Yamaha એ લોન્ચ કર્યું પહેલું ઇલેક્ટ્રિક સ્કૂટર, સિંગલ ચાર્જમાં ચાલશે 169 કિમી
મેક્સી સ્કૂટર માટે જાણીતી યામાહાએ ભારતીય બજારમાં પોતાનું પહેલું ઇલેક્ટ્રિક સ્કૂટર લોન્ચ કરી દીધું છે. આ સ્કૂટર સિંગલ ચાર્જમાં અંદાજે 169 કિમીની રેન્જ આપે છે.
ઇન્ડિયા યામાહાએ ભારતીય બજાર માટે પોતાનું પ્રથમ ઇલેક્ટ્રિક સ્કૂટર EC-06 લોન્ચ કરીને સત્તાવાર રીતે ઇલેક્ટ્રિક ટુ-વ્હીલર સેગમેન્ટમાં પ્રવેશ કર્યો છે. આ સ્કૂટરની કિંમત ₹1,67,600 (એક્સ-શોરૂમ) રાખવામાં આવી છે. શરૂઆતમાં તેને પસંદગીના શહેરોમાં યામાહાના ‘બ્લુ સ્ક્વેર’ પ્રીમિયમ ડીલરશીપ દ્વારા વેચવામાં આવશે. લોન્ચ સમયે આ સ્કૂટર માત્ર એક જ ‘બ્લુઈશ વ્હાઇટ’ (Bluish White) રંગમાં ઉપલબ્ધ થશે.
આ સ્કૂટરમાં ફિક્સ્ડ 4kWh બેટરી પેકની સાથે ઇન્ટિરિયર પરમેનન્ટ મેગ્નેટ સિંક્રોનસ મોટર (IPMSM) આપવામાં આવી છે. યામાહાના જણાવ્યા અનુસાર, આ સ્કૂટર 6.7 kW પાવર અને 26 Nm ટોર્ક જનરેટ કરે છે. તેની ટોપ સ્પીડ 79 કિમી/કલાક છે અને કંપનીનો દાવો છે કે તેની IDC રેન્જ 169 કિમી છે.
8 કલાકમાં થઈ જાય છે ચાર્જ
સ્કૂટરને ઘરના સામાન્ય પાવર સોકેટથી ચાર્જ કરી શકાય છે. તેને ફુલ ચાર્જ થવામાં લગભગ 8 કલાક લાગે છે. બેટરી પર 3 વર્ષ અથવા 30,000 કિમીની વોરંટી આપવામાં આવી છે. પર્યાવરણથી સુરક્ષા પર પણ ખાસ ધ્યાન આપવામાં આવ્યું છે. મોટર અને બેટરીને IP67 રેટિંગ મળ્યું છે, જ્યારે બાકીના ઇલેક્ટ્રોનિક પાર્ટ્સ IP65 રેટિંગ સાથે આવે છે.
ત્રણ રાઈડિંગ મોડ
આ સ્કૂટરમાં ત્રણ રાઈડિંગ મોડ – Eco, Standard અને Power આપવામાં આવ્યા છે. પાર્કિંગ અને સાંકડી જગ્યાઓમાં ઓછી સ્પીડ પર ચલાવવામાં મદદ માટે ‘રિવર્સ મોડ’ પણ આપવામાં આવ્યો છે. સસ્પેન્શન માટે આગળ ટેલિસ્કોપિક ફ્રન્ટ ફોર્ક્સ અને પાછળ રિયર કોઇલ સ્પ્રિંગ આપવામાં આવી છે, જેને શહેરના રસ્તાઓ મુજબ ટ્યુન કરવામાં આવી છે. બ્રેકિંગ માટે આગળ અને પાછળ બંને તરફ 200 mm ડિસ્ક બ્રેક્સ આપવામાં આવી છે, જેની સાથે કોમ્બી બ્રેક સિસ્ટમ (CBS) મળે છે. સ્કૂટરમાં કલર LCD ઇન્સ્ટ્રુમેન્ટ ક્લસ્ટર છે, જેમાં સ્પીડ, બેટરી સ્ટેટસ, રાઈડિંગ મોડ અને કનેક્ટેડ ફીચર્સની માહિતી મળે છે. LED હેડલેમ્પ અને ટેલલેમ્પ સ્ટાન્ડર્ડ છે.
24.5 લિટર અંડર-સીટ સ્ટોરેજ
EC-06 સ્કૂટર Yamaha Motor Connect R એપ દ્વારા સ્માર્ટફોન કનેક્ટિવિટીને પણ સપોર્ટ કરે છે, જેનાથી રિયલ-ટાઇમ વ્હીકલ ડેટા જોઈ શકાય છે. વપરાશમાં સરળતા માટે તેમાં 24.5 લિટરનું અંડર-સીટ સ્ટોરેજ આપવામાં આવ્યું છે, જેમાં હેલ્મેટ અથવા રોજિંદો સામાન રાખી શકાય છે.
