તમારી ચેટ હવે રહેશે સાત તાળામાં બંધ! જાણો વોટ્સએપનું નવું Incognito Chat ફીચર કેવી રીતે કામ કરે છે
મેટા (Meta) કંપનીએ તાજેતરમાં વોટ્સએપ (WhatsApp) માટે એક અત્યંત મહત્વનું પ્રાઇવસી ફીચર રજૂ કર્યું છે, જે યુઝર્સના અનુભવને એક નવા સ્તરે લઈ જશે. કંપનીએ તેનું નવું ‘Incognito Chat’ ફીચર લોન્ચ કર્યું છે, જેના દ્વારા યુઝર્સ હવે Meta AI સાથે કરવામાં આવતી વાતચીતને સંપૂર્ણપણે ખાનગી રાખી શકશે. આ ફીચર ખાસ કરીને એવા લોકો માટે ડિઝાઈન કરવામાં આવ્યું છે જેઓ પોતાની પર્સનલ વાતો કે ક્વેરીઝ માટે AI ચેટબોટનો ઉપયોગ કરે છે.
Incognito Chat: હવે Meta AI સાથેની વાતો રહેશે ગુપ્ત
વોટ્સએપના સત્તાવાર બ્લોગ પોસ્ટ મુજબ, કંપનીએ દસ વર્ષ પહેલા એન્ડ-ટુ-એન્ડ એન્ક્રિપ્શન રજૂ કરીને ચેટિંગની દુનિયામાં ક્રાંતિ લાવી હતી. હવે આ જ સ્તરની સુરક્ષા Meta AI સાથેની ચેટ્સમાં પણ લાવવામાં આવી છે. આ નવું ‘ઇનકોગ્નિટો ચેટ’ ફીચર મેટાની એડવાન્સ ‘પ્રાઇવેટ પ્રોસેસિંગ ટેકનોલોજી’ પર આધારિત છે. આનો સીધો અર્થ એ છે કે જ્યારે તમે આ મોડમાં AI સાથે વાત કરો છો, ત્યારે તમારી વાતચીત ડિજિટલ પડદા પાછળ રહે છે.
ચેટ સેવ નહીં થાય અને આપમેળે ગાયબ થઈ જશે
આ ફીચરની સૌથી મોટી ખાસિયત એ છે કે તેમાં કરવામાં આવેલી કોઈ પણ વાતચીત કાયમી ધોરણે સેવ થતી નથી. સામાન્ય રીતે અન્ય એપ્સમાં જ્યારે આપણે AI સાથે વાત કરીએ છીએ, ત્યારે કંપનીઓ તે ડેટાનો ઉપયોગ AI ને તાલીમ આપવા માટે કરતી હોય છે. પરંતુ વોટ્સએપના આ ઇનકોગ્નિટો મોડમાં:
-
તમારી વાતચીત ટેમ્પરરી (કામચલાઉ) હશે.
-
મેસેજ વાંચ્યા પછી અથવા સેશન પૂરું થયા પછી તે ડિફોલ્ટ રૂપે ગાયબ થઈ જશે.
-
યુઝર સિવાય અન્ય કોઈ પણ વ્યક્તિ આ ચેટ જોઈ શકશે નહીં.
મેટા પણ તમારી વાતો વાંચી શકશે નહીં
કંપનીએ દાવો કર્યો છે કે આ ફીચર એટલું સુરક્ષિત છે કે યુઝર અને AI વચ્ચે શું વાત થઈ છે તે મેટા પોતે પણ જાણી શકશે નહીં. બ્લોગ પોસ્ટમાં જણાવાયું છે કે અન્ય ઘણી એપ્સ ઇનકોગ્નિટો સ્ટાઈલ મોડ ઓફર કરે છે, પરંતુ પડદા પાછળ તેઓ સવાલો અને જવાબો પર નજર રાખી શકે છે. જોકે, Meta AI ની આ ઇનકોગ્નિટો ચેટ સંપૂર્ણપણે પ્રાઇવેટ છે, જે યુઝર્સને નિશ્ચિંત થઈને સવાલો પૂછવાની આઝાદી આપે છે.
આગામી સમયમાં આવશે ‘સાઈડ ચેટ’ ફીચર
વોટ્સએપે માત્ર આટલેથી જ અટકવાનું નક્કી નથી કર્યું. કંપનીએ જાહેરાત કરી છે કે આગામી મહિનાઓમાં તે ‘સાઇડ ચેટ’ (Side Chat) ફીચર પણ રજૂ કરશે. આ ફીચર પણ પ્રાઇવેટ પ્રોસેસિંગ ટેકનોલોજીથી સુરક્ષિત હશે, જે યુઝર્સને મુખ્ય ચેટ લિસ્ટથી અલગ રહીને વાતચીત કરવાની સુવિધા આપશે. હાલમાં, ઇનકોગ્નિટો ચેટ ફીચર તબક્કાવાર રીતે રોલ આઉટ કરવાનું શરૂ કરી દેવામાં આવ્યું છે.
