ટોપ ફેશન ડિઝાઈનર પ્રત્યૂષા ગરિમેલા હૈદરાબાદમાં પોતાના ઘરમાંથી મૃત અવસ્થામાં મળી આવી છે. પોલીસના જણાવ્યા અનુસાર બપોરે બંજારા હિલ્સમાં પોતાના ઘરમાં સંદિગ્ધ અવસ્થામાં મૃત હાલતમાં મળી આવી હતી. 35 વર્ષિય પ્રત્યૂષાનું ઘર બંજારા હિલ્સ પોલીસ સ્ટેશનના ફિલ્મ નગરમાં આવેલું છે. પ્રત્યૂષા દેશની ટોપ 30 ફેશન ડિઝાઈનરોમાંની એક હતી.
હકીકતમાં જોઈએ તો, ઘટના ત્યારે સામે આવી જ્યારે તેણે શનિવારે બપોરે જવાબ ન આપ્યો, જે બાદ સિક્યુરિટીએ પોલીસને જાણ કરી હતી. જેના પર પોલીસે ઘરનો દરવાજો તોડી અંદર જઈને તેની લાશ કબ્જામાં લીધી હતી. પોલીસે મૃતદેહને ઓસ્માનિયા હોસ્પિટલના શબઘરમાં પોસ્ટમોર્ટમ માટે રાખ્યો છે અને શંકાસ્પદ મૃત્યુનો કેસ નોંધ્યો છે. પોલીસે જણાવ્યું કે દિલ્હીમાં રહેતા તેના સંબંધીઓને આ અંગે જાણ કરવામાં આવી છે.
જણાવી દઈએ કે પ્રત્યુષાએ યુએસથી ફેશન ડિઝાઈનિંગ કર્યું છે. તેણે પોતાના કરિયરની શરૂઆત હૈદરાબાદથી કરી હતી. વર્ષ 2013માં પ્રત્યુષાએ પોતાના નામથી લેબલ શરૂ કર્યું, ત્યાર બાદ તેણે ક્યારેય પાછળ વળીને જોયું નથી. પ્રત્યુષાએ ટોલીવુડ ઇન્ડસ્ટ્રીની ઘણી લોકપ્રિય હસ્તીઓ માટે કપડાં ડિઝાઇન કર્યા છે. આ સિવાય પ્રત્યુષાએ ઘણા બોલિવૂડ સેલેબ્સ માટે પણ કામ કર્યું છે. તેમના ઘણા મોટા ગ્રાહકો છે.
