LICની અદ્ભુત સ્કીમ: મહિને ₹૫,૦૦૦ નું રોકાણ અને ૧૦૦ વર્ષની વય સુધી મેળવો ગેરંટીડ આવક
આજના સમયમાં નિવૃત્તિ પછીના સુરક્ષિત ભવિષ્ય અને વૃદ્ધાવસ્થામાં નાણાકીય સ્થિરતા માટે યોગ્ય જગ્યાએ રોકાણ કરવું અત્યંત મહત્વપૂર્ણ બની ગયું છે. મ્યુચ્યુઅલ ફંડ કે શેરબજારના જોખમોથી બચીને જે લોકો સુરક્ષિત અને ગેરંટીડ વળતર મેળવવા માંગે છે, તેમના માટે ભારતીય જીવન વીમા નિગમ (LIC) ની ‘જીવન ઉમંગ’ (LIC Jeevan Umang) પોલિસી એક શ્રેષ્ઠ વિકલ્પ બનીને ઉભરી આવી છે. આ એક હોલ-લાઈફ (સંપૂર્ણ જીવન) વીમા યોજના છે, જે પોલિસીધારકને ૧૦૦ વર્ષની ઉંમર સુધી કવરેજ પૂરું પાડે છે.
૧૦૦ વર્ષની ઉંમર સુધી વાર્ષિક ₹૮૦,૦૦૦ ની ગેરંટીડ આવક
એલઆઈસી જીવન ઉમંગ પોલિસીની સૌથી મોટી ખાસિયત એ છે કે તે રોકાણકારને આજીવન નિશ્ચિત આવકની ખાતરી આપે છે. જો તમે દર મહિને ₹૫,૦૦૦ થી રોકાણ કરવાનું શરૂ કરો છો, તો પ્રીમિયમ ચૂકવણીનો સમયગાળો પૂરો થયા બાદ ૧૦૦ વર્ષની વય સુધી તમને દર વર્ષે ₹૮૦,૦૦૦ ની ગેરંટીડ વાર્ષિક આવક મળતી રહેશે. કારણ કે એલઆઈસી એ ભારત માલિકીની સંસ્થા છે, તેથી અહીં રોકાણ કરેલા નાણાં સંપૂર્ણપણે સુરક્ષિત રહે છે અને રોકાણકારોને કોઈ મૂડીનું જોખમ રહેતું નથી.
પ્રીમિયમ ચૂકવણીમાં ફ્લેક્સિબિલિટી અને કરમુક્તિનો લાભ
આ પોલિસીમાં ગ્રાહકને પોતાની સગવડ મુજબ પ્રીમિયમ ભરી શકે તેવી સુવિધા આપવામાં આવી છે. ગ્રાહકો ૧૫, ૨૦, ૨૫ અથવા ૩૦ વર્ષમાંથી કોઈ પણ એક પ્રીમિયમ પેઇંગ ટર્મ (PPT) પસંદ કરી શકે છે. પસંદ કરેલો પ્રીમિયમ સમયગાળો પૂર્ણ થતાં જ, એલઆઈસી દ્વારા સર્વાઇવલ બેનિફિટ (Survival Benefit) તરીકે મૂળભૂત વીમા રકમ (Sum Assured) ના ૮% દર વર્ષે ચૂકવવાનું શરૂ કરવામાં આવે છે.
નાણાકીય લાભોની વાત કરીએ તો, આ યોજનામાં જમા કરાતું પ્રીમિયમ આવકવેરા કાયદાની કલમ ૮૦સી (Section 80C) હેઠળ કર-મુક્ત છે, જ્યારે મેચ્યોરિટી અને વાર્ષિક વળતરની રકમ કલમ ૧૦(૧૦ડી) હેઠળ સંપૂર્ણપણે કરમુક્ત રહે છે. આ ઉપરાંત, પોલિસી શરૂ થયાના ૨ વર્ષ બાદ જરૂરિયાત ઉભી થતાં ગ્રાહક આ પોલિસી સામે લોન મેળવવા માટે પણ પાત્ર બને છે.
રોકાણનું સંપૂર્ણ ગણિત અને મેચ્યોરિટી લાભો
ઉદાહરણ તરીકે, જો કોઈ વ્યક્તિ ૩૦ વર્ષની વયે આ પોલિસી લે છે અને ૨૦ વર્ષ માટે પ્રીમિયમ ચૂકવવાનો વિકલ્પ પસંદ કરે છે, તો તેમનું માસિક ₹૫,૦૦૦ નું રોકાણ વાર્ષિક ₹૬૦,૦૦૦ થશે. આ પ્રીમિયમ દ્વારા તેમને આશરે ₹૧૦ લાખનું લાઈફ કવર મળશે.
જ્યારે પોલિસીધારક ૫૦ વર્ષની વય પૂરી કરીને ૫૧મા વર્ષમાં પ્રવેશે છે, ત્યારથી તેમને ₹૧૦ લાખના ૮% લેખે એટલે કે દર વર્ષે ₹૮૦,૦૦૦ ની નિશ્ચિત આવક મળવાનું શરૂ થઈ જશે. આ રકમ તેઓ ૧૦૦ વર્ષની ઉંમર સુધી પહોંચે અથવા મૃત્યુ પામે ત્યાં સુધી દર વર્ષે સતત મળતી રહે છે.
જો પોલિસીધારક ૧૦૦ વર્ષની વય વટાવી જાય છે, તો તેમને બેઝિક સમ એશ્યોર્ડ, એલઆઈસી દ્વારા જાહેર કરાયેલ બોનસ અને ફાઈનલ એડિશનલ બોનસ સહિતની એકસામટી રકમ પાકતી મુદતે આપવામાં આવે છે. બીજી તરફ, જો ૫૦ વર્ષની ઉંમર પછી પોલિસીધારકનું અકાળે અવસાન થાય છે, તો તેમના નોમિનીને ₹૧૦ લાખની વીમા રકમ સાથે સંચિત થયેલ તમામ બોનસ એકસામટી રકમ તરીકે ચૂકવી દેવામાં આવે છે.
