જુવાર ટિક્કી (Jowar Tikki) – હેલ્ધી અને સ્વાદિષ્ટ નાસ્તો
જુવાર ટિક્કી એક ખૂબ જ પૌષ્ટિક, હેલ્ધી અને સ્વાદિષ્ટ નાસ્તો છે. જુવાર એક મિલેટ છે, જે ફાઇબરથી ભરપૂર હોય છે અને પચવામાં સરળ છે. ડાયાબિટીસ, વજન ઘટાડવા ઈચ્છતા લોકો અને બાળકો માટે આ ટિક્કી ખૂબ જ ઉત્તમ વિકલ્પ છે. તેમાં તાજા શાકભાજી ઉમેરવાથી તેનો સ્વાદ અને પોષક તત્ત્વો બંને વધે છે.
સામગ્રી
- જુવારનો લોટ – 1 કપ
- સમારેલી ડુંગળી – 1 નંગ
- સમારેલી કોબીજ – 1 કપ
- સમારેલું કેપ્સિકમ – 1/4 કપ
- સમારેલું ગાજર – 1/4 કપ
- સમારેલી તાજી કોથમીર – 1/4 કપ
- દહીં – 3 ચમચી
- આદું-લસણની પેસ્ટ – 1 ચમચી
- મરી પાવડર – 1/4 ચમચી
- ચાટ મસાલો – 1/2 ચમચી
- મીઠું – સ્વાદ મુજબ
- પાણી – જરૂર મુજબ
- તેલ – શેકવા માટે
બનાવવાની વિસ્તૃત રીત
1.મિશ્રણ તૈયાર કરવું
- સૌ પ્રથમ એક મોટો મિક્સિંગ બાઉલ લો. તેમાં જુવારનો લોટ ઉમેરો.
- હવે તેમાં સમારેલી ડુંગળી, કોબીજ, કેપ્સિકમ, ગાજર અને કોથમીર ઉમેરો.
- બધી શાકભાજી બારીક સમારેલી હોવી જોઈએ જેથી ટિક્કી સારી રીતે બાંધી રહે.
2. મસાલા અને દહીં ઉમેરવું
- હવે આ મિશ્રણમાં દહીં ઉમેરો. દહીંથી ટિક્કી નરમ અને સ્વાદિષ્ટ બને છે.
- પછી આદું-લસણની પેસ્ટ, મરી પાવડર, ચાટ મસાલો અને મીઠું ઉમેરો.
- બધી સામગ્રીને હાથથી અથવા ચમચીથી સારી રીતે મિક્સ કરો.
3.લોટ જેવું મિશ્રણ બનાવવું
- હવે જરૂર મુજબ થોડું-થોડું પાણી ઉમેરતા જાવ અને મધ્યમ કઠણ લોટ જેવું મિશ્રણ તૈયાર કરો.
- ધ્યાન રાખવું કે મિશ્રણ બહુ ઢીલું ન રહે, નહિતર ટિક્કી તૂટશે.
4.ટિક્કી આકાર આપવો
- તૈયાર મિશ્રણમાંથી લીંબુ જેટલા બોલ લો અને તેને હથેળીથી દબાવી ગોળ અથવા ચપટી ટિક્કી બનાવો.
- બધી ટિક્કી તૈયાર કરીને એક બાજુ રાખો.
5. ટિક્કી શેકવી
- હવે એક નોન-સ્ટિક પેન અથવા તવો લો અને તેમાં થોડું તેલ ગરમ કરો.
- તેલ ગરમ થાય પછી ટિક્કીઓને પેનમાં મૂકો.
- ધીમા તાપે બંને બાજુ ગોલ્ડન બ્રાઉન અને ક્રિસ્પી થાય ત્યાં સુધી શેલો ફ્રાય કરો.
- વારંવાર પલટાવશો નહીં, નહિતર ટિક્કી તૂટી શકે.
પીરસવાની રીત
- ગરમા-ગરમ જુવાર ટિક્કી કોથમીરની ચટણી, પુદીનાની ચટણી અથવા સાદા દહીં સાથે પીરસો.
- સાંજના નાસ્તામાં ચા સાથે પણ આ ટિક્કી બહુ સ્વાદિષ્ટ લાગે છે.
- બાળકોના લંચ બોક્સમાં પણ મૂકી શકાય છે હેલ્ધી અને પેટ ભરાવનારો વિકલ્પ છે.
