બજારમાં ભયનો માહોલ: ટ્રમ્પની ‘એટેક’ ની ચેતવણી અને સોનામાં ઉછાળો, શેરબજાર ગગડીને તળિયે પહોંચ્યું!
ભારતીય શેરબજાર માટે આજનો દિવસ ‘બ્લેક થર્સડે’ સાબિત થયો છે. બુધવારે જોવા મળેલી થોડીક રિકવરી બાદ, આજે ગુરુવારે બજારે ફરી એકવાર જોરદાર પછડાટ ખાધી છે. અમેરિકી રાષ્ટ્રપતિ ડોલ્ડ ટ્રમ્પના રાષ્ટ્રજોગ સંબોધન બાદ વૈશ્વિક બજારોની સાથે ભારતીય શેરબજારમાં પણ ગભરાટ ફેલાઈ ગયો હતો, જેના કારણે સેન્સેક્સ અને નિફ્ટીમાં 2% થી વધુનો મોટો ઘટાડો જોવા મળ્યો છે. આજના ઘટાડામાં બીએસઈ (BSE) સેન્સેક્સ 1,500 પોઈન્ટ થી વધુ તૂટીને 71,608 ની નીચી સપાટીએ પહોંચ્યો હતો, જ્યારે નિફ્ટી 50 પણ 450 પોઈન્ટ થી વધુના ઘટાડા સાથે 22,209 પર આવી ગયો હતો. આ કડાકાને કારણે રોકાણકારોની સંપત્તિમાં એક જ દિવસમાં અંદાજે ₹9 લાખ કરોડ નું ધોવાણ થયું છે.
બજારમાં આટલા મોટા ઘટાડા પાછળના 5 મુખ્ય કારણો:
- ઈરાન પર ટ્રમ્પનું આક્રમક વલણ
રાષ્ટ્રપતિ ટ્રમ્પે તેમના સંબોધનમાં કહ્યું કે અમેરિકા ઈરાનમાં તેના મુખ્ય લક્ષ્યો પૂર્ણ કરવાની નજીક છે, પરંતુ આગામી બે થી ત્રણ અઠવાડિયા સુધી અમેરિકી સેના ઈરાન પર અત્યંત આક્રમક હુમલા ચાલુ રાખશે. ટ્રમ્પના આ નિવેદનથી પશ્ચિમ એશિયામાં યુદ્ધ લાંબુ ખેંચાવાની ભીતિ સેવાઈ રહી છે. જિયોજિત ઇન્વેસ્ટમેન્ટ્સના વીકે વિજયકુમારે જણાવ્યું હતું કે, ટ્રમ્પના અસ્થિર વિચારો અને આક્રમક નિવેદનોને કારણે માર્કેટ સેન્ટિમેન્ટ ફરી એકવાર નકારાત્મક બની ગયું છે.
- ક્રૂડ ઓઈલના ભાવમાં જોરદાર ઉછાળો
ટ્રમ્પના ભાષણમાં ‘સ્ટ્રેટ ઓફ હોર્મુઝ’ (વૈશ્વિક તેલ વ્યાપારનો મુખ્ય જળમાર્ગ) ખોલવા અંગે કોઈ સ્પષ્ટતા ન મળતા ક્રૂડ ઓઈલના ભાવમાં ભડકો થયો છે. બ્રેન્ટ ક્રૂડ 4% વધીને $105 પ્રતિ બેરલ ને વટાવી ગયું છે. ભારત તેલનો મોટો આયાતકાર દેશ હોવાથી ક્રૂડના વધતા ભાવ ભારતીય અર્થતંત્ર અને બજાર માટે હંમેશા ચિંતાનો વિષય હોય છે.
- નબળા વૈશ્વિક સંકેતો
ભારતીય બજારોએ અન્ય એશિયન બજારોના નબળા વલણને અનુસર્યું હતું. જાપાનનો નિક્કી (Nikkei) અને કોરિયાનો કોસ્પી (Kospi) પણ ક્રૂડ ઓઈલના ભાવ વધવાને કારણે 4% સુધી તૂટ્યા હતા. વૈશ્વિક સ્તરે અનિશ્ચિતતાનો માહોલ હોવાથી રોકાણકારો જોખમ લેવાનું ટાળી રહ્યા છે.
- વિદેશી રોકાણકારો (FPIs) ની આક્રમક વેચવાલી
વિદેશી પોર્ટફોલિયો રોકાણકારો સતત ભારતીય બજારમાંથી નાણાં પાછા ખેંચી રહ્યા છે. 1 એપ્રિલના રોજ જ FPIs એ ₹8,331.15 કરોડ ના શેર વેચ્યા હતા. ક્રૂડના ઊંચા ભાવ અને ડોલર સામે રૂપિયાની નબળાઈને કારણે વિદેશી રોકાણકારો ભારત જેવા ઉભરતા બજારોમાંથી એક્ઝિટ કરી રહ્યા છે.
- મજબૂત ડોલર અને બોન્ડ યીલ્ડમાં વધારો
યુએસ ડોલર ઇન્ડેક્સ ફરીથી 100 ના સ્તરને પાર કરી ગયો છે, જ્યારે યુએસ 10-વર્ષના બોન્ડ યીલ્ડ વધીને 4.38% થઈ ગયા છે. જ્યારે પણ અમેરિકામાં બોન્ડ યીલ્ડ વધે છે, ત્યારે રોકાણકારો ભારત જેવા બજારોમાંથી પૈસા કાઢીને અમેરિકી બોન્ડમાં રોકાણ કરવાનું સુરક્ષિત માને છે, જેની સીધી અસર સ્થાનિક શેરબજાર પર પડી રહી છે.
રોકાણકારોએ શું કરવું?
બજારમાં હાલમાં ‘વોલેટિલિટી’ (અસ્થિરતા) ખૂબ જ વધારે છે. જ્યાં સુધી રશિયા-યુક્રેન અને હવે અમેરિકા-ઈરાન વચ્ચેના તણાવમાં કોઈ નક્કર ઉકેલ નહીં આવે, ત્યાં સુધી બજારમાં ઉતાર-ચઢાવ ચાલુ રહેશે. નિષ્ણાતોના મતે, આવા સમયે ગભરાટમાં આવીને વેચવાલી કરવાને બદલે, રોકાણકારોએ સારા ફંડામેન્ટલ ધરાવતા શેરોમાં લાંબા ગાળા માટે ટકી રહેવું જોઈએ અને નવી ખરીદી માટે બજાર સ્થિર થાય ત્યાં સુધી રાહ જોવી હિતાવહ છે.
