વધારે માઇલેજ જોઈએ છે? 150 થી 200 CC સેગમેન્ટમાં આ 5 બાઇક્સ છે સૌથી શ્રેષ્ઠ વિકલ્પ
ભારત વિશ્વનું સૌથી મોટું ટુ-વ્હીલર માર્કેટ ગણાય છે. વર્ષ 2025માં દેશમાં ટુ-વ્હીલરનું વેચાણ 2 કરોડ યુનિટને પાર કરી ગયું છે, જે વાર્ષિક ધોરણે લગભગ 7-8% નો વધારો દર્શાવે છે. અગાઉ ભારતીય બજારમાં માત્ર માઇલેજ પર જ ધ્યાન આપવામાં આવતું હતું, પરંતુ હવે ગ્રાહકો પ્રીમિયમ ડિઝાઇન, આરામદાયક રાઇડિંગ અને એડવાન્સ ટેકનોલોજીને પણ પ્રાધાન્ય આપી રહ્યા છે. તેમ છતાં, માઇલેજ આજે પણ ભારતીય ખરીદદારો માટે સૌથી મોટું પરિબળ છે.
જો તમે 150 થી 200 CC ની વચ્ચે શક્તિશાળી એન્જિન અને શાનદાર માઇલેજ આપતી બાઇક શોધી રહ્યા છો, તો આ પાંચ મોડલ તમારા માટે બેસ્ટ સાબિત થઈ શકે છે.
1. TVS Apache RTR 160
TVS ની આ બાઇક RTR 160 2V અને 4V એમ બે વર્ઝનમાં ઉપલબ્ધ છે. જેમાં RTR 160 2V મોડલ સૌથી વધુ કિફાયતી માનવામાં આવે છે. કંપનીનો દાવો છે કે આ બાઇક 61 કિમી પ્રતિ લિટર સુધીની માઇલેજ આપી શકે છે. જેમને સ્પોર્ટી લૂકની સાથે રેસિંગ સ્ટાઇલ રાઇડિંગ અને સારી માઇલેજ જોઈએ છે, તેમના માટે આ એક ઉત્તમ પસંદગી છે.
2. Bajaj Pulsar NS160
બજાજ પલ્સરનું આ મોડલ તેના સ્પોર્ટી ડિઝાઇન અને પાવરફુલ પરફોર્મન્સ માટે જાણીતું છે. તેમાં 160.3 CC નું ઓઇલ-કૂલ્ડ એન્જિન છે, જે 17.03 BHP નો પાવર જનરેટ કરે છે. આ બાઇક આશરે 52 કિમી પ્રતિ લિટરની માઇલેજ આપે છે, જે શહેરના ટ્રાફિક અને હાઇવે એમ બંને જગ્યાએ ચલાવવા માટે અનુકૂળ છે.
3. Bajaj Pulsar N160
બજાજની અન્ય એક લોકપ્રિય બાઇક Pulsar N160 પણ આ યાદીમાં સામેલ છે. તે આધુનિક ડિઝાઇન અને એડવાન્સ ફીચર્સથી સજ્જ છે. આ બાઇક લગભગ 51 કિમી પ્રતિ લિટરની માઇલેજ આપવાનો દાવો કરે છે. યુવાનોમાં તેની સ્ટાઇલ અને કિફાયતી કિંમતને કારણે તે ખૂબ જ લોકપ્રિય બની છે.
4. Yamaha R15 V4
યામહા R15 V4 તેના ટ્રેક-ઇન્સ્પાયર્ડ સ્પોર્ટ્સ લૂક માટે જાણીતી છે. આ બાઇકમાં ખાસ ‘સ્માર્ટ હાઇબ્રિડ ટેકનોલોજી’ આપવામાં આવી છે, જે એક્સિલરેશન વખતે એન્જિનને મદદ કરે છે અને બળતણનો વપરાશ ઘટાડે છે. ટેકનોલોજીના કારણે આ સ્પોર્ટ્સ બાઇક પણ 50 કિમી પ્રતિ લિટરથી વધુની માઇલેજ આપવામાં સક્ષમ છે.
5. Honda Unicorn
હોન્ડા યુનિકોર્ન વર્ષોથી ભારતીય રસ્તાઓ પર ભરોસાપાત્ર બાઇક તરીકે ઓળખાય છે. તેમાં 162.7 CC નું એન્જિન છે જે સ્મૂધ પરફોર્મન્સ માટે જાણીતું છે. જે લોકો રોજિંદા કામ માટે લાંબુ અંતર કાપતા હોય, તેમના માટે આ બાઇક 50 કિમી પ્રતિ લિટરની માઇલેજ સાથે શ્રેષ્ઠ વિકલ્પ છે.
