‘જેલર 2’ બની દુનિયાની નંબર 1 તમિલ ફિલ્મ, 710 કરોડથી વધુ કમાણી કરીને રચ્યો ઇતિહાસ

સાઉથ સિનેમામાં નવો ઇતિહાસ! ‘જેલર 2’નું વર્લ્ડવાઈડ કલેક્શન 700 કરોડને પાર

સાઉથ સિનેમાના ‘થલાઇવા’ એટલે કે સુપરસ્ટાર રજનીકાંતનો જાદુ ફરી એકવાર બોક્સ ઓફિસ પર છવાઈ ગયો છે. તેમની તાજેતરમાં રિલીઝ થયેલી એક્શન ફિલ્મ ‘જેલર 2’એ કમાણીના મામલામાં ઇતિહાસ રચી દીધો છે. ફિલ્મે રિલીઝ થયાના માત્ર 11 દિવસની અંદર દુનિયાભરમાં એવું ધમાકેદાર પ્રદર્શન કર્યું છે કે તેણે પોતાની જ અગાઉની બ્લોકબસ્ટર ફિલ્મ ‘2.0’ પાછળ છોડી દીધી છે.

ટ્રેડ ટ્રેકર ‘સૈનિલ્ક’ના આંકડા મુજબ, દુનિયાભરમાં 710.35 કરોડ રૂપિયાથી વધુની કમાણી કરીને આ અત્યાર સુધીની સૌથી વધુ કમાણી કરનારી તમિલ ફિલ્મ બની ગઈ છે. સિનેમાઘરોમાં આ ફિલ્મને જોવા માટે દર્શકોની ભારે ભીડ ઉમટી રહી છે.

11મા દિવસે ભારતમાં થઈ ધમાકેદાર કમાણી

ફિલ્મને રિલીઝ થયાને ભલે દોઢ અઠવાડિયું વીતી ગયું હોય, પરંતુ તેનો ક્રેઝ જરાય ઓછો થયો નથી. ફિલ્મના 11મા દિવસના કલેક્શનમાં પાછલા દિવસની સરખામણીમાં આશરે 6.4%નો શાનદાર વધારો જોવા મળ્યો. 11મા દિવસે આ ફિલ્મે ભારતમાં તમામ ભાષાઓને મળીને કુલ 25.70 કરોડ રૂપિયાની નેટ કમાણી કરી.

જો ભાષાના હિસાબે વાત કરીએ, તો આ ફિલ્મે પોતાની મૂળ ભાષા એટલે કે તમિલમાં સૌથી વધુ 17.35 કરોડ રૂપિયા મેળવ્યા. આ ઉપરાંત, તેલુગુ વર્ઝનથી 4.50 કરોડ, હિન્દીથી 3.15 કરોડ અને કન્નડ ભાષાથી 70 લાખ રૂપિયાની કમાણી થઈ. આ તમામ આંકડાઓને જોડી દેવામાં આવે, તો ભારતમાં ફિલ્મનું કુલ નેટ કલેક્શન હવે 398.70 કરોડ રૂપિયા સુધી પહોંચી ગયું છે.

વિદેશોમાં પણ ગૂંજ્યો ‘જેલર 2’નો ડંકો

દેશની અંદર જ નહીં, પરંતુ વિદેશોમાં (ઓવરસીઝ) પણ રજનીકાંતના ફેન્સ આ ફિલ્મ પર પ્રેમ વરસાવી રહ્યા છે. માત્ર 11મા દિવસે જ વિદેશોમાંથી ફિલ્મે આશરે 10 કરોડ રૂપિયાનો બિઝનેસ કર્યો. આની સાથે જ, ઓવરસીઝથી થતી કુલ કમાણીનો આંકડો 243.50 કરોડ રૂપિયા થઈ ગયો છે.

જ્યારે ભારતની કુલ ગ્રોસ કમાણી અને વિદેશોના કલેક્શનને ભેગા કરવામાં આવે છે, ત્યારે ‘જેલર 2’નું વર્લ્ડવાઈડ બોક્સ ઓફિસ કલેક્શન 710.35 કરોડ રૂપિયાને વટાવી જાય છે.

બની દુનિયાની નંબર-1 તમિલ ફિલ્મ

આ રેકોર્ડબ્રેક કમાણી સાથે ‘જેલર 2’એ ગ્લોબલી સૌથી વધુ કમાણી કરનારી તમિલ ફિલ્મોની યાદીમાં પ્રથમ સ્થાન મેળવી લીધું છે. તેણે રજનીકાંતની પોતાની જ ફિલ્મ ‘2.0’ અને થલપતી વિજયની સુપરહિટ ફિલ્મ ‘લિયો’ને પાછળ છોડી દીધી છે. દુનિયાભરમાં સૌથી વધુ કમાણી કરનારી ટોપ 5 તમિલ ફિલ્મોની યાદી નીચે મુજબ છે:

1. જેલર 2 – 710.35 કરોડ રૂપિયા (માત્ર 11 દિવસમાં)

2. 2.0 – 691 કરોડ રૂપિયા

3. લિયો (Leo) – 605.90 કરોડ રૂપિયા

4. જેલર – 604.75 કરોડ રૂપિયા

5. કુલી (Coolie) – 518 કરોડ રૂપિયા

આગળ કઈ ફિલ્મોમાં નજરે પડશે રજનીકાંત?

‘જેલર 2’ની આ ઐતિહાસિક સફળતા પછી ફેન્સ માટે વધુ એક મોટા ખુશાબર છે. રજનીકાંત ટૂંક સમયમાં જ દિગ્દર્શક અશ્વથ મારિમુથુની આગામી ફિલ્મ ‘ધર્મન’માં નજરે પડવાના છે, જેમાં તેમની સાથે પ્રખ્યાત અભિનેત્રી નયનતારા પણ મુખ્ય ભૂમિકામાં દેખાશે.

આ ઉપરાંત, તેઓ ફરી એકવાર ‘જેલર 2’ના ડિરેક્ટર નેલ્સન દિલિપકુમાર સાથે એક એક્શન-કોમેડી ફિલ્મમાં કામ કરશે. આ પ્રોજેક્ટ (જેને હાલમાં ‘KH x RK’ કહેવામાં આવી રહ્યો છે)ની સૌથી મોટી ખાસિયત એ છે કે તેમાં ભારતીય સિનેમાના બે દિગ્ગજ રજનીકાંત અને કમલ હાસન પૂરા 47 વર્ષ પછી એકસાથે મોટા પડદા પર પાછા ફરી રહ્યા છે, જેને લઈને ફેન્સની ઉત્સુકતા સાતમા આસમાને છે.