કેન્દ્ર સરકાર સાથેના તણાવ વચ્ચે, તમિલનાડુ સરકારે રાજ્યના બજેટમાં તમિલ ભાષામાં રૂપિયાનું પ્રતીક ₹ થી બદલીને ரூ કર્યું છે. આ પગલાને લઈને નાણામંત્રી નિર્મલા સીતારમણે તમિલનાડુના મુખ્યમંત્રી એમકે સ્ટાલિન પર નિશાન સાધ્યું છે. આ મુદ્દા સાથે જોડાયેલી બીજી ખાસ વાત એ છે કે રૂપિયા ₹ નું પ્રતીક એમકે સ્ટાલિનની પાર્ટી ડીએમકેના ભૂતપૂર્વ ધારાસભ્યના પુત્ર દ્વારા ડિઝાઇન કરવામાં આવ્યું હતું. હવે આ સમગ્ર વિવાદ પર ₹ ડિઝાઇનર પ્રોફેસર ઉદય કુમાર ધર્મલિંગમનું એક નિવેદન સામે આવ્યું છે.
ઉદય કુમાર ધર્મલિંગમે શું કહ્યું?
ભારતીય રૂપિયાના પ્રતીકની રચના કરનાર IIT ગુવાહાટીના પ્રોફેસર ઉદય કુમાર ધર્મલિંગમે કહ્યું, “મને આ પ્રતીકમાં ફેરફાર પાછળના કારણોની સંપૂર્ણ જાણકારી નથી, કદાચ રાજ્ય સરકાર પાસે આ ફેરફાર કરવા માટે પોતાની પદ્ધતિઓ, વિચારો અને કારણો હશે. મેં તેને 15 વર્ષ પહેલાં ડિઝાઇન કર્યું હતું જ્યારે તત્કાલીન કેન્દ્ર સરકારે એક સ્પર્ધા યોજી હતી અને મેં તે જીતી હતી, ત્યારબાદ તેઓએ તેને અમલમાં મૂક્યું હતું અને તેનો વ્યાપકપણે ઉપયોગ થઈ રહ્યો છે.”
મને નહોતું લાગતું કે આવી ચર્ચા થશે – ધર્મલિંગમ
પ્રોફેસર ઉદય કુમાર ધર્મલિંગમે ઉમેર્યું, “રૂપિયાના પ્રતીકના ડિઝાઇનર બનવાનો મને ખરેખર આનંદ છે, પરંતુ મેં ક્યારેય વિચાર્યું ન હતું કે ક્યારેય આવી ચર્ચા થશે. કોઈક રીતે આ વળાંક આવ્યો અને હવે પ્રતીક વિશે ઘણી ચિંતાઓ છે.”
અમે દેવનાગરીનો ઉપયોગ ઇચ્છતા નથી – ડૉ. જે. જયરંજન
તમિલનાડુ રાજ્ય આયોજન પંચના એક્ઝિક્યુટિવ વાઇસ-ચેરમેન ડૉ. જે. જયરાજને તમિલનાડુ બજેટ 2025-26 માં રૂપિયાના પ્રતીક (₹) ને તમિલમાં બદલવાના તમિલનાડુ સરકારના નિર્ણય પર પણ કહ્યું – “અમે દેવનાગરીનો ઉપયોગ કરવા માંગતા નથી. બસ એટલું જ.”
