વર્લ્ડ કપ 2027 રેસમાં વેસ્ટઇન્ડીઝને મોટો ઝાટકો, પણ આ ક્વોલિફિકેશન સમીકરણથી હજુ પણ મળી શકે છે એન્ટ્રી

વેસ્ટ ઈન્ડિઝ ૨૦૨૭ ODI વર્લ્ડ કપની સીધી રેસમાંથી બહાર, પરંતુ એન્ટ્રીનો એક મુશ્કેલ માર્ગ હજુ પણ ખુલ્લો

બે વખતની ODI વર્લ્ડ ચેમ્પિયન વેસ્ટ ઇન્ડીઝ ક્રિકેટ ટીમ માટે વધુ એક નિરાશાજનક સમાચાર આવ્યા છે. દક્ષિણ આફ્રિકા, ઝિમ્બાબ્વે અને નામિબિયા દ્વારા સંયુક્ત રીતે યોજાનારા 2027 ODI વર્લ્ડ કપ માટે સીધા ક્વોલિફાય થવાની દોડમાંથી વેસ્ટ ઇન્ડીઝ બહાર થઈ ગયું છે. જોકે, ટીમ માટે વર્લ્ડ કપના દરવાજા સંપૂર્ણપણે બંધ નથી અને તેમની પાસે હજુ પણ ક્વોલિફાયર રમીને મુખ્ય ટુર્નામેન્ટમાં સ્થાન મેળવવાની એક છેલ્લી આશા છે.

અફઘાનિસ્તાનની જીતે બગાડ્યા વેસ્ટ ઈન્ડિઝના સમીકરણો

તાજેતરમાં જ અફઘાનિસ્તાન અને આયર્લેન્ડ વચ્ચે રમાયેલી વન-ડે શ્રેણી બાદ આ સ્થિતિ સ્પષ્ટ થઈ છે. શ્રેણીની પ્રથમ મેચ વરસાદના કારણે ધોવાઈ જતાં આયર્લેન્ડની સીધી ક્વોલિફાય થવાની આશાઓ પર પાણી ફરી વળ્યું હતું. ત્યારબાદ રમાયેલી બીજી ODI મેચમાં અફઘાનિસ્તાને આયર્લેન્ડને ૩ વિકેટે હરાવ્યું હતું. આ જીત સાથે જ અફઘાનિસ્તાને ICC વન-ડે રેન્કિંગમાં પોતાના પોઈન્ટ્સ સુધારીને ૨૦૨૭ વર્લ્ડ કપ માટે સીધું ક્વોલિફિકેશન નિશ્ચિત કરી લીધું હતું, જ્યારે વેસ્ટ ઈન્ડિઝ રેન્કિંગના આધારે સીધા ક્વોલિફાય થવાની દોડમાંથી સત્તાવાર રીતે બહાર થઈ ગયું હતું.

ક્વોલિફિકેશનનું ગણિત અને કટ-ઓફ ડેટ

૨૦૨૭ ના વર્લ્ડ કપ માટે દક્ષિણ આફ્રિકા અને ઝિમ્બાબ્વે સહ-યજમાન તરીકે પહેલેથી જ ક્વોલિફાય થઈ ચૂક્યા છે. આ સિવાય ICC ODI રેન્કિંગમાં ટોચ પર રહેનારી અન્ય ૮ ટીમોને સીધી એન્ટ્રી મળવાની હતી, જેની કટ-ઓફ તારીખ ૩૦ સપ્ટેમ્બર નક્કી કરવામાં આવી છે. અફઘાનિસ્તાનની જીત બાદ હવે કુલ ૧૦ ટીમોએ મુખ્ય ટુર્નામેન્ટ માટે પોતાનું સ્થાન પાકું કરી લીધું છે.

હવે વેસ્ટ ઈન્ડિઝ માટે શું છે વિકલ્પ?

રેન્કિંગના આધારે સ્થાન મેળવવામાં નિષ્ફળ રહ્યા બાદ હવે વેસ્ટ ઈન્ડિઝને ICC વર્લ્ડ કપ ક્વોલિફાયર ટુર્નામેન્ટ રમવી પડશે. આ ક્વોલિફાયર મેચો ફેબ્રુઆરી ૨૦૨૭ માં યોજાવાની શક્યતા છે, જોકે ICC દ્વારા હજુ સુધી તેના આયોજન સ્થળની સત્તાવાર જાહેરાત કરવામાં આવી નથી. વેસ્ટ ઈન્ડિઝ માટે આ ક્વોલિફાયરનો રસ્તો બિલકુલ સરળ નથી.

શું છે ક્વોલિફાયર ટુર્નામેન્ટનું ફોર્મેટ?

વર્લ્ડ કપ ક્વોલિફાયરમાં કુલ ૧૦ ટીમો ભાગ લેશે:

ICC રેન્કિંગમાં નીચે રહેલી ૨ ટીમો (જેમાં વેસ્ટ ઈન્ડિઝ સામેલ છે).

વર્લ્ડ કપ લીગ 2 ની પોઈન્ટ્સ ટેબલમાંથી ટોચની ૪ ટીમો.

ક્વોલિફાયર પ્લે-ઓફમાંથી આગળ વધનારી ૪ ટીમો.

આ ૧૦ ટીમો વચ્ચે રમાનારી ટુર્નામેન્ટમાંથી માત્ર ટોચની ૪ ટીમો જ આગળના તબક્કામાં પ્રવેશશે. આ ૪ ટીમોના ગ્રુપમાં જે ટીમ પ્રથમ સ્થાને રહેશે તે સીધી વર્લ્ડ કપ માટે ક્વોલિફાય થશે. જ્યારે બાકીની ૩ ટીમો વચ્ચે ‘સુપર સિરીઝ’ રમાશે, જેમાં પ્રથમ આવનારી માત્ર એક જ ટીમને વર્લ્ડ કપની ટિકિટ મળશે.

અર્થાત, વેસ્ટ ઈન્ડિઝે કાં તો આ ૧૦ ટીમોની ટુર્નામેન્ટમાં ટોચનું સ્થાન મેળવવું પડશે અથવા તો સુપર સિરીઝમાં તમામ મેચો જીતવી પડશે. આ તબક્કે એક પણ હાર તેમને વર્લ્ડ કપમાંથી બહાર ફેંકી દેશે.