પૈસા બચાવો! CA વગર ઘરે બેઠા મેળવો GST નંબર, આ છે સ્ટેપ-બાય-સ્ટેપ પ્રોસેસ

GST નંબર માટે હજારો રૂપિયા ખર્ચવાની જરૂર નથી, સરકાર આપી રહી છે ફ્રી સર્વિસ!

શું તમે નવો વ્યવસાય (બિઝનેસ) શરૂ કરવા જઈ રહ્યા છો અથવા તમારા બિઝનેસનું ટર્નવર નક્કી કરેલી મર્યાદાને પાર કરી ગયું છે? જો હા, તો તમારા માટે જીએસટી એટલે કે ગુડ્સ એન્ડ સર્વિસ ટેક્સ (GST) રજીસ્ટ્રેશન કરાવવું અનિવાર્ય બની જાય છે. ઘણા લોકોમાં એવી ગેરસમજ હોય છે કે જીએસટી નંબર મેળવવા માટે સરકારી ઓફિસોના ધક્કા ખાવા પડે છે અથવા કોઈ ચાર્ટર્ડ એકાઉન્ટન્ટ (CA) કે ટેક્સ પ્રોફેશનલને 5,000 થી 10,000 રૂપિયા સુધીની ભારે ફી ચૂકવવી પડે છે.

જોકે, ભારત સરકારનું સત્તાવાર GST પોર્ટલ સંપૂર્ણપણે ડિજિટલ છે, જે તમને ફક્ત તમારા ફોન અથવા લેપટોપનો ઉપયોગ કરીને મફતમાં તમારી GST નોંધણી જાતે પૂર્ણ કરવાની મંજૂરી આપે છે. આ માટે તમારે કોઈને એક પણ રૂપિયો ચૂકવવાની જરૂર નથી. ચાલો સંપૂર્ણ સ્ટેપ-બાય-સ્ટેપ પ્રક્રિયા જોઈએ.

GST રજીસ્ટ્રેશન માટે જરૂરી દસ્તાવેજો

ઓનલાઈન અરજી કરતા પહેલા તમારી પાસે નીચે મુજબના ડોક્યુમેન્ટ્સ તૈયાર હોવા જોઈએ:

• બિઝનેસના માલિક, પાર્ટનર્સ અથવા કંપનીના ડિરેક્ટર્સનું પાન કાર્ડ અને ઓળખનો પુરાવો.

• બિઝનેસના સરનામા (પ્રિન્સિપલ પ્લેસ) ના પુરાવા તરીકે વીજળીનું બિલ, નવીનતમ પ્રોપર્ટી ટેક્સ રસીદ અથવા વેલિડ રેન્ટ એગ્રીમેન્ટ (ભાડા કરાર).

• બેંક ખાતાના પુરાવા તરીકે કેન્સલ ચેક, બેંક સ્ટેટમેન્ટ અથવા બેંક પાસબુકના પહેલા પાનાની કોપી.

• પ્રમોટર અથવા અધિકૃત હસ્તાક્ષરકર્તા (Authorized Signatory) નો પાસપોર્ટ સાઈઝ ફોટો અને ઓથોરાઈઝેશન લેટર.

ઓનલાઈન GST નોંધણી માટેના પગલાં

GST પોર્ટલ પર નોંધણી કરાવવાની સંપૂર્ણ પ્રક્રિયા ખૂબ જ સરળ છે, અને તમે નીચે આપેલા પગલાંને અનુસરીને તેને પૂર્ણ કરી શકો છો:

સ્ટેપ 1: ટેમ્પરરી રેફરન્સ નંબર (TRN) જનરેટ કરો

1. સૌથી પહેલા ભારત સરકારના અધિકૃત જીએસટી પોર્ટલ www.gst.gov.in પર જાઓ.

2. હોમપેજ પર આપેલા Services > Registration > New Registration વિકલ્પ પર ક્લિક કરો.

3. ત્યારબાદ Taxpayer પસંદ કરો અને તમારા પાન કાર્ડ પર દર્શાવેલું નામ, પાન નંબર, તમારું ચાલુ ઈમેલ આઈડી અને મોબાઈલ નંબર દાખલ કરો.

4. ત્યારબાદ તમારા મોબાઈલ નંબર અને ઈમેલ આઈડી પર અલગ-અલગ ઓટીપી (OTP) આવશે, જેને દાખલ કરીને વેરિફાઈ કરો.

5. જેવું વેરિફિકેશન પૂરું થશે, તમારી સામે 15 અંકનો એક ટેમ્પરરી રેફરન્સ નંબર (TRN) જનરેટ થઈ જશે, જેને નોટ કરી લો.

સ્ટેપ 2: મુખ્ય ફોર્મ ભરો અને દસ્તાવેજો અપલોડ કરો

1. હવે ફરીથી પોર્ટલ પર જાઓ, TRN વિકલ્પ પસંદ કરો અને તમારો TRN નંબર તથા કેપ્ચા કોડ ભરીને લોગિન કરો. તમારા નંબર પર ફરીથી એક ઓટીપી આવશે, જેથી લોગિન પ્રક્રિયા પૂરી થશે.

2. ત્યારબાદ My Saved Applications માં જાઓ અને ડ્રાફ્ટ ફોર્મના એક્શન આઈકન પર ક્લિક કરો.

3. અહીં તમારે તમારા બિઝનેસની પૂરી માહિતી, પ્રમોટર/પાર્ટનરની ડિટેલ, ઓથોરાઈઝ વેચાણ કરતા સામાન અથવા સેવાઓના HSN/SAC કોડ્સ ની માહિતી ભરવાની રહેશે.

4. બધા સેક્શન કાળજીપૂર્વક ભર્યા પછી માંગેલા જરૂરી દસ્તાવેજોને પીડીએફ (PDF) અથવા જેપીઈજી (JPEG) ફોર્મેટમાં અપલોડ કરી દો.

સ્ટેપ 3: આધાર ઓથેન્ટિકેશન અને વેરિફિકેશન પૂરું કરો

1. ફોર્મ ભરવાના અંતે આધાર ઓથેન્ટિકેશન (Aadhaar Authentication) ના વિકલ્પને પસંદ કરો.

2. આધાર સાથે લિંક મોબાઈલ નંબર પર ઓટીપી મંગાવીને ઓથેન્ટિકેશનની પ્રક્રિયા સફળતાપૂર્વક પૂરી કરો.

3. જો તમે આધાર ઓથેન્ટિકેશન પસંદ કરો છો, તો સામાન્ય રીતે કોઈપણ ફિઝિકલ વેરિફિકેશન વગર 7 થી 10 દિવસ ની અંદર જીએસટી નંબર ઇશ્યુ કરી દેવામાં આવે છે. (જો તમે આધાર વેરિફિકેશન પસંદ ન કરો, તો વિભાગ દ્વારા ફિઝિકલ વેરિફિકેશન કરવામાં આવી શકે છે જેમાં 30 દિવસ સુધીનો સમય લાગી શકે છે).

ARN ટ્રેકિંગ અને જીએસટી સર્ટિફિકેટ ડાઉનલોડ

ફોર્મ સબમિટ કર્યા પછી, તમારા રજિસ્ટર્ડ મોબાઇલ નંબર અને ઇમેઇલ પર એક એપ્લિકેશન રેફરન્સ નંબર (ARN) મોકલવામાં આવશે. તમે ‘ટ્રેક એપ્લિકેશન સ્ટેટસ’ વિકલ્પનો ઉપયોગ કરીને પોર્ટલ પર તમારી અરજીની સ્થિતિને ટ્રેક કરી શકો છો. એકવાર અરજી મંજૂર થઈ જાય, પછી તમને ઇમેઇલ દ્વારા તમારો 15-અંકનો GSTIN અને લોગિન પાસવર્ડ પ્રાપ્ત થશે, જેનાથી તમે પોર્ટલમાં લોગ ઇન કરી શકશો અને સરળતાથી તમારું સત્તાવાર GST નોંધણી પ્રમાણપત્ર ડાઉનલોડ કરી શકશો.