માત્ર ₹5.65 લાખમાં 7-સીટર કાર: બેઝ મોડલમાં જ પ્રીમિયમ ફીચર્સ, નિસાન ‘Gravite’ નું બુકિંગ શરૂ
ભારતીય ઓટોમોબાઈલ માર્કેટમાં મધ્યમ વર્ગના પરિવારો માટે નિસાન ઈન્ડિયાએ એક શાનદાર ભેટ આપી છે. કંપનીએ તેની પ્રથમ સબ-4 મીટર 7-સીટર MPV Nissan Gravite સત્તાવાર રીતે લોન્ચ કરી છે. આ કારની સૌથી મોટી ખાસિયત તેની કિંમત છે, જે માત્ર ₹5.65 લાખ (એક્સ-શોરૂમ) થી શરૂ થાય છે. સામાન્ય રીતે બેઝ મોડલમાં ફીચર્સનો અભાવ હોય છે, પરંતુ નિસાને ગ્રેવાઈટના પાયાના વેરિઅન્ટમાં પણ સુરક્ષા અને સુવિધાના શ્રેષ્ઠ ફીચર્સ આપીને ગ્રાહકોને ચોંકાવી દીધા છે.
વેરિઅન્ટ્સ અને કિંમતનું ગણિત
નિસાન ગ્રેવાઈટને મુખ્યત્વે 5 વેરિઅન્ટમાં ઉતારવામાં આવી છે: વિસિયા (Visia), એસેન્ટા (Acenta), એન-કનેક્ટા (N-Connecta), ટેકના (Tekna) અને એક સ્પેશિયલ લિમિટેડ લોન્ચ એડિશન. નોંધનીય છે કે લોન્ચ એડિશન માત્ર પ્રથમ 1001 ગ્રાહકો માટે જ ઉપલબ્ધ રહેશે.
કયા વેરિઅન્ટમાં શું છે ખાસ?
૧. બેઝ મોડલ (Visia MT): આ વેરિઅન્ટ માત્ર મેન્યુઅલ ગિયરબોક્સ સાથે આવે છે. આશ્ચર્યજનક રીતે, આટલી ઓછી કિંમત હોવા છતાં તેમાં 6 એરબેગ્સ, પ્રોજેક્ટર હેડલેમ્પ, અને ESP (સ્ટેબિલિટી પ્રોગ્રામ) જેવા સેફ્ટી ફીચર્સ સ્ટાન્ડર્ડ આપવામાં આવ્યા છે. તે સિવાય ચારેય પાવર વિન્ડો, ડિજિટલ ક્લસ્ટર અને જરૂર પડે ત્યારે ત્રીજી લાઇનના સીટ હટાવી શકાય તેવી સુવિધા પણ મળે છે.
૨. એસેન્ટા (Acenta MT): જો તમે થોડું વધુ બજેટ ફાળવો તો એસેન્ટામાં તમને 8.0-ઇંચની ટચસ્ક્રીન ઇન્ફોટેનમેન્ટ સિસ્ટમ મળે છે જે વાયરલેસ ફોન મિરરિંગને સપોર્ટ કરે છે. સાથે જ સ્ટીયરિંગ પર ઓડિયો કંટ્રોલ અને પાછળની સીટો માટે રિયર એસી વેન્ટ્સની સુવિધા ઉમેરાય છે.
૩. એન-કનેક્ટા (N-Connecta MT/AMT): આ વેરિઅન્ટથી ઓટોમેટિક (AMT) ગિયરબોક્સનો વિકલ્પ શરૂ થાય છે. તેમાં રિયર વાઈપર, ડિફોગર, 50 કિલો વજન વહન કરી શકે તેવી રૂફ રેલ્સ અને રિવર્સ કેમેરા જેવા ફીચર્સ મળે છે. ઇન્ટિરિયરને પ્રીમિયમ લુક આપવા માટે બેજ અને બ્લેક ડ્યુઅલ ટોન ફિનિશિંગ આપવામાં આવ્યું છે.
૪. ટોપ મોડલ (Tekna MT/AMT): પ્રીમિયમ ફીચર્સના શોખીનો માટે ટેકના વેરિઅન્ટમાં LED હેડલાઇટ્સ, 7-ઇંચનું ડિજિટલ ડ્રાઇવર ડિસ્પ્લે, પુશ-બટન સ્ટાર્ટ અને ફ્રન્ટ પાર્કિંગ સેન્સર જેવા ફીચર્સ આપવામાં આવ્યા છે. તેમાં 15-ઇંચના ડ્યુઅલ ટોન વ્હીલ્સ પણ મળે છે.
લોન્ચ એડિશન
નિસાને જે લિમિટેડ એડિશન રજૂ કરી છે તે વૈભવી સુવિધાઓથી સજ્જ છે. તેમાં JBL સાઉન્ડ સિસ્ટમ, એમ્બિયન્ટ લાઇટિંગ, એર પ્યુરીફાયર અને ડ્યુઅલ ડેશકેમ જેવા લક્ઝરી ફીચર્સ મળશે. આ વેરિઅન્ટ તેની ખાસ બોડી ગ્રાફિક્સને કારણે રસ્તા પર અલગ જ તરી આવશે.
