોતા ઘણી દિગ્ગજ ઓટોમોબાઈલ કંપનીઓ ભારતમાં નવા મોડલ લોન્ચ કરવાની તૈયારી કરી રહી છે. જેમાં એમજી મેજેસ્ટર, મહિન્દ્રા સ્કોર્પિયો-એન અને નવી જનરેશનની ટોયોટા ફોર્ચ્યુનર જેવા નામો મોખરે છે.
ઓફ-રોડિંગ માટે શા માટે છે આ ગાડીઓ ખાસ?
ભારતીય રસ્તાઓ અને ઓફ-રોડિંગની જરૂરિયાતને ધ્યાનમાં રાખીને આ ગાડીઓ મોટે ભાગે ‘લેડર-ફ્રેમ’ અથવા ‘બોડી-ઓન-ફ્રેમ’ ચેસિસ પર બનાવવામાં આવે છે. આ ટેકનોલોજી ગાડીને વધુ મજબૂતી આપે છે, જેના કારણે તે ઉબડ-ખાબડ રસ્તાઓ પર વધુ સારી પકડ અને ભાર વહન કરવાની ક્ષમતા પ્રદાન કરે છે. જો તમે પણ ઓફ-રોડિંગના શોખીન હોવ, તો આ વર્ષે લોન્ચ થનારા મોડલ્સ તમારા માટે શ્રેષ્ઠ સાબિત થઈ શકે છે.
એમજી મેજેસ્ટર (MG Majester)
એમજી મોટર્સે તાજેતરમાં જ ભારતની ધરતી પર તેની નવી એસયુવી ‘મેજેસ્ટર’ રજૂ કરી છે. આ ગાડીનું બુકિંગ શરૂ થઈ ગયું છે અને એપ્રિલ 2026માં તેની કિંમતોની જાહેરાત કરવામાં આવશે, જ્યારે ડિલિવરી મે મહિનાથી શરૂ થશે. આ એસયુવીમાં 2.0 લિટરનું ટ્વિન-ટર્બો ડીઝલ એન્જિન આપવામાં આવ્યું છે, જે 215 HP પાવર અને 478 Nm ટોર્ક જનરેટ કરે છે. તેમાં 10 ટેરેન મોડ્સ અને ‘એમ-ક્રોલ’ ફંક્શન જેવી સુવિધાઓ છે, જેનાથી તે 810 મીમી ઊંડા પાણીમાં પણ સરળતાથી ચાલી શકે છે.
મહિન્દ્રા સ્કોર્પિયો-એન અને સ્કોર્પિયો ક્લાસિક ફેસલિફ્ટ
મહિન્દ્રા તેની લોકપ્રિય સ્કોર્પિયો સીરીઝને નવો લુક આપવા જઈ રહી છે. આગામી મહિનાઓમાં સ્કોર્પિયો-એન અને સ્કોર્પિયો ક્લાસિકના ફેસલિફ્ટ મોડલ લોન્ચ થઈ શકે છે. આ અપડેટમાં નવી સ્ટાઈલ અને કેટલાક આધુનિક ફીચર્સ ઉમેરવામાં આવશે. 4WD (ફોર-વ્હીલ ડ્રાઈવ) સિસ્ટમ ખાસ કરીને ડીઝલ એન્જિન સાથે ઉપલબ્ધ રહેશે. આ ઉપરાંત, ડ્રાઈવિંગ અનુભવને બહેતર બનાવવા માટે તેમાં ‘ઝિપ’, ‘ઝેપ’ અને ‘ઝૂમ’ જેવા ત્રણ ડ્રાઈવ મોડ્સ પણ જોવા મળશે.
નવી જનરેશન ટોયોટા ફોર્ચ્યુનર
ટોયોટા ફોર્ચ્યુનર એ ભારતીય એસયુવી માર્કેટનો રાજા ગણાય છે. નવી પેઢીની ફોર્ચ્યુનરનું ગ્લોબલ લોન્ચિંગ 2026ના અંતમાં થવાનું છે, જે 2027ની શરૂઆતમાં ભારતીય રસ્તાઓ પર જોવા મળી શકે છે. આ નવી એસયુવી અપડેટેડ આઈએમવી (IMV) લેડર-ફ્રેમ ચેસિસ પર આધારિત હશે. તેનો લુક હિલક્સ પિકઅપ ટ્રક જેવો બોલ્ડ હશે અને તેમાં એડવાન્સ્ડ ડ્રાઈવર આસિસ્ટન્ટ સિસ્ટમ (ADAS) પણ મળી શકે છે. એન્જિનમાં કોઈ ફેરફાર વગર 2.7 લિટર પેટ્રોલ અને 2.8 લિટર ડીઝલના વિકલ્પો યથાવત રાખવામાં આવશે.
