જો તમે હોમ લોન અથવા કાર લોન લેવાનું વિચારી રહ્યા છો, તો આ સમાચાર તમારા માટે ઉપયોગી છે. એટલું જ નહીં, જો તમારી હોમ લોનની EMI પહેલેથી ચાલી રહી હોય તો પણ આ સમાચાર તમને ચોક્કસ રાહત આપશે. 44મી મોનેટરી પોલિસી રિવ્યુ મીટિંગ (MPC મીટીંગ)માં રિઝર્વ બેંક ઓફ ઈન્ડિયા (RBI) દ્વારા રેપો રેટમાં કોઈ ફેરફાર કરવામાં આવ્યો નથી. એપ્રિલ, જૂન અને હવે ઓગસ્ટમાં આ સતત ત્રીજી વખત છે જ્યારે રિઝર્વ બેંકે રેપો રેટને જૂના સ્તરે રાખ્યો છે. જૂનમાં આરબીઆઈએ રેપો રેટને 6.5 ટકાના સમાન સ્તરે જાળવી રાખ્યો હતો.
રેપો રેટ 6.5 ટકા પર યથાવત
આરબીઆઈ ગવર્નર શક્તિકાંત દાસે ગુરુવારે એમપીસીની બેઠકમાં લેવાયેલા નિર્ણય વિશે માહિતી આપી હતી. તેમણે કહ્યું કે સતત ત્રીજી વખત સર્વસંમતિથી રેપો રેટ 6.5 ટકા પર યથાવત રાખવામાં આવ્યો છે. આ પહેલા સતત વધતી મોંઘવારી પર અંકુશ મેળવવા માટે આરબીઆઈએ રેપો રેટમાં અઢી ટકાનો વધારો કર્યો હતો. રેપો રેટમાં આ ફેરફાર મે 2022થી માર્ચ 2023 દરમિયાન કરવામાં આવ્યો હતો. ગયા વર્ષે મે 2022 સુધી રેપો રેટ 4 ટકાના દરે ચાલી રહ્યો હતો. પરંતુ હાલમાં તેનો દર 6.5 ટકા છે.
EMI પર કોઈ અસર નહીં
RBI તરફથી સતત ત્રીજી વખત રેપો રેટમાં કોઈ ફેરફાર કરવામાં આવ્યો નથી. એટલે કે રેપો રેટ જૂના સ્તરે યથાવત છે. આમાં કોઈ ફેરફાર ન થવાને કારણે તમારી EMI પણ જૂના સ્તર પર જ રહેશે. જો કે આગામી સમયમાં બેંકો દ્વારા FDના વ્યાજ દરમાં ઘટાડો કરવામાં આવી શકે છે. તમને જણાવી દઈએ કે રેપો રેટ હાલમાં છેલ્લા ચાર વર્ષમાં સૌથી ઊંચા સ્તરે ચાલી રહ્યો છે. ગયા વર્ષે, રિઝર્વ બેંકે વધતી જતી મોંઘવારી પર અંકુશ મેળવવા માટે વ્યાજ દરમાં વધારો કરવાની પ્રક્રિયા શરૂ કરી હતી. આ પછી મોંઘવારી દરમાં ઘટાડો જોવા મળ્યો હતો.
કોને મળશે રાહત?
બેંકમાંથી લોન લેવાનું વિચારી રહેલા ગ્રાહકોને રેપો રેટમાં કોઈ ફેરફાર નહીં કરવાનો લાભ મળશે. અત્યારે બેંકો દ્વારા કોઈપણ પ્રકારની લોન પર વ્યાજ દરમાં વધારો કરવામાં આવશે નહીં. જો RBI દ્વારા રેપો રેટમાં વધારો કરવામાં આવશે તો તેની અસર ગ્રાહકોને મળતી લોન પર પડશે.
રેપો રેટ શું છે?
RBI દ્વારા બેંકોને જે દરે લોન આપવામાં આવે છે તેને રેપો રેટ કહેવામાં આવે છે. રેપો રેટ વધારવાનો અર્થ એ છે કે બેંકોને આરબીઆઈ પાસેથી મોંઘા દરે લોન મળશે. તેનાથી હોમ લોન, કાર લોન અને પર્સનલ લોન વગેરેના વ્યાજ દરમાં વધારો થશે, જેની સીધી અસર તમારી EMI પર પડશે.
