લોકશાહીમાં ચૂંટણી મહત્વનું અંગ છે. વિદ્યાર્થીઓ લોકશાહી વિશે અને ચૂંટણીની પ્રક્રિયા વિશે અભ્યાસના ભાગરૂપે શિક્ષણ મેળવે તે માટે શાળામાં વાસ્તવિક રૂપમાં ચૂંટણીનો માહોલ ઉભો કરવાથી વિદ્યાર્થીઓની સમજ કેળવાઈ છે. જેના ભાગરૂપે નવુ સત્ર શરૂ થતાની સાથે જ શાળાઓમાં વિદ્યાર્થીઓ વચ્ચે બેલેટ પેપરથી ચૂંટણીનું આયોજન કરવામાં આવે છે પરંતુ દેશના વડાપ્રધાનશ્રી નરેન્દ્રભાઈ મોદીના વિઝન સમાન ન્યૂ ડિજિટલ ઈન્ડિયાના જમાનામાં વલસાડ જિલ્લાના સંપૂર્ણ આદિવાસી ધરમપુર અને કપરાડા તાલુકામાં જ્યાં નેટવર્ક પણ નથી તેવી સ્કૂલમાં પણ ટેક્નોલોજીના મદદથી ઈવીએમ દ્વારા જે રીતે મતદાન થાય તે રીતે મોબાઈલના ઉપયોગથી મતદાન કરાવવામાં આવ્યું છે.
આજના વિદ્યાર્થીઓ આવતીકાલના મતદારો છે. તેઓ લોકશાહીનું મહત્વ અને ચૂંટણી પ્રક્રિયા સમજે તે માટે શાળામાં ચૂંટણીનો આબેહૂબ માહોલ ઉભો કરી વિદ્યાર્થીઓમાંથી મહામંત્રી અને ઉપમહામંત્રીને ચૂંટવા માટે વિદ્યાર્થીઓ વચ્ચે મતદાન કરાવવામાં આવે છે. મહામંત્રી અને ઉપમહામંત્રી ચૂંટાયા બાદ તેઓએ વર્ષ દરમિયાન શાળાના વિદ્યાર્થીઓને પડતી મુશ્કેલીઓ અને સૂચનો આચાર્ય સમક્ષ રજૂ કરી તેનું નિરાકરણ લાવવાનું રહે છે. સાથોસાથ શૈક્ષણિક અને સહ અભ્યાસિક પ્રવૃત્તિઓમાં પણ એમના અભિપ્રાયો લઈ કામગીરી કરવામાં આવે છે. જેથી શાળાના વિદ્યાર્થીઓ માટે આ ચૂંટણી મહત્વની બની રહે છે. જે અંતર્ગત ધરમપુર તાલુકાના માલનપાડા ગામની મોડલ સ્કૂલમાં ચૂંટણી યોજવામાં આવી હતી. છેલ્લા બે વર્ષથી બેલેટ પેપરથી પરંપરાગત રીતે ચૂ્ંટણી થઈ હતી પરંતુ હવે ટેકનોલોજીના યુગમાં મોબાઈલમાં વોટિંગ મશીન એપ્લિકેશનની મદદથી ચૂંટણી યોજવામાં સફળતા મળી હતી. જે રીતે ઈવીએમ દ્વારા મતદાન કરવામાં આવે છે તેમ આ એપમાં પણ એ જ પધ્ધતિ મુજબ મતદાન કરવામાં આવે છે. મોડલ સ્કૂલ માલનપાડામાં ઈવીએમ પધ્ધતિથી મતદાન થતા તમામ ૧૯૦ વિદ્યાર્થીઓએ મતદાન કરતા ૧૦૦ ટકા મતદાન નોંધાયુ હતું. મતગણતરી માટે પણ આ જ એપનો ઉપયોગ કરી પરિણામ જાહેર કરાયું હતું. જેમાં મહામંત્રી તરીકે ધો.૧૨નો વિદ્યાર્થી ગાંવિત હર્ષિલ અને ઉપમહામંત્રી તરીકે ધો.૧૦ની ચૌધરી રિધ્ધિ ચૂંટાયા હતા. બાળ સાંસદ ચૂંટણીના આયોજક તરીકે શાળાના આચાર્યા ડો.વર્ષાબેન પટેલ, શિક્ષિકા મીરાબેન ગોળકિયા, દિપાલીબેન ચુડાસમા અને હાર્દિકભાઈ પટેલે જહેમત ઉઠાવી હતી.
કપરાડા તાલુકાના અંતરિયાળ ગામ બામણવાડાની પ્રાથમિક શાળામાં મોબાઈલ નેટર્વક પકડાતુ ન હોવા છતાં મોબાઈલ એપ્લિકેશનની મદદથી ઓફલાઈન ચૂંટણી યોજવામાં આવી હતી. જેમાં ધો. ૫ થી ૮ ના ૧૭૦ વિદ્યાર્થીઓ પૈકી ૧૨૦ વિદ્યાર્થીઓએ ઈવીએમ મશીનની જેમ મોબાઈલ એપમાં મતદાન કર્યુ હતું. જેની મત ગણતરી પણ એપ દ્વારા થતા ધો. ૮ની વિદ્યાર્થીની અલ્સ્તાબેન પ્રભુભાઈ અરજ મહામંત્રી તરીકે અને ઉપમહામંત્રી તરીકે ધો. ૮ના વિદ્યાર્થી પ્રશાંતભાઈ ગુલાબભાઈ પાગી ચૂંટાયા હતા. શાળાના આચાર્યા ચેતનાબેન કે.પટેલે વિજેતા બંને વિદ્યાર્થીઓને અભિનંદન પાઠવ્યા હતા. આચાર્યા ચેતનાબેનના માર્ગદર્શન હેઠળ શાળાના શિક્ષકો કૃતિબેન એમ. પટેલ, હેતલબેન પી. પટેલ અને જિતેન્દ્રભાઈ એસ. પટેલે સમગ્ર ચૂંટણી પ્રક્રિયા સુપેરે પાર પાડી હતી. આચાર્યા અને શિક્ષકોએ પણ મતદાન કરી વિદ્યાર્થીઓને પ્રોત્સાહિત કર્યા હતા.
બાળ સાંસદની ચૂંટણીની આ રહી વિશિષ્ટતા
શાળામાં બાળ સાંસદ ચૂંટણીની વિશિષ્ટતા એ હતી કે, બાળ સાંસદની ચૂંટણી માટે જાહેરનામુ બહાર પાડવાથી માંડીને ફોર્મ ભરવુ, ફોર્મની ચકાસણી, ફોર્મ પરત ખેંચવાનો છેલ્લો દિવસ અને પ્રચાર બંધ કરવા સહિતની પ્રકિયાઓ તબક્કાવાર આટોપવામાં આવી હતી. મતદાનના દિવસે આબેહૂબ બુથ ઉભુ કરવામાં આવ્યુ હતું. પોલીસ ગાર્ડ, બીએલઓ, પ્રિસાઈડીંગ ઓફિસર, પોલીંગ સ્ટાફ અને મત કુટિરથી લઈને તમામ ચૂંટણી પ્રક્રિયામાં વિદ્યાર્થીઓને જોડવામાં આવ્યા અને તેઓને દરેક પ્રક્રિયાનું મહત્વ પણ સમજાવવામાં આવ્યું હતું.
-૦૦૦-
