નવી મુંબઈ ઈન્ટરનેશનલ એરપોર્ટ ઉપર પ્રવાસીઓને આવ-જા માટે પોષાય તેવી અનેક પરિવહન સુવિધા અપાશે
અદાણી એરપોર્ટ હોલ્ડિંગ્સ લિ. સંચાલિત ભારતના સૌથી મોટા ‘ગ્રીનફિલ્ડ’ એરપોર્ટ્સમાંના એક નવી મુંબઈ ઈન્ટરનેશનલ એરપોર્ટ દ્વારા ૨૫ ઓક્ટોબર ૨૦૨૬ થી ૨૭ માર્ચ ૨૦૨૭ સુધી અમલમાં રહેનારા શિયાળુ સમયપત્રક અગાઉ તેના જાહેર પરિવહન અને ગ્રાઉન્ડ મોબિલિટી નેટવર્કનો વિસ્તાર કરવાના ભાગરુપે એરપોર્ટના પ્રવાસીઓને મુંબઈ, નવી મુંબઈ, પુણે અને વિશાળ મુંબઈ મેટ્રોપોલિટન રિજનમાં વાજબી દરોએ બસ, ટેક્સી, ઓટો-રિક્ષા, કાર રેન્ટલ અને એરપોર્ટ શટલ સહિતના પરિવહનના વિવિધ વિકલ્પો પૂરા પાડી રહ્યું છે.
૭ ઓક્ટોબર ૨૦૨૬ થી ‘ઈ-શિવઈ’ ઈલેક્ટ્રિક બસ સેવાઓ મહારાષ્ટ્ર સ્ટેટ રોડ ટ્રાન્સપોર્ટ કોર્પોરેશન (MSRTC) શરૂ કરશે. નવી મુંબઇ એરપોર્ટથી પુણેનું ભાડું રુ.૪૫૦, બોરીવલી રુ.૨૧૦ અને દાદર ઈસ્ટનું ભાડું રુ.૧૭૦ રહેશે. ૧૨ વર્ષથી ઓછી ઉંમરના બાળકો અને ‘નેશનલ કોમન મોબિલિટી કાર્ડ’ સાથે મુસાફરી કરતી મહિલાઓ અડધા ભાડાની સુવિધાને પાત્ર રહેશે. ૧૦ ઓક્ટોબરથી ‘ભારત ટેક્સી’ ૪૦ વાહનોના સમર્પિત કાફલા સાથે કામગીરી શરૂ કરશે.ઉપરાંત પ્રીપેડ ટેક્સી અને ઓટો-રિક્ષાની સેવાઓ પણ શરૂ કરવામાં આવી રહી છે.
નવી મુંબઇ એરપોર્ટ પહોંચવા વહેલી સવારથી મોડી રાત સુધી કાર્યરત રહેનાર MSRTC ની પ્રથમ તબક્કાની ‘ઈ-શિવઈ’ બસ સેવાઓ એરપોર્ટ ને દાદર, બોરીવલી અને પુણે સાથે જોડશે, દાદર-એરપોર્ટ રૂટ સાયન અને અટલ સેતુ થઈને પસાર થશે, જ્યારે બોરીવલી- રૂટ CSMIA ટર્મિનલ ૧, બાંદ્રા અને અટલ સેતુને જોડશે. પુણે-નવી મુંબઇ એરપોર્ટ રૂટ પર દરરોજ એક સવારે અને એક બપોરે એમ બે સેવાઓ ઉપલબ્ધ હશે. નવેમ્બરમાં થાણે અને નાસિકને જોડતી સેવાઓ શરૂ કરવાની યોજના છે.
‘ચલો બસ’ દ્વારા સંચાલિત દૈનિક ૨૧ બસ સેવાઓ નવી મુંબઇ આંતર રાષ્ટ્રીય એરપોર્ટ ને અંધેરી ઈસ્ટમાં મરોલ, બાંદ્રા, દાદર અને કોલાબામાં આવેલા વર્લ્ડ ટ્રેડ સેન્ટર સાથે જોડે છે. પીક અને નોન-પીક સમયગાળા દરમિયાન નિયમિત અંતરે ચાલતી સેવાઓમાં પીક-અવર્સમાં મુસાફરો અને કર્મચારીઓની અવરજવર માટે વધારાની ક્ષમતા પણ ઉમેરવામાં આવી રહી છે. નવી મુંબઈ મ્યુનિસિપલ ટ્રાન્સપોર્ટ (NMMT) સાત સમર્પિત એરપોર્ટ રૂટ, A1 થી A7 ચલાવે છે, જે ટર્મિનલ 1 ને ખારકોપર, તારઘર, બેલાપુર, નેરુલ, પનવેલ, ખાંડેશ્વર અને એરપોર્ટ પ્રોજેક્ટ ઓફિસ સાથે જોડે છે. પીક અવર્સ દરમિયાન દર ૧૫-૨૦ મિનિટે કાર્યરત બેલાપુર અને નેરુલ સેવાઓમાં વાશી અને પનવેલ સાથે વધુ સંકલનની યોજના છે.
ઉબેર ગો અને ઉબેર પ્રીમિયર ટૂંકા અને મધ્યમ-અંતરની મુસાફરીમાં રાઈડના અનુકૂળ વિકલ્પો આપશે, જેમાં મુસાફરોને બોર્ડિંગની સુવિધા માટે પિકઅપ ઝોન હશે. ઉબેર ઓટો ટૂંકા અંતરની મુસાફરી માટે વધારાનો ઓન-ડિમાન્ડ વિકલ્પ પૂરો પાડશે.
અન્ય વિકલ્પોમાં પ્રીપેડ ટેક્સીઓ, પ્રીપેડ ઓટોરિક્ષાઓ અને ભાડે કાર શામેલ છે.
નવી મુંબઇ આંતર રાષ્ટ્રીય એરપોર્ટ અને છત્રપતિ શિવાજી મહારાજ આંરરાષ્ટ્રીય એરપોર્ટ વચ્ચે દર કલાકે મફત ‘ઇન્ટર-એરપોર્ટ શટલ’ સેવા ચલાવવામાં આવશે. સિટી ફ્લો, આર્યા અને ચલો બસ દ્વારા સંચાલિત આ સેવાઓ મુંબઈના બન્ને એરપોર્ટ વચ્ચે સીધી આવનજાવનનો વિકલ્પ પૂરો પાડશે.
એપ-આધારિત ટેક્સીઓ, રેન્ટલ કાર, ઓટો અને બસો સહિતની ગ્રાઉન્ડ ટ્રાન્સપોર્ટ ક્ષમતા વધારીને ૪,૫૯૪ કરવામાં આવી રહી છે; જેમાં ૩,૭૮૭ એપ-આધારિત ટેક્સીઓ, ૧૮૪ રેન્ટલ કાર, ૧૭૧ ઓટો અને ૫૪૭ બસોનો કાફલો શામેલ થશે.
નવી મુંબઇ આંતર રાષ્ટ્રીય એરપોર્ટ દ્વારા અવરજવર માટેના સંકેતો (signage), દિશા-સૂચક પ્રણાલીઓ અને મુસાફરોની સહાય માટે જમીની-સ્તરની વ્યવસ્થાઓ ગોઠવવામાં આવી રહી છે, જેમાં આગમન, પ્રસ્થાન માટે બસો, શટલ, અને ખાનગી વાહનો માટેના અલગ ઝોન નક્કી કરવામાં આવ્યા છે.
આ એરપોર્ટ પનવેલ, તારઘર અને બામણડોંગરી સબર્બન રેલવે સ્ટેશનો તેમજ અટલ સેતુ, સાયન-પનવેલ હાઈવે, પામ બીચ રોડ, અમરા માર્ગ (NH-348A) અને NH-548 જેવા મુખ્ય માર્ગો સાથે જોડાયેલું છે. નવી મુંબઈ મેટ્રો લાઇન-1 કાર્યરત છે, જ્યારે પ્રસ્તાવિત મુંબઈ મેટ્રો લાઇન-8 CSMIA અને NMIA ને જોડશે. NMIA ઇલેક્ટ્રિક વાહન (EV) ચાર્જિંગ ઇન્ફ્રાસ્ટ્રક્ચરના વિકાસને વેગ આપવા માટે અદાણી ટોટાલ એનર્જીસ ગેસની ટીમ સાથે પણ કામ કરી રહ્યું છે.
