મુકેશ અંબાણીની મોટી જાહેરાત: ‘વિશ્વ જોશે કે ભારત વૈશ્વિક સ્તરની ટેકનોલોજી કંપનીઓ બનાવી શકે છે’
ભારતીય શેરબજારના ઇતિહાસમાં અત્યાર સુધીનો સૌથી મોટો ધમાકો થવા જઈ રહ્યો છે. દેશની અગ્રણી ટેલિકોમ અને ડિજિટલ સર્વિસ કંપની રિલાયન્સ જિયો પ્લેટફોર્મ્સ તેનો મેગા આઈપીઓ (IPO) લાવવાની તૈયારી કરી ચૂકી છે. આશરે ૫૨ કરોડથી વધુ સબ્સ્ક્રાઇબર્સ ધરાવતી આ કંપનીએ બજાર નિયમનકાર સેબી (SEBI) સમક્ષ પોતાનો ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કરી દીધો છે. અંદાજે ₹૩૫,૦૦૦ કરોડથી ₹૪૦,૦૦૦ કરોડની વચ્ચેના કદ ધરાવતો આ આઈપીઓ ભારતીય કેપિટલ માર્કેટના તમામ જૂના રેકોર્ડ તોડી નાખશે. આ અગાઉ ઓક્ટોબર ૨૦૨૪માં આવેલો હ્યુન્ડાઇ મોટર ઇન્ડિયાનો ₹૨૭,૮૫૯ કરોડનો આઈપીઓ દેશનો સૌથી મોટો આઈપીઓ હતો, પરંતુ જિયો તેને ઘણા મોટા માર્જિનથી પાછળ છોડી દેશે.
૧૯ જૂન ૨૦૨૬ ના રોજ રિલાયન્સ ઇન્ડસ્ટ્રીઝની વાર્ષિક સામાન્ય સભા (AGM) દરમિયાન ચેરમેન મુકેશ અંબાણીએ દેશ અને દુનિયાના રોકાણકારો સામે એક ભવ્ય વિઝન રજૂ કર્યું હતું. તેમણે ગર્વપૂર્વક જણાવ્યું હતું કે, “જિયોનું પ્રસ્તાવિત લિસ્ટિંગ વિશ્વને બતાવશે કે ભારત વૈશ્વિક સ્તરે, વૈશ્વિક ક્ષમતા અને વૈશ્વિક મૂલ્યની ટેકનોલોજી કંપનીઓ બનાવવાની તાકાત ધરાવે છે.” કંપની આ આઈપીઓ દ્વારા બજારમાં આશરે ૨૭ કરોડ (૨૭૦ મિલિયન) નવા ઇક્વિટી શેર જાહેર જનતા માટે જારી કરીને અંદાજે $૪ બિલિયનથી વધુ એટલે કે ₹૪૨,૦૦૦ કરોડ સુધીનું ભંડોળ એકત્ર કરવાનું લક્ષ્ય ધરાવે છે.
ક્યારે ખુલશે રોકાણની તક?
કંપનીએ ૧૯ જૂના રોજ સેબી સમક્ષ સત્તાવાર કાગળો સબમિટ કરી દીધા છે. હાલમાં નિયમનકાર સેબી જિયો પ્લેટફોર્મ્સ દ્વારા સબમિટ કરાયેલા દસ્તાવેજો અને નાણાકીય વિગતોની બારીકાઈથી સમીક્ષા કરશે. જો બધી મંજૂરીઓ સમયસર મળી જશે, તો બજારના વિશ્લેષકોના મતે આ આઈપીઓ ઓગસ્ટ ૨૦૨૬ ના છેલ્લા અઠવાડિયામાં અથવા ઓક્ટોબર-નવેમ્બર દરમિયાન આવતી તહેવારોની મોસમ (દિવાળી આસપાસ) માં રિટેલ રોકાણકારો માટે ખુલ્લો મૂકવામાં આવી શકે છે.
અંદાજિત કિંમત અને રોકાણકારો માટે શું છે ખાસ?
સેબીની લીલી ઝંડી મળ્યા બાદ બુક-બિલ્ડિંગ પ્રક્રિયા શરૂ થશે અને ત્યારે જ સત્તાવાર પ્રાઇસ બેન્ડ જાહેર કરાશે. આમ છતાં, ગ્રે માર્કેટ અને મોટા બ્રોકરેજ હાઉસના અહેવાલો મુજબ, આ શેરની બેઝ પ્રાઇસ પ્રતિ શેર ₹૪૨૫ કે તેથી વધુ હોવાની પ્રબળ સંભાવના છે. કંપની પ્રાઇસ બેન્ડની સાથે નાના રોકાણકારો માટે લઘુત્તમ લોટ સાઈઝની પણ જાહેરાત કરશે, જેથી સામાન્ય નાગરિકો પણ રિલાયન્સના આ ડિજિટલ ગ્રોથમાં ભાગીદાર બની શકે.
એકત્ર થયેલા ભંડોળનો ક્યાં ઉપયોગ થશે?
રિલાયન્સ જિયો પ્લેટફોર્મ્સ આ આઈપીઓ દ્વારા મળનારી જંગી રકમનો ખૂબ જ વ્યૂહાત્મક ઉપયોગ કરવાનું આયોજન ધરાવે છે. કુલ ભંડોળમાંથી અંદાજે ₹૨૭,૫૦૦ કરોડનો મોટો હિસ્સો રિલાયન્સ જિયો ઇન્ફોકોમના વર્તમાન દેવાની સંપૂર્ણ કે આંશિક ચુકવણી કરવા માટે વાપરવામાં આવશે, જેથી કંપની વધુ નાણાકીય સદ્ધરતા મેળવી શકે. આ ઉપરાંત, બાકી બચેલી રકમનો મોટો હિસ્સો ભવિષ્યની ટેકનોલોજી એટલે કે આર્ટિફિશિયલ ઇન્ટેલિજન્સ (AI) ના સંશોધન અને દેશભરમાં મજબૂત એઆઈ ઇન્ફ્રાસ્ટ્રક્ચર ઊભું કરવા માટે રિઝર્વ રાખવામાં આવશે.
આગામી દિવસોમાં આ આઈપીઓ શેરબજારના ઇન્ડેક્સ અને માર્કેટ સેન્ટિમેન્ટને નવી દિશા આપશે તે નક્કી છે. રોકાણકારો માટે પોતાના પોર્ટફોલિયોમાં એક મજબૂત ડિજિટલ શેર ઉમેરવાની આ ઉત્તમ તક સાબિત થઈ શકે છે.
