મિસાઈલ ગાઈડન્સ સિસ્ટમ ડેવલપ કરવા આતંકીઓએ ક્લોડ પ્લેટફોર્મનો કર્યો ઉપયોગ
આર્ટિફિશિયલ ઇન્ટેલિજન્સ (AI) ટેકનોલોજી જ્યાં એક તરફ માનવજીવનને સરળ બનાવી રહી છે, ત્યાં બીજી તરફ તેનો ઉપયોગ આંતરરાષ્ટ્રીય સુરક્ષા માટે ગંભીર ખતરો બનીને ઉભરી રહ્યો છે. અમેરિકા સ્થિત જાણીતી AI કંપની ‘એનથ્રોપિક’ (Anthropic) એ પોતાના તાજેતરના અહેવાલમાં એક સનસનાટીભર્યો ખુલાસો કર્યો છે. એનથ્રોપિક દ્વારા જારી કરાયેલા “ડિટેક્ટિંગ એન્ડ કાઉન્ટરિંગ મિસ્યુઝ ઓફ AI: સપ્ટેમ્બર ૨૦૨૬” શીર્ષક વાળા અહેવાલ મુજબ, ઉત્તર યમનમાં સક્રિય એક આતંકવાદી સંગઠને લાંબા અંતરની બેલિસ્ટિક મિસાઇલો અને ગાઇડેડ રોકેટો માટે સોફ્ટવેર તૈયાર કરવા પોતાના લોકપ્રિય AI મોડેલ ‘ક્લોડ’ (Claude) નો દુરુપયોગ કર્યો હતો.
આ ઘટના સામે આવ્યા બાદ એન્થ્રોપિકે આતંકવાદી નેટવર્ક સાથે જોડાયેલા તમામ એકાઉન્ટ્સને તુરંત અસરથી બેન (Block) કરી દીધા છે અને સુરક્ષા એજન્સીઓ સાથે આ અંગેની મહત્વપૂર્ણ ગુપ્ત માહિતી શેર કરી છે.
ત્રણ મુખ્ય મિસાઈલ પ્રોજેક્ટ્સ અને AI ની ભૂમિકા
રિપોર્ટના ચોંકાવનારા વિગતો અનુસાર, આ આતંકવાદી જૂથ એક સાથે ત્રણ અલગ-અલગ સૈન્ય પ્રોજેક્ટ્સ પર કામ કરી રહ્યું હતું. જેમાં એક ગાઇડેડ રોકેટ, ૨,૦૦૦ કિમીથી વધુની રેન્જ ધરાવતી મલ્ટી-સ્ટેજ બેલિસ્ટિક મિસાઇલ અને “R2000” નામના મલ્ટી-વેરિયન્ટ મિસાઇલ પ્રોજેક્ટનો સમાવેશ થતો હતો. આ “R2000” પ્રોજેક્ટમાં હાઇપરસોનિક ગ્લાઇડ વ્હિકલ ટેકનોલોજીનો પણ સમાવેશ કરવામાં આવ્યો હતો.
આ નેટવર્કે ક્લોડ AI નો ઉપયોગ એક કુશળ માનવ સોફ્ટવેર એન્જિનિયરની જેમ કર્યો હતો. તેમણે AI ને મિસાઈલ માટે ગાઇડન્સ, નેવિગેશન અને કંટ્રોલ (GNC) સોફ્ટવેર બનાવવાનું જટિલ કામ સોંપ્યું હતું. આ સોફ્ટવેર ફ્લાઇટ દરમિયાન મિસાઇલની દિશા, હવામાં સ્થિરતા અને ટાર્ગેટ તરફના ચોક્કસ માર્ગનું સંચાલન કરવા માટે અત્યંત મહત્વપૂર્ણ માનવામાં આવે છે. આ કામગીરી માટે એક સાથે અનેક AI સત્રો (Sessions) ચલાવવામાં આવ્યા હતા, જેમાં એક ભાગ કોડ લખતો, બીજો ભાગ સંશોધન કરતો અને ત્રીજો ભાગ લખાયેલા કોડની સમીક્ષા કરતો હતો.
રોકેટનું ફેલિયર અને AI દ્વારા વિશ્લેષણ
એન્થ્રોપિકના અહેવાલમાં જણાવાયું છે કે આ જૂથે AI ના કોડિંગથી તૈયાર કરાયેલા ગાઇડેડ રોકેટનું પ્રત્યક્ષ ક્ષેત્ર પરીક્ષણ (Real Field Test) પણ કર્યું હતું. જોકે, આ ટેસ્ટિંગ સંપૂર્ણપણે નિષ્ફળ ગયું હતું. રોકેટ પ્રક્ષેપણ નિષ્ફળ ગયાના થોડા જ કલાકોમાં આ જૂથના સભ્યો ફરીથી ક્લોડ પ્લેટફોર્મ પર સક્રિય થયા હતા અને લોન્ચિંગ કેમ નિષ્ફળ ગયું તેનું ટેકનિકલ વિશ્લેષણ કરવા માટે તેમણે AI ની મદદ લેવાનો પ્રયાસ કર્યો હતો. કંપનીના જણાવ્યા મુજબ, સદ્ભાગ્યે આ સંગઠન કોઈ ઓપરેશનલ હથિયાર તૈનાત કરવામાં સફળ રહ્યું નથી.
આંતરિક તપાસ, છટકી જવાની પદ્ધતિ અને અન્ય દેશોની સંડોવણી
આ સમગ્ર પ્રવૃત્તિ એનથ્રોપિકની આંતરિક વિશ્લેષણાત્મક તપાસ દરમિયાન પ્રકાશમાં આવી હતી. સામાન્ય રીતે AI મોડેલ્સમાં હથિયાર અને વિસ્ફોટકો સંબંધિત કોડિંગ અટકાવવા માટે મજબૂત સેફ્ટી કવચ હોય છે, પરંતુ હુમલાવરોએ પોતાના સાચા હેતુ છુપાવીને તથા કામને નાના-નાના ભાગોમાં વહેંચીને આ સિક્યોરિટી પ્રોટોકોલ્સને બાયપાસ કરવાનો પ્રયાસ કર્યો હતો.
માત્ર યમન જ નહીં, પરંતુ એનથ્રોપિકના રિપોર્ટમાં કુલ છ શસ્ત્રો સંબંધિત ગેરકાયદેસર કામગીરીનો પર્દાફાશ થયો છે. જેમાં ત્રણ ચીન સાથે, બે રશિયા સાથે અને એક યમન સાથે જોડાયેલું હતું. આ કેસોમાં એન્ટી-ટોર્પીડો સિસ્ટમ્સ, ડ્રોન સ્વાર્મ્સ (હજારો ડ્રોનનું એકસાથે સંચાલન), ઇલેક્ટ્રોનિક વોરફેર ટાર્ગેટિંગ સોફ્ટવેર અને લશ્કરી સાધનસામગ્રીની ગેરકાયદેસર ખરીદી જેવા ગંભીર વિષયો સામેલ હતા.
કંપની દ્વારા લેવાયેલા સખત સુરક્ષા પગલાં
આ ઘટનાઓ બાદ એનથ્રોપિકે ભવિષ્યમાં આવા જોખમોને ડામવા માટે પોતાના સિસ્ટમમાં અત્યાધુનિક ‘AI ક્લાસિફાયર્સ’ (વર્ગીકરણ સાધનો) રજૂ કર્યા છે. આ સાધનો શક્તિશાળી વિસ્ફોટકો, સૈન્ય સોફ્ટવેર અને શસ્ત્રોના વિકાસ સાથે જોડાયેલી વિનંતીઓને પ્રાથમિક તબક્કે જ ઓળખીને તેને તરત જ બ્લોક કરી દેશે, જેથી ટેકનોલોજીનો ઉપયોગ માનવજાતના વિનાશ માટે ન થાય.
