સોનાના વધતા ભાવથી શેરબજારના આ ૬ સ્ટોક્સમાં આવશે ‘મોટો ઉછાળો’: જાણો કમાણી કરાવતા પાવરફુલ શેર્સ અંગે એક્સપર્ટ્સનું શાનદાર આકલન
સોનાના ભાવમાં સતત જોવા મળી રહેલી રેકોર્ડબ્રેક તેજી હવે માત્ર જ્વેલરી ખરીદનારાઓ કે સોનું ધરાવતા પરિવારો સુધી સીમિત નથી રહી, પરંતુ તે શેરબજારના રોકાણકારો માટે પણ કમાણીનો એક નવો અને આકર્ષક રસ્તો ખોલી રહી છે. ગ્લોબલ બ્રોકરેજ ફર્મ જેફરીઝ (Jefferies) ના તાજેતરના અહેવાલ મુજબ, ભારતમાં સોનાના વધતા વપરાશ અને તેના ઝડપથી થઈ રહેલા મોનેટાઇઝેશન (સોના સામે લોન લેવાની પ્રક્રિયા) ને કારણે કેટલીક મજબૂત કંપનીઓના શેર્સને આ તેજીનો સીધો અને મોટો ફાયદો મળવા જઈ રહ્યો છે. બજારના નિષ્ણાતોએ એવા પાવરફુલ સ્ટોક્સ પર મોટો દાવ લગાવ્યો છે, જેમના કારોબારમાં આવનારા દિવસોમાં ભારે ઉછાળો જોવા મળી શકે છે.
ભારતીય પરિવારો પાસે ૨૫,૦૦૦ ટન સોનાનો અણનમ ખજાનો
રિપોર્ટના ચોંકાવનારા આંકડા અનુસાર, ભારતીય પરિવારો પાસે આશરે ૨૫,૦૦૦ ટન સોનું જમા થયેલું છે. આ વિશાળ જથ્થાનું મૂલ્ય માર્ચ ૨૦૨૬ સુધીમાં લવભગ ૪ લાખ કરોડ ડોલર (આશરે ૩,૭૦,૦૦૦ લાખ કરોડ રૂપિયા) આંકવામાં આવ્યું છે. આ રકમ ભારતીય રોકાણકારો દ્વારા શેરોમાં રોકેલા કુલ નાણાં કરતાં આશરે ૪ ગણી અને બેંક ડિપોઝિટ કરતાં આશરે ૨ ગણી વધારે છે. ભારતીયોની કુલ ઘરગથ્થુ સંપત્તિમાં સોનાનો હિસ્સા આશરે ૨૫ ટકા જેટલો સિંહભાગ ધરાવે છે.
જેફરીઝના મતે, માર્ચ ૨૦૨૬ સુધીમાં ભારતમાં ગોલ્ડ લોન માર્કેટની સાઈઝ વધીને ૧,૯૭૦૦ કરોડ ડોલર (આશરે ૧૮ લાખ કરોડ રૂપિયા) સુધી પહોંચવાની ધારણા છે. છેલ્લા બે વર્ષમાં ડોલરના સંદર્ભમાં ગોલ્ડ લોનમાં લગભગ ૭૩ ટકાનો જંગી વધારો નોંધાયો છે, જે હાલ બેંકો અને એનબીએફસી (NBFC) ની કુલ લોન બુકના આશરે ૭ ટકા જેટલો હિસ્સો થાય છે.
ગોલ્ડ લોન કંપનીઓ માટે સુવર્ણ સમય: મણપ્પુરમ, મુથૂટ અને IIFL ફાઇનાન્સ
સોનાના ભાવ વધવાથી ગ્રાહકો તે જ સોનાના દાગીના સામે વધુ રકમની ધિરાણ મેળવી શકે છે. આનાથી ગોલ્ડ લોન આપતી કંપનીઓના લોન એસેટ અંડર મેનેજમેન્ટ (AUM) અને વ્યાજની આવકમાં સીધો સુધારો થાય છે. આ જ કારણે જેફરીઝે મણપ્પુરમ ફાઇનાન્સ (Manappuram Finance) ને પોતાના પસંદગીના શેરોમાં સ્થાન આપ્યું છે અને તેમાં ‘Add’ રેટિંગ આપ્યું છે.
આ ઉપરાંત, ગોલ્ડ લોન ક્ષેત્રની અન્ય બે દિગ્ગજ કંપનીઓ મુથૂટ ફાઇનાન્સ (Muthoot Finance) અને આઈઆઈએફએલ ફાઇનાન્સ (IIFL Finance) પણ આ તેજીના સીધા લાભાર્થી બનશે. ગ્રામીણ અને મધ્યમ આવક ધરાવતા પરિવારો પોતાની તાત્કાલિક નાણાકીય જરૂરિયાતો કે નાના કારોબાર માટે સોના સામે ધિરાણ લેવાનું વધુ પસંદ કરી રહ્યા છે, જેનો સીધો લાભ આ કંપનીઓના બેલેન્સ શીટ પર જોવા મળશે.
જ્વેલરી સેક્ટર અને એક્સચેન્જ સ્ટોક્સમાં મજબૂત ગ્રોથ
સોનાના વધતા ભાવનો બીજો મોટો ફાયદો દેશની પ્રમુખ જ્વેલરી કંપનીઓને મળી રહ્યો છે. જેફરીઝે ટાઇટન (Titan) અને કલ્યાણ જ્વેલર્સ (Kalyan Jewellers) ને સંભવિત મુખ્ય લાભાર્થી સ્ટોક્સ તરીકે પસંદ કર્યા છે. સોનાના ઊંચા ભાવ છતાં ભારતમાં લગ્નસરા અને તહેવારોમાં જ્વેલરીની માંગ અકબંધ રહે છે. આ સિવાય જૂની જ્વેલરી એક્સચેન્જ કરીને નવી જ્વેલરી ખરીદવાનો ટ્રેન્ડ પણ વેગ પકડી રહ્યો છે.
બીજી તરફ, સોનાના ભાવમાં આવતા ઉતાર-ચઢાવને કારણે કમોડિટી એક્સચેન્જ MCX (Multi Commodity Exchange) માં પણ ટ્રેડિંગ વોલ્યુમ અને પ્રવૃત્તિઓ નોંધપાત્ર રીતે વધી રહી છે. વધુ ટ્રેડિંગ ગતિવિધિઓને કારણે MCX ની ટ્રાન્ઝેક્શન આવકમાં વધારો થશે.
સિલ્વર થીમ હેઠળ હિન્દુસ્તાન ઝિંક પર દાવ
ગોલ્ડ રેલીની સાથે સાથે ચાંદી (Silver) માં પણ મજબૂત તેજીની પૂરી શક્યતા છે. આ સિલ્વર થીમનો લાભ લેવા માટે જેફરીઝે હિન્દુસ્તાન ઝિંક (Hindustan Zinc) ને પોતાના મોડેલ પોર્ટફોલિયોમાં ઉમેર્યો છે. દેશમાં ચાંદીના સૌથી મોટા ઉત્પાદક હોવાને કારણે, ચાંદીના ભાવ વધવાનો સીધો ફાયદો કંપનીના પ્રોફિટ માર્જિનને મળશે.
ટૂંકમાં, ઘરોમાં પડેલા સોનાનું ઔપચારિક ચેનલો દ્વારા મોનેટાઇઝેશન હજુ શરૂઆતી તબક્કામાં છે. આથી જ આ ૬ કંપનીઓના શેરોમાં આગામી સમયમાં લાંબા ગાળાના ગ્રોથની મોટી ગુંજાઈશ દેખાઈ રહી છે.
