ડિફેન્સ સ્ટોકમાં અચાનક કેમ આવી વાવાઝોડા જેવી તેજી? રોકાણકારોની સંપત્તિમાં થયો તોતિંગ વધારો!
શુક્રવારના ટ્રેડિંગ સેશનમાં સંરક્ષણ ક્ષેત્રની જાણીતી ઈલેક્ટ્રોનિક્સ કંપની ‘એસ્ટ્રા માઇક્રોવેવ પ્રોડક્ટ્સ’ (Astra Microwave Products) ના શેરોમાં જબરદસ્ત ખરીદી જોવા મળી હતી. દિવસ દરમિયાન કંપનીના શેરમાં લગભગ ૧૪ ટકા જેટલો જોરદાર ઉછાળો નોંધાયો હતો. આ તેજી પાછળનું મુખ્ય કારણ હિન્દુસ્તાન એરોનોટિક્સ લિમિટેડ (HAL) તરફથી ‘ઉત્તમ રડાર પ્રોગ્રામ’ માટે મળેલો ₹૨,૨૦૫.૨૩ કરોડનો મોટો ઓર્ડર છે.
શું છે આ મોટા ઓર્ડરની વિગતો?
એસ્ટ્રા માઇક્રોવેવે શેરબજારને આપેલી માહિતીમાં જણાવ્યું છે કે તેમને સંરક્ષણ મંત્રાલય હેઠળ આવતી જાહેર ક્ષેત્રની કંપની હિન્દુસ્તાન એરોનોટિક્સ લિમિટેડ (HAL) તરફથી ‘ઉત્તમ રડાર પ્રોગ્રામ’ માટે વિવિધ ઉપકરણો સપ્લાય કરવાનો ₹૨,૨૦૫.૨૩ કરોડનો સ્વદેશી કોન્ટ્રાક્ટ મળ્યો છે.
આ સમગ્ર ઓર્ડર મૂલ્યમાં તમામ લાગુ પડતા ટેક્સ અને જીએસટી (GST) નો સમાવેશ થઈ જાય છે. આ કરાર હેઠળ કંપની HAL ને:
-
૧૨૨ એક્ટિવ એન્ટીના એરે યુનિટ્સ (AAAU) અને
-
૧૨૧ ઇન્ટરફેસ ફ્રેમ સપ્લાય કરશે.
પાંચ વર્ષમાં પૂરો થશે ઓર્ડર, કંપનીએ કરી સ્પષ્ટતા
એસ્ટ્રા માઇક્રોવેવે સ્પષ્ટ કર્યું છે કે આ મહત્વકાંક્ષી ઓર્ડરને આગામી ૫ વર્ષના સમયગાળામાં તબક્કાવાર રીતે પૂરો કરવામાં આવશે.
વધુમાં, કંપનીએ કોર્પોરેટ ગવર્નન્સ અંગે ખુલાસો કરતા જણાવ્યું હતું કે, આ કોન્ટ્રાક્ટમાં HAL સાથે કંપનીના કોઈપણ પ્રમોટર કે પ્રમોટર ગ્રુપનું કોઈ અંગત હિત જોડાયેલું નથી. આથી આ વ્યવહાર ‘રિલેટેડ-પાર્ટી ટ્રાન્ઝેક્શન’ ની શ્રેણીમાં આવતો નથી અને સંપૂર્ણપણે પારદર્શક છે.
આવકની ક્ષમતા મજબૂત થઈ, બજાર ઉત્સાહમાં
આ ઓર્ડરનું કદ આટલું મોટું હોવાને કારણે જ રોકાણકારોમાં ભારે ઉત્સાહ જોવા મળી રહ્યો છે. ૩૧ માર્ચ, ૨૦૨૬ સુધીના આંકડા મુજબ એસ્ટ્રા માઇક્રોવેવની કુલ ઓર્ડર બુક ₹૨,૬૧૦ કરોડની હતી. એટલે કે, HAL તરફથી મળેલો આ એક જ ઓર્ડર કંપનીની આખી જૂની ઓર્ડર બુકની બરાબર છે! આનાથી ભવિષ્યમાં કંપનીની કમાણી અને રેવેન્યુ ગ્રોથ અત્યંત મજબૂત બનશે તેવો વિશ્વાસ રોકાણકારોને બેઠો છે.
એસ્ટ્રા માઇક્રોવેવના શેરનું તાજેતરનું પરફોર્મન્સ
શુક્રવારે આવેલી આ ધમાકેદાર તેજી સાથે આ સ્ટોક છેલ્લા ચાર વર્ષ કરતાં વધુ સમયમાં પોતાની સૌથી મોટી વન-ડે તેજી (એક દિવસનો સૌથી મોટો ઉછાળો) નોંધાવવા તરફ આગળ વધી રહ્યો હતો.
ચાલુ વર્ષના માર્ચ મહિનાના અંતમાં આ શેરે ₹૮૩૫.૯૦ નો પપ-વીક (52-week) નો નીચલો સ્તર સ્પર્શ્યો હતો. જોકે, ત્યાંથી શેરે શાનદાર વાપસી (Recovery) કરી છે અને માત્ર ચાર મહિનાના ટૂંકા ગાળામાં જ રોકાણકારોને ૧૩૦ ટકાથી વધુનું મજબૂત રિટર્ન આપ્યું છે.
સંરક્ષણ ક્ષેત્રના આ મલ્ટીબેગર સ્ટોકના પરફોર્મન્સ પર નજર કરીએ તો:
-
૧ મહિનો: ~૯% નો વધારો
-
૩ મહિના: ~૭૦% નો વધારો
-
૬ મહિના: ~૯૫% નો વધારો
-
છેલ્લું ૧ વર્ષ: ૧૦૦% નો વધારો (નાણાં બમણા)
લાંબા ગાળે આપ્યું મલ્ટીબેગર રિટર્ન
જે રોકાણકારોએ આ સ્ટોકમાં લાંબા ગાળા માટે નાણાં રોક્યા છે, તેમને કંપનીએ માતબર વળતર આપ્યું છે.
-
છેલ્લા ૩ વર્ષમાં આ શેરે ૪૨૨ ટકા નું રિટર્ન આપ્યું છે.
-
છેલ્લા ૫ વર્ષમાં તેણે ૧,૦૪૧ ટકા નો તોતિંગ ઉછાળો નોંધાવીને રોકાણકારોની સંપત્તિમાં મલ્ટીબેગર ગ્રોથ કરાવ્યો છે.
કંપનીના ડીમર્જર (Demerger) નો મોટો પ્લાન
આ વર્ષની શરૂઆતમાં જ એસ્ટ્રા માઇક્રોવેવના બોર્ડ ઓફ ડિરેક્ટર્સે કંપનીના કામકાજની કાર્યક્ષમતા (Operational Efficiency) વધારવા અને મેનેજમેન્ટનું ફોકસ વધુ સચોટ બનાવવા માટે એક મોટા પુનર્ગઠન (Restructuring) ને સૈદ્ધાંતિક મંજૂરી આપી હતી.
આ યોજના હેઠળ કંપની પોતાના સ્પેસ (અંતરિક્ષ), મેટીઓરોલોજી (હવામાન શાસ્ત્ર) અને હાઇડ્રોલોજી (જળ વિજ્ઞાન) બિઝનેસને અલગ કરીને એક નવી સ્વતંત્ર કંપની બનાવશે. કંપનીને આશા છે કે નાણાકીય વર્ષ ૨૦૨૮ (FY28) ના પ્રથમ ત્રિમાસિક ગાળા (Q1) સુધીમાં આ ડીમર્જરની પ્રક્રિયા પૂરી થઈ જશે.
ગ્રોથ માટેની ખાસ વ્યૂહરચના
ડીમર્જર પ્રોસેસના ભાગરૂપે કંપની ‘એસ્ટ્રા સ્પેસ ટેકનોલોજીસ પ્રાઇવેટ લિમિટેડ’ નામની નવી કંપની બનાવવાની યોજના ધરાવે છે. આ નવી કંપની ખાસ કરીને સ્પેસ અને હવામાન સંબંધિત બિઝનેસ પર જ ધ્યાન કેન્દ્રિત કરશે.
કંપનીના જણાવ્યા મુજબ, આ અલગ સ્ટ્રક્ચર બનવાથી નવા બિઝનેસ માટે સેક્ટર-વિશિષ્ટ ગ્રોથ વ્યૂહરચનાઓ બનાવવી અને મૂડીની ફાળવણી (Capital Allocation) કરવી ખૂબ સરળ બનશે. સાથે જ, આ પુનર્ગઠનથી અલગ-અલગ પ્રકારના રોકાણકારો માટે રોકાણની નવી તકો ઊભી થશે, ઓર્ગેનાઇઝેશનની જટિલતા ઘટશે અને કંપનીમાં પારદર્શિતા તથા જવાબદેહીમાં સુધારો થશે.
