વારંવાર પર્સનલ લોન રિજેક્ટ થાય છે? જાણી લો ક્યાં છે ભૂલ, આ ભૂલ તમને ભારે પડી શકે છે!
આજના આધુનિક સમયમાં, પર્સનલ લોન એ જરૂરિયાત પૂરી કરવાનું એક સામાન્ય માધ્યમ બની ગયું છે. મેડિકલ ઇમરજન્સી હોય, બાળકોના શિક્ષણનો ખર્ચ હોય, ઘરનું સમારકામ હોય કે કોઈ મોટું આયોજન, લોકો આર્થિક જરૂરિયાતો માટે બેંક તરફ વળે છે. પરંતુ, ઘણીવાર તમામ જરૂરી દસ્તાવેજો જમા કરાવ્યા પછી પણ લોન અરજી રિજેક્ટ થઈ જાય છે.
જ્યારે લોન રિજેક્ટ થાય છે, ત્યારે તે નિરાશાજનક હોઈ શકે છે. જોકે, નિષ્ણાતો માને છે કે લોનનું રિજેક્શન એ અંત નથી, પરંતુ તમારી નાણાકીય આદતોને સુધારવાની એક તક છે. જો તમે તમારી ભૂલો સમજીને તેમાં સુધારો કરો, તો આગામી સમયમાં લોન મળવાની શક્યતા વધી જાય છે. ચાલો વિગતવાર સમજીએ કે કયા કારણોસર લોન રિજેક્ટ થાય છે અને તમે કેવી રીતે તમારી પ્રોફાઇલને મજબૂત બનાવી શકો છો.
૧. ક્રેડિટ સ્કોરનું ઓછું હોવું (Low Credit Score)
કોઈપણ બેંક માટે ગ્રાહકની વિશ્વસનીયતા તપાસવાનું સૌથી મોટું માધ્યમ ‘ક્રેડિટ સ્કોર’ છે. તમારો ક્રેડિટ સ્કોર તમારી ભૂતકાળની નાણાકીય વર્તણૂકનો અરીસો છે. જો તમે ભૂતકાળમાં લોનની EMI સમયસર ન ભરી હોય, ક્રેડિટ કાર્ડનું બિલ મોડું ભર્યું હોય કે અન્ય કોઈ લોનનો બાકી હપ્તો હોય, તો તમારો ક્રેડિટ સ્કોર ઘટી જાય છે.
બેંકો એવા ગ્રાહકોને ‘હાઈ રિસ્ક’ (વધારે જોખમી) માને છે જેમનો સ્કોર ઓછો હોય છે. તેમને લાગે છે કે આ ગ્રાહક લોન પાછી ચૂકવવામાં ફરીથી ચૂક કરી શકે છે.
-
શું કરવું? લોન માટે અરજી કરતા પહેલા હંમેશા તમારો ક્રેડિટ રિપોર્ટ તપાસો. જો સ્કોર ઓછો હોય, તો પહેલા જૂના બાકી લેણાં ચૂકવી દો અને નિયમિત પેમેન્ટ કરીને સ્કોરને સુધારવાનો પ્રયાસ કરો.
૨. ડેબિટ-ટુ-ઇનકમ રેશિયો (Debt-to-Income Ratio)
ઘણીવાર લોકો ભૂલી જાય છે કે લોન માત્ર આવકના આધારે નથી મળતી, પરંતુ તમારી આવકમાંથી તમે કેટલા પૈસા દેવામાં ખર્ચો છો તેના આધારે મળે છે. જો તમારી માસિક આવકનો મોટો હિસ્સો પહેલેથી જ જૂની લોન કે EMI ચૂકવવામાં વપરાઈ જતો હોય, તો બેંક તમને નવો લોન આપવામાં જોખમ અનુભવે છે.
બેંક એ જોશે કે તમારી પાસે નવી લોનનો હપ્તો ભરવા માટે પૂરતી રકમ બચશે કે કેમ. આને ‘ડેબિટ-ટુ-ઇનકમ રેશિયો’ કહેવાય છે.
-
શું કરવું? જો તમારી પર પહેલેથી જ ઘણી લોન હોય, તો નવી લોન લેતા પહેલા નાની લોન કે ક્રેડિટ કાર્ડનું બાકી લેણું પૂરું કરી નાખો. તમારી આવક અને ખર્ચ વચ્ચે સંતુલન જાળવવું ખૂબ જરૂરી છે.
૩. દસ્તાવેજોમાં નાની ભૂલ પણ ભારે પડી શકે છે
કેટલીકવાર તમારી નાણાકીય સ્થિતિ મજબૂત હોવા છતાં, માત્ર દસ્તાવેજોમાં રહેલી નાની ભૂલોને કારણે અરજી રિજેક્ટ થઈ જાય છે. નામની સ્પેલિંગમાં ભૂલ, પાન કાર્ડ (PAN Card) પરનું નામ અને આધાર કાર્ડ પરના નામમાં તફાવત, જૂના અથવા અસ્પષ્ટ દસ્તાવેજો, અથવા બેંકના ફોર્મમાં કરેલી સહી તમારી લોન અરજીને અટકાવી શકે છે.
-
શું કરવું? ફોર્મ ભરતી વખતે ખૂબ જ સાવચેતી રાખો. તમામ દસ્તાવેજો જેમ કે પાન કાર્ડ, આધાર કાર્ડ, સેલેરી સ્લિપ અને બેંક સ્ટેટમેન્ટ તપાસી લો. ખાતરી કરો કે તમામ જગ્યાએ તમારું નામ અને વિગતો એકસમાન છે.
૪. વારંવાર નોકરી બદલવી (Job Stability)
બેંકો એવા ગ્રાહકો પર વધારે ભરોસો કરે છે જેઓ આર્થિક રીતે સ્થિર હોય. જો તમે વારંવાર નોકરી બદલતા હોવ, તો બેંકને શંકા જાય છે કે ભવિષ્યમાં તમારી આવકમાં અનિયમિતતા આવી શકે છે. જે વ્યક્તિ પાસે સ્થિર રોજગાર નથી, તેને લોન ચૂકવવામાં મુશ્કેલી પડી શકે તેવું બેંકનું માનવું હોય છે.
-
શું કરવું? જો તમે તાજેતરમાં જ નોકરી બદલી હોય, તો લોન માટે થોડો સમય થોભી જવું હિતાવહ છે. લોન અરજી કરતી વખતે તમારી પાસે ઓછામાં ઓછા છેલ્લા 6 મહિનાથી એક જ જગ્યાએ કામ કરવાનો પુરાવો હોય તો તે પ્લસ પોઈન્ટ ગણાય છે.
૫. એકસાથે અનેક જગ્યાએ લોન માટે અરજી કરવી
ઘણા લોકો ઉતાવળમાં અલગ-અલગ બેંકો કે એપ્સમાં એકસાથે લોન માટે અરજી કરી દે છે. જ્યારે પણ તમે કોઈ બેંકમાં અરજી કરો છો, ત્યારે તે બેંક તમારા ક્રેડિટ રિપોર્ટ પર ‘હાર્ડ ઇન્ક્વાયરી’ કરે છે. જો ટૂંકા ગાળામાં ઘણી બધી આવી ઇન્ક્વાયરી થાય, તો તે તમારા ક્રેડિટ સ્કોરને નીચે પાડે છે અને બેંકોને એવું લાગે છે કે તમને પૈસાની ખૂબ જ તંગી છે.
-
શું કરવું? એકસાથે અનેક જગ્યાએ અરજી કરવાનું ટાળો. પહેલા તમારી યોગ્યતા તપાસો અને પછી માત્ર એક કે બે એવી બેંક પસંદ કરો જે તમારી પ્રોફાઇલ મુજબ લોન આપતી હોય.
