ટાટાની જોરદાર તૈયારી: જાણો ક્યારે આવશે Sierra EV, ક્રેટા ઈલેક્ટ્રિક સાથે થશે સીધી ટક્કર
ટાટા મોટર્સ ભારતીય ઈલેક્ટ્રિક વ્હીકલ (EV) માર્કેટમાં પોતાનો દબદબો જાળવી રાખવા માટે સતત નવા મોડલ્સ પર કામ કરી રહી છે. કંપનીની સૌથી વધુ રાહ જોવાતી આઈકોનિક SUV ‘ટાટા સિયેરા EV’ (Tata Sierra EV) ફરી એકવાર ચર્ચામાં છે. તાજેતરના મીડિયા રિપોર્ટ્સ અનુસાર, ટાટા મોટર્સ આ ઈલેક્ટ્રિક SUVને અગાઉના નિર્ધારિત સમય કરતા વહેલી, એટલે કે મે 2026 માં લોન્ચ કરવાની યોજના બનાવી રહી છે. અગાઉ એવી ચર્ચા હતી કે તે 2027 ની શરૂઆતમાં આવશે, પરંતુ હવે કંપની તેની લોન્ચિંગ ઝડપી બનાવી રહી છે.
2026 માં ટાટાનો ટ્રિપલ ધડાકો
વર્ષ 2026 ટાટા મોટર્સ માટે ખૂબ જ મહત્વનું સાબિત થવાનું છે. કંપની આ વર્ષે ત્રણ મુખ્ય ઈલેક્ટ્રિક ગાડીઓ બજારમાં ઉતારવાની તૈયારીમાં છે. જેમાં Sierra EV ઉપરાંત, લોકપ્રિય Tata Tiago EV નું ફેસલિફ્ટ વર્ઝન અને સંપૂર્ણપણે નવા પ્લેટફોર્મ પર આધારિત Tata Avinya નો સમાવેશ થાય છે. આ ત્રણેય કાર દ્વારા ટાટા મોટર્સ ઈલેક્ટ્રિક કાર સેગમેન્ટમાં પોતાની પકડ વધુ મજબૂત કરવા માંગે છે.
બેટરી પેક અને દમદાર રેન્જ
ટાટા સિયેરા EV માં ગ્રાહકોને બે અલગ-અલગ બેટરી ઓપ્શન મળી શકે છે:
- 55kWh બેટરી પેક: આ બેટરી ટાટા કર્વ EV માંથી લેવામાં આવી શકે છે, જે આશરે 502 કિમી ની રેન્જ અને 167 PS નો પાવર જનરેટ કરશે.
- 65kWh બેટરી પેક: આ હાઈ-કેપેસિટી બેટરી ટાટા હેરિયર EV માંથી લેવામાં આવી શકે છે, જે સિંગલ ચાર્જ પર અંદાજે 538 કિમી ની શાનદાર રેન્જ આપી શકે છે. તેમાં 238 PS પાવર અને 315 Nm ટોર્ક મળવાની અપેક્ષા છે.
ડિઝાઇન અને ફીચર્સ
સિયેરા EV ની ડિઝાઇન આધુનિક અને ફ્યુચરિસ્ટિક હશે. કંપનીએ જાહેર કરેલા ટીઝર મુજબ, તેમાં ઊંચું બોનટ, ફ્લેટ ફ્રન્ટ બમ્પર, એરોડાયનેમિક એલોય વ્હીલ્સ અને પાછળના ભાગમાં કનેક્ટેડ LED લાઈટ બાર જોવા મળશે. તેની સૌથી મોટી ખાસિયત પાછળના ભાગમાં મોટો ગ્લાસ એરિયા હશે, જે જૂની સિયેરાની યાદ અપાવશે. આ કારનું ઉત્પાદન ગુજરાતના સાણંદ પ્લાન્ટમાં કરવામાં આવશે.
કિંમત અને હરીફાઈ
ટાટા સિયેરા EV ની શરૂઆતી કિંમત અંદાજે 20 લાખ રૂપિયા (એક્સ-શોરૂમ) હોઈ શકે છે. લોન્ચ થયા પછી તેની સીધી ટક્કર Hyundai Creta Electric, Maruti e Vitara, Mahindra BE 6 અને Toyota eBella જેવી અપકમિંગ ઈલેક્ટ્રિક SUV સાથે થશે. 500 કિમીથી વધુની રેન્જ અને પ્રીમિયમ લુક સાથે સિયેરા EV મધ્યમ વર્ગના ગ્રાહકો માટે એક આકર્ષક વિકલ્પ બની રહેશે.
