IPL 2026: આ 5 ભારતીય ખેલાડીઓ માટે સીઝન રહેશે નિર્ણાયક, ટીમ ઇન્ડિયાના દરવાજા ખુલી શકે છે
ઇન્ડિયન પ્રીમિયર લીગ (IPL) ની 19મી સીઝનનો પ્રારંભ 28 માર્ચથી થવા જઈ રહ્યો છે. આ વખતે પ્રથમ મુકાબલો ડિફેન્ડિંગ ચેમ્પિયન રોયલ ચેલેન્જર્સ બેંગલુરુ અને સનરાઈઝર્સ હૈદરાબાદ વચ્ચે બેંગલુરુના એમ. ચિન્નાસ્વામી સ્ટેડિયમમાં રમાશે. આ સીઝન ઘણા યુવા ભારતીય ખેલાડીઓ માટે માત્ર એક ટુર્નામેન્ટ નથી, પરંતુ ભારતીય રાષ્ટ્રીય ટીમમાં પ્રવેશ મેળવવાની સુવર્ણ તક છે. ચાલો જાણીએ એવા 5 ખેલાડીઓ વિશે જેમના પર પસંદગીકારોની ખાસ નજર રહેશે.
1. આકિબ નબી ડાર (દિલ્હી કેપિટલ્સ)
જમ્મુ-કાશ્મીર ક્રિકેટના ઈતિહાસમાં રણજી ટ્રોફી જીતવામાં મહત્ત્વની ભૂમિકા ભજવનાર 29 વર્ષીય ફાસ્ટ બોલર આકિબ નબી ડાર અત્યારે ચર્ચામાં છે. રણજી ટ્રોફી 2025-26માં તેણે માત્ર 10 મેચમાં 12.72ની શાનદાર એવરેજથી 60 વિકેટ ઝડપી હતી. આ પ્રદર્શનને કારણે જ આઈપીએલ ઓક્શનમાં દિલ્હી કેપિટલ્સે તેને 8.4 કરોડ રૂપિયાની મોટી રકમ ખર્ચીને પોતાની ટીમમાં સામેલ કર્યો છે. આકિબ માટે આ આઈપીએલ તેની આંતરરાષ્ટ્રીય કારકિર્દીનો પાયો બની શકે છે.
2. અશોક શર્મા (ગુજરાત ટાઇટન્સ)
રાજસ્થાનના 23 વર્ષીય ફાસ્ટ બોલર અશોક શર્મા આ વખતે ગુજરાત ટાઇટન્સ તરફથી રમતા જોવા મળશે. સૈયદ મુશ્તાક અલી ટ્રોફી 2025માં 22 વિકેટ ઝડપીને તે સંયુક્ત રીતે ટોપ વિકેટ ટેકર રહ્યો હતો. અગાઉ તે રાજસ્થાન રોયલ્સનો ભાગ હતો પણ તેને રમવાની તક મળી ન હતી. જોકે, આ સીઝનમાં તેના ફોર્મને જોતા તે ગુજરાત માટે ડેબ્યૂ કરી શકે છે અને જો તે સફળ રહ્યો તો ટીમ ઇન્ડિયાના ફાસ્ટ બોલિંગ યુનિટમાં સ્થાન મેળવી શકે છે.
3. જીશાન અન્સારી (સનરાઈઝર્સ હૈદરાબાદ)
સનરાઈઝર્સ હૈદરાબાદના લેગ સ્પિનર જીશાન અન્સારી માટે આ સીઝન ‘કરો અથવા મરો’ જેવી સાબિત થઈ શકે છે. 2016ના અંડર-19 વર્લ્ડ કપનો આ સ્ટાર ખેલાડી ગયા વર્ષે ખાસ પ્રભાવ પાડી શક્યો નહોતો. પરંતુ યુપી માટે ડોમેસ્ટિક ક્રિકેટમાં તેણે જે રીતે વાપસી કરી છે, તે જોતા હૈદરાબાદની ટીમ તેના પર ભરોસો મૂકી રહી છે. સ્પિન બોલિંગમાં વિવિધતાના અભાવ વચ્ચે જીશાન જો સારી સ્પિન કરી શકે તો તે પસંદગીકારોના રડારમાં આવી શકે છે.
4. વિહાન મલ્હોત્રા (રોયલ ચેલેન્જર્સ બેંગલુરુ)
પંજાબનો 19 વર્ષીય ઓલરાઉન્ડર વિહાન મલ્હોત્રા તાજેતરમાં અંડર-19 વર્લ્ડ કપ 2026 જીતનાર ભારતીય ટીમનો મહત્વનો સભ્ય રહ્યો છે. બેટ અને બોલ બંને વડે મેચ જીતાડવાની ક્ષમતા ધરાવતા વિહાનને આરસીબીએ 30 લાખના બેઝ પ્રાઈઝ પર ખરીદ્યો છે. જો તેને પ્લેઈંગ-11 માં તક મળે છે, તો તેની પાસે રવીન્દ્ર જાડેજા કે હાર્દિક પંડ્યા જેવા ઓલરાઉન્ડરની હરોળમાં પહોંચવાની તક રહેશે.
5. વૈભવ સૂર્યવંશી (રાજસ્થાન રોયલ્સ)
માત્ર 15 વર્ષની ઉંમરે આઈપીએલમાં હલચલ મચાવનાર વૈભવ સૂર્યવંશી આ સીઝનનો સૌથી મોટો આકર્ષણ રહેશે. ગયા વર્ષે 7 મેચોમાં શાનદાર સદી અને અડધી સદી ફટકારીને તેણે પોતાની આક્રમક બેટિંગનો પરિચય આપ્યો હતો. હવે જ્યારે તમામ ટીમો તેની વિરુદ્ધ ખાસ વ્યૂહરચના સાથે ઉતરશે, ત્યારે તે દબાણની સ્થિતિમાં કેવું પ્રદર્શન કરે છે તે જોવું રસપ્રદ રહેશે. જો તે આ વખતે પણ રનનો વરસાદ કરે છે, તો ટીમ ઇન્ડિયામાં તેના પ્રવેશની અટકળો વધુ તેજ બનશે.
