ઉત્તરાયણ માં દોરીથી ગળું કપાતા બચાવવું હોય તો આ ઉપાય કરો

ઊત્તરાયણનો તહેવાર ધીરે ધીરે નજીક આવી રહ્યો છે. અને લોકોની જેમ તમે પણ પતંગ-દોરા ખરીદવાનું પ્લાનિંગ બનાવી લીધું હશે. પરંતુ આ તહેવાર નજીક આવતા જ એવા પણ સમાચાર સંભાળવા મળે છે કે અચાનક જ કોઈ પતંગનો દોર ગળામાં આવ્યો અને વ્યક્તિ પોતાનું જીવન ગુમાવી બેઠી.તો ચાલો આજે અમે તમને જણાવીશું કે કેવી રીતે આ સમસ્યાથી બચી શકાય.

દોરો ગળામાં આવતા મરે છે અનેક લોકો:

આમ તો ઘણી મજા આવે છે જયારે ખૂબ મજબૂત આવતા દોરાથી પતંગ ઉડાડવાની, કેમ કે અનેક લોકોના પતંગ કાપી શકાય. પરંતુ આ દોરો ઘણીવાર પતંગની સાથે કોઈ પરિવારનો આધાર કે ચીરાગને પણ જીંદગીથી કાપી નાખે છે. તાજેતરમાં જ અમદાવાદમાં એક દિવસ પહેલા ચાઇનીઝ દોરાથી ગળું કપાઈ જતા 22 વર્ષીય યુવકનું મોત બન્યાનો બનાવ બન્યો છે.

પ્રતિબંધ છે છતા લોકો ખરીદે છે:

ચાઇનીઝ દોરા અને તુક્કલ પર સરકારે પ્રતિબંધ જાહેર કર્યો છે તેમ છતા કેટલાક લોકો કાયદાની વિરુદ્ધ દોરા ખરીદીને તેનાથી પતંગ ઉડાવતા હોય છે. તેવામાં જો કોઈ વાહન ચાલક આ જીવલેણ દોરામાં ફસાય તો ગંભીર અકસ્માત સર્જાય છે. માટે એક વાતની આજે જ મનમાં ગાંઠ વાળી લો. કે ચાઇનીઝ દોરાથી આ વખતે તમે જ નહીં તમારા ઓળખીતાઓ-પાળખીતાઓને પણ પતંગ ઉડાડવા નહીં દો.

જીવલેણ દોરીથી આવી રીતે બચો:

  • વાહન ચલાવો તો પૂરતી સુરક્ષા રાખો.
  • ગળે મફલર કે રૂમાલ વીંટાળો.
  • યુવતીઓ માટે આવા દિવસોમાં દુપટ્ટા આર્શીવાદરૂપ બની જતા હોય છે. ત્યારે પુરુષોએ પણ ગળાને જાડો રુમાલ અથવા મફલર બાંધીને જ વાહન ચલાવવું જોઇએ.
  • ગળુ અને નાક બિલકુલ ખુલ્લુ ન રાખો.
  • બને ત્યા સુધી આખુ મોઢુ ઢાંકીને નીકળવું.
  • ટુ-વ્હીલર પર નાના બાળકને આગળ ઉભુ રાખવાની ભૂલ ના કરશો. તેમનું પણ મોઢુ અને ગળુ ઢાંકીને બેસાડો.

આટલું જરુર ધ્યાન રાખો:

  • શહેરના જુદા જુદા બ્રિજ પરથી પસાર થતાં ખાસ સાવચેતી રાખો.
  • સામાન્ય રીતે બ્રિજની ઉંચાઈ અગાશીઓની સમાન હોવાથી બ્રિજ પાસેથી દોરા પસાર થવાની પૂરેપૂરી શક્યતાઓ હોય છે. તેથી બ્રિજ પર ગાડી ધીમે ધીમે જ હંકારો.
  • આ દિવસોમાં શહેરમાં વાહનની સ્પીડ બને એટલી ઓછી રાખો.
  • ઝડપી વાહનમાં જો દોરો પાસેથી પસાર થાય તો તે વધુ જીવલેણ સાબિત થઈ શકે છે.

Join the discussion

Your email address will not be published. Required fields are marked *