૪ ઓગસ્ટના રોજ ગેસ સિલિન્ડરના ભાવ સ્થિર: જાણો દિલ્હીથી પટના સુધીના તાજા દર
દેશના કરોડો ગેસ ગ્રાહકો માટે આજના દિવસે રાહતના સમાચાર સામે આવ્યા છે. ૧૪ ઓગસ્ટ ૨૦૨૬ ના રોજ દેશની સત્તાવાર તેલ વિતરણ કંપનીઓ (OMCs) એ ઘરેલુ તેમજ વાણિજ્યિક (Commercial) એલપીજી સિલિન્ડરના દરોમાં કોઈ ફેરફાર કર્યો નથી. વૈશ્વિક આર્થિક અનિશ્ચિતતાઓ અને ક્રૂડ ઓઈલના ભાવમાં અસ્થિરતા વચ્ચે પણ દેશમાં એલપીજીના ભાવ સ્થિર જળવાઈ રહ્યા છે. નોંધનીય છે કે, ચાલુ મહિનાની પહેલી તારીખે જ કોમર્શિયલ ગેસ સિલિન્ડરની કિંમતમાં ₹૧૯૨ નો નોંધપાત્ર ઘટાડો કરીને વેપારીઓ અને હોટલ ઉદ્યોગને મોટી નાણાકીય રાહત આપવામાં આવી હતી.
દેશના વિવિધ શહેરોમાં સિલિન્ડરના આજના ભાવ
આજે રાજધાની દિલ્હીમાં ૧૪.૨ કિલોગ્રામ ધરાવતા ઘરેલુ એલપીજી સિલિન્ડરની કિંમત ₹૯૪૨ છે, જ્યારે ૧૯ કિલોના કોમર્શિયલ સિલિન્ડરનો ભાવ ₹૨,૭૩૮ નોંધાયો છે. આર્થિક રાજધાની મુંબઈમાં ઘરેલુ સિલિન્ડર ₹૯૪૧.૫૦ અને કોમર્શિયલ સિલિન્ડર ₹૨,૬૯૧.૫૦ ના ભાવે વેચાઈ રહ્યો છે. એનસીઆર ક્ષેત્રના નોઈડામાં ઘરેલુ સિલિન્ડર ₹૯૩૯.૫૦ અને કોમર્શિયલ સિલિન્ડર ₹૨,૭૩૮ માં મળી રહ્યો છે.
રાજસ્થાનની રાજધાની જયપુરમાં ઘરેલુ ગેસ ₹૯૪૫.૫૦ અને કોમર્શિયલ ગેસ ₹૨,૭૬૫.૫૦ ના મથાળે છે. દક્ષિણ ભારતના હૈદરાબાદમાં ઘરેલુ સિલિન્ડરનો ભાવ ₹૯૯૪ અને કોમર્શિયલનો ભાવ ₹૨,૯૮૫ પર સ્થિર રહ્યો છે. બીજી તરફ, બિહારના પટનામાં ઘરેલુ સિલિન્ડર ₹૧,૦૩૧.૫૦ અને કોમર્શિયલ સિલિન્ડર ₹૩,૦૧૮ ની કિંમતે ઉપલબ્ધ છે. ચંદીગઢમાં ઘરેલુ સિલિન્ડર ₹૯૫૧.૫૦ અને કોમર્શિયલ સિલિન્ડર ₹૨,૭૬૦ માં પ્રાપ્ત થાય છે, જ્યારે કોલકાતામાં આ દરો અનુક્રમે ₹૯૬૮ અને ₹૨,૮૭૨.૫૦ પર જળવાઈ રહ્યા છે.
ઊર્જા સુરક્ષા માટે ભારતની દીર્ઘદ્રષ્ટિપૂર્ણ યોજના
ભારત વિશ્વભરમાં એલપીજીના સૌથી મોટા ગ્રાહક દેશો પૈકીનો એક છે. હાલમાં પશ્ચિમ એશિયામાં વધી રહેલા ભૌગોલિક રાજકીય તણાવ અને પુરવઠામાં વિલંબની શક્યતાઓને ધ્યાનમાં રાખીને ભારતે પોતાના સપ્લાય સ્ત્રોતોમાં વૈવિધ્ય લાવવાના પ્રયાસો તેજ કર્યા છે. ભારત સરકારે દેશની અગ્રણી તેલ શુદ્ધિકરણ કંપનીઓ—ઈન્ડિયન ઓઈલ કોર્પોરેશન (IOCL), ભારત પેટ્રોલિયમ કોર્પોરેશન (BPCL) અને હિન્દુસ્તાન પેટ્રોલિયમ કોર્પોરેશન (HPCL)—ને વર્ષ ૨૦૨૭ સુધી વાર્ષિક કરાર હેઠળ યુનાઇટેડ સ્ટેટ્સ પાસેથી વધુ લિક્વિફાઇડ પેટ્રોલિયમ ગેસ મેળવવા માટે વાટાઘાટો કરવા નિર્દેશ આપ્યો છે.
અહેવાલો મુજબ, કેન્દ્ર સરકારે સરકારી તેલ કંપનીઓને પોતાની કુલ એલપીજી આયાતના ઓછામાં ઓછા ૧૫ ટકા હિસ્સો યુએસ ટર્મ કોન્ટ્રાક્ટ દ્વારા સુરક્ષિત કરવા જણાવ્યું છે.
અમેરિકા બન્યું ભારતનું મુખ્ય એલપીજી સપ્લાયર
તાજેતરના આંકડા દર્શાવે છે કે અમેરિકા ધીમે ધીમે ભારતનો સૌથી મોટો એલપીજી સપ્લાયર દેશ બનીને ઉભરી રહ્યો છે. ચાલુ વર્ષના ઓગસ્ટ મહિના સુધીમાં અમેરિકાથી ભારતને રેકોર્ડ ૩.૯ મિલિયન ટન એલપીજી મોકલવામાં આવ્યો છે. પશ્ચિમ એશિયાના પરંપરાગત સપ્લાયર્સ પર નિર્ભરતા ઘટાડીને અમેરિકન માર્કેટમાંથી સપ્લાય સુનિશ્ચિત કરવા માટે સરકારી રિફાઇનરીઓ સંભવિત સપ્લાયર્સ અને તેમની ઓફરોનું આકલન કરી રહી છે. આ પ્રક્રિયા પૂરી થયા બાદ ટૂંક સમયમાં અમેરિકન એલપીજી માટે સંયુક્ત ટેન્ડર બહાર પાડવાનું આયોજન છે.
બીજી તરફ, અમેરિકી વહીટીતંત્ર પણ ભારતમાં પોતાની ઊર્જા નિકાસ વધારવા આતુર છે, કારણ કે ભારત વિશ્વનું સૌથી ઝડપથી વિકસતું ઊર્જા બજાર છે. જોકે, બંને દેશો વચ્ચે ચાલી રહેલી દ્વિપક્ષીય વેપાર સમજૂતી અંગેની વાટાઘાટો હજુ સુધી આખરી તબક્કે પહોંચી નથી, છતાં ઊર્જા ક્ષેત્રે ભારત-અમેરિકા વચ્ચેનો સહયોગ સતત મજબૂત બની રહ્યો છે.
