લાંબો સમય ઊંચા નહીં રહે પેટ્રોલના ભાવ, આગામી મહિનાઓમાં મળી શકે છે રાહત

આજે શું છે પેટ્રોલ-ડીઝલના ભાવ? તેલ કંપનીઓએ જાહેર કર્યા નવા દર

વૈશ્વિક સ્તરે ભૌગોલિક અને રાજકીય અસ્થિરતા વચ્ચે સામાન્ય નાગરિકો માટે ઘરનું બજેટ જાળવવું એક મોટો પડકાર બની ગયું છે. ખાસ કરીને પેટ્રોલ અને ડીઝલના ભાવ સીધા રોજિંદા જીવનની ચીજવસ્તુઓના પરિવહન ખર્ચ સાથે જોડાયેલા હોવાથી તેની નાની સરખી વધઘટ પણ બજાર પર વ્યાપક અસર કરે છે. આજે ૨૩ જૂન, ૨૦૨૬ ના રોજ આંતરરાષ્ટ્રીય બજારમાં ક્રૂડ ઓઈલની વધતી કિંમતો વચ્ચે દેશની સરકારી તેલ કંપનીઓ (OMCs) એ રાહતના સમાચાર આપ્યા છે.

આજે ૨૩ જૂન, ૨૦૨૬, મંગળવારના રોજ સરકારી તેલ કંપનીઓએ દેશભરમાં પેટ્રોલ અને ડીઝલની કિંમતો સ્થિર રાખીને ગ્રાહકોને મોટી રાહત આપી છે. ગત મે મહિનામાં ઇંધણના ભાવમાં થયેલા સતત વધારા બાદ જૂન મહિનામાં કિંમતો નિયંત્રણમાં જોવા મળી રહી છે. છેલ્લે ૨૫ મે ના રોજ તેલ કંપનીઓએ ભાવમાં મોટો આંચકો આપતા પ્રતિ લિટર ₹૨.૫૦ થી વધુનો વધારો કર્યો હતો, ત્યારબાદથી અત્યાર સુધી કોઈ નવો ફેરફાર કરવામાં આવ્યો નથી.

મે મહિનામાં ક્યારે અને કેટલો ઝટકો મળ્યો હતો?

વર્ષ ૨૦૨૬ નો મે મહિનો વાહનચાલકોના ખિસ્સા પર ભારે પડ્યો હતો. તેલ કંપનીઓએ મે મહિનામાં ચાર તબક્કામાં કિંમતો વધારી હતી:

• ૧૫ મે, ૨૦૨૬: લગભગ ચાર વર્ષના લાંબા અને સ્થિર ગાળા પછી, સરકારી તેલ કંપનીઓએ અચાનક પેટ્રોલ-ડીઝલના ભાવમાં સીધો પ્રતિ લિટર ₹૩ નો તોતિંગ વધારો ઝીંક્યો હતો.

• ૧૯ મે, ૨૦૨૬: આંતરરાષ્ટ્રીય દબાણને કારણે ફરી એકવાર પેટ્રોલના ભાવમાં ૮૭ પૈસા અને ડીઝલના ભાવમાં ૯૧ પૈસા પ્રતિ લિટરનો વધારો કરાયો.

• ૨૩ મે, ૨૦૨૬: ઇંધણના દરોમાં ત્રીજી વખત વધારો થયો, જેમાં ફરીથી પેટ્રોલ અને ડીઝલ અનુક્રમે ૮૭ પૈસા અને ૯૧ પૈસા મોંઘા થયા.

• ૨૫ મે, ૨૦૨૬: તેલ કંપનીઓએ છેલ્લી વખત કિંમતોમાં પ્રતિ લિટર ₹૨.૬૦ થી ₹૨.૮૦ સુધીનો વધારો કર્યો હતો, જે અત્યાર સુધીનો છેલ્લો ભાવવધારો સાબિત થયો છે.

દેશના પ્રમુખ શહેરોમાં આજના ભાવ (પ્રતિ લિટર)

રાજધાની દિલ્હીમાં આજે પેટ્રોલનો ભાવ ₹૧૦૨.૧૨ અને ડીઝલનો ભાવ ₹૯૫.૨૦ પ્રતિ લિટર પર સ્થિર છે. દેશની આર્થિક રાજધાની મુંબઈમાં પેટ્રોલની કિંમત ₹૧૧૧.૧૮ અને ડીઝલની કિંમત ₹૯૭.૩ પ્રતિ લિટર નોંધાઈ છે. કલકત્તામાં વાહનચાલકોએ પેટ્રોલ માટે ₹૧૧૩.૪૭ અને ડીઝલ માટે ₹૯૯.૮૨ ચૂકવવા પડી રહ્યા છે, જ્યારે ચેન્નાઈમાં પેટ્રોલનો દર ₹૧૦૭.૭૭ અને ડીઝલનો દર ₹૯૯.૫૫ પ્રતિ લિટર છે.

દક્ષિણ ભારતના આઈટી હબ બેંગલુરુમાં પેટ્રોલ ₹૧૧૦.૯૩ અને ડીઝલ ₹૯૮.૮૦ ના ભાવે વેચાઈ રહ્યું છે. હૈદરાબાદમાં કિંમતો પ્રમાણમાં ઊંચી છે, જ્યાં પેટ્રોલ ₹૧૧૫.૬૯ અને ડીઝલ ₹૧૦૩.૮૨ પ્રતિ લિટર છે. મધ્ય પ્રદેશના ભોપાલમાં પેટ્રોલ ₹૧૧૪.૫૪ અને ડીઝલ ₹૯૯.૬૪ પર સ્થિર છે. ઉત્તર પ્રદેશના લખનૌમાં પેટ્રોલ ₹૧૦૨.૦૫ અને ડીઝલ ₹૯૫.૫૫ છે, જ્યારે બિહારના પટનામાં પેટ્રોલ ₹૧૧૩.૩૫ અને ડીઝલ ₹૯૯.૩૬ પ્રતિ લિટરના ભાવે સ્થિર રાખવામાં આવ્યું છે.

અમેરિકા-ઈરાન સંઘર્ષે ઉર્જા ક્ષેત્રે રમત બગાડી

વૈશ્વિક સ્તરે ચાલી રહેલા અમેરિકા અને ઈરાન વચ્ચેના સૈન્ય સંઘર્ષે આંતરરાષ્ટ્રીય બજારમાં તેલના સપ્લાય ચેઈનને ખરાબ રીતે પ્રભાવિત કરી છે. ભારત પોતાની જરૂરિયાતનું મોટાભાગનું ક્રૂડ ઓઈલ ખાડી દેશો (ગલ્ફ કન્ટ્રીઝ) માંથી આયાત કરે છે. આ યુદ્ધના કારણે ભારતમાં થતી ક્રૂડ ઓઇલની આયાત પર ૪૦%, કુદરતી ગેસ (નેચરલ ગેસ) ની આયાત પર ૬૫% અને એલપીજી (LPG) ના પુરવઠા પર ૯૦% જેટલી ગંભીર અસર પડી છે.

કેન્દ્રીય તેલ મંત્રીની ખાતરી અને વૈશ્વિક વિકલ્પો

આ વિકટ પરિસ્થિતિ વચ્ચે કેન્દ્રીય તેલ મંત્રી હરદીપ સિંહ પુરીએ દેશવાસીઓને આશ્વસ્ત કર્યા છે કે આંતરરાષ્ટ્રીય સ્તરે ઉથલપાથલ હોવા છતાં દેશમાં ઇંધણનો પૂરતો સ્ટોક ઉપલબ્ધ છે. એક આંતરરાષ્ટ્રીય ન્યૂઝ એજન્સીના અહેવાલ મુજબ, તેલ મંત્રીએ જણાવ્યું છે કે ક્રૂડ ઓઈલની કિંમતો લાંબા સમય સુધી વર્તમાન ઊંચા સ્તરે રહી શકે નહીં અને આગામી મહિનાઓમાં વૈશ્વિક બજાર શાંત થતાં જ ભારતમાં પેટ્રોલ-ડીઝલના ભાવ ઘટવાની પૂરી સંભાવના છે.

ખાડી દેશોમાં સર્જાયેલી અછતને પહોંચી વળવા માટે ભારત હવે કેનેડા અને અમેરિકાથી વધારાનો તેલ પુરવઠો મેળવવા માટે વાટાઘાટો કરી રહ્યું છે, જેનાથી સ્થાનિક બજારમાં ભાવ સ્થિર રાખવામાં મોટી મદદ મળશે. જો કે, તેમણે ચેતવણી પણ આપી છે કે જો ગલ્ફ વિસ્તારમાં યુદ્ધ વધુ વણસશે, તો વૈશ્વિક સમીકરણો ફરી બદલાઈ શકે છે.