આ દિવાળીએ ઘૂઘરાને બદલે બનાવો માવા ભરપૂર ચંદ્રકલા મીઠાઈ, જાણી લો સૌથી સરળ રેસિપી

દિવાળીમાં ઘૂઘરાને બદલે બનાવો સ્વાદિષ્ટ ચંદ્રકલા મીઠાઈ, માવા અને ડ્રાયફ્રૂટ્સથી ભરપૂર આ મીઠાઈ ખાઈને મહેમાનો પણ થઈ જશે ખુશ!

દિવાળીનો તહેવાર નજીક આવે એટલે ઘરમાં મીઠાઈ અને ફરસાણ બનાવવાની તૈયારીઓ શરૂ થઈ જાય છે. દિવાળીના દિવસોમાં મહેમાનોનું સ્વાગત મીઠાઈથી કરવામાં આવે છે. સામાન્ય રીતે લોકો બજારમાંથી કાજુ કતરી, મોહનથાળ, ઘૂઘરા અને અન્ય મીઠાઈઓ ખરીદતા હોય છે. પરંતુ આ વખતે જો તમે ઘરે જ કંઈક નવું અને સ્વાદિષ્ટ બનાવવાનું વિચારી રહ્યા હોવ તો ચંદ્રકલા મીઠાઈ એક ઉત્તમ વિકલ્પ છે.

ચંદ્રકલા ઉત્તર ભારતની જાણીતી પરંપરાગત મીઠાઈ છે. દેખાવમાં તે ઘૂઘરા જેવી લાગે છે, પરંતુ તેની બનાવવાની રીત અને સ્વાદ તેને ખાસ બનાવે છે. માવો, બદામ, કાજુ, કિસમિસ અને નારિયેળના પૂરણથી તૈયાર થતી આ મીઠાઈ બહારથી એકદમ ક્રિસ્પી અને અંદરથી નરમ હોય છે. ઉપરથી કેસર અને એલચીની સુગંધવાળી ચાસણીનો સ્વાદ તેને વધુ ખાસ બનાવે છે. તો ચાલો જાણીએ ઘરે ચંદ્રકલા મીઠાઈ બનાવવાની સરળ રેસિપી.

ચંદ્રકલા બનાવવા માટે જરૂરી સામગ્રી

પૂરણ તૈયાર કરવા માટે:

• 1 કપ માવો (ખોયા)
• 2 મોટી ચમચી સમારેલી બદામ
• 2 મોટી ચમચી સમારેલા કાજુ
• 2 મોટી ચમચી છીણેલું નારિયેળ
• 2 મોટી ચમચી કિસમિસ
• 1 મોટી ચમચી ઘી

લોટ બાંધવા માટે:

• 2 કપ મેંદો
• 2 મોટી ચમચી ઘી
• એક ચપટી બેકિંગ પાવડર
• એક ચપટી મીઠું
• જરૂર મુજબ પાણી
• તળવા માટે ઘી અથવા તેલ

ચાસણી બનાવવા માટે:

• 1 કપ ખાંડ
• અડધો કપ પાણી
• ¼ નાની ચમચી એલચી પાવડર
• કેસરના થોડા તાંતણા

ચંદ્રકલા મીઠાઈ બનાવવાની સરળ રીત

1. સૌપ્રથમ તૈયાર કરો માવાનું પૂરણ

એક કઢાઈમાં ઘી ગરમ કરો. તેમાં સમારેલી બદામ, કાજુ, કિસમિસ અને છીણેલું નારિયેળ ઉમેરીને થોડું સાંતળો. હવે તેમાં માવો ઉમેરીને ધીમી આંચ પર બધી સામગ્રી બરાબર મિક્સ કરો. માવો થોડો શેકાઈ જાય અને મિશ્રણ એકરસ થઈ જાય એટલે ગેસ બંધ કરી દો. આ પૂરણને ઠંડું થવા માટે રાખો.

2. ચંદ્રકલા માટે બાંધો લોટ

એક મોટા વાસણમાં મેંદો, ઘી, બેકિંગ પાવડર અને મીઠું મિક્સ કરો. હવે થોડું-થોડું પાણી ઉમેરીને થોડો કઠણ અને સુંવાળો લોટ બાંધી લો. લોટને ઢાંકીને લગભગ 20 મિનિટ માટે બાજુ પર રાખો.

3. ચંદ્રકલાને આપો સુંદર આકાર

લોટના નાના-નાના લૂઆ બનાવીને ગોળ પૂરી વણી લો. એક પૂરીની વચ્ચે તૈયાર કરેલું માવા અને ડ્રાયફ્રૂટ્સનું પૂરણ મૂકો. તેની કિનારીઓ પર થોડું પાણી લગાવી બીજી પૂરી ઉપર મૂકો. બંને પૂરીની કિનારીઓને સારી રીતે દબાવીને બંધ કરો. ત્યારબાદ હાથથી કિનારીઓને વાળીને સુંદર ડિઝાઇન આપી શકો છો.

4. ધીમી આંચ પર તળો

કઢાઈમાં ઘી અથવા તેલ ગરમ કરો. તેમાં તૈયાર કરેલી ચંદ્રકલાને ધીમીથી મધ્યમ આંચ પર ગોલ્ડન બ્રાઉન થાય ત્યાં સુધી તળો. ઉતાવળમાં વધારે ગરમ તેલમાં તળશો નહીં, કારણ કે બહારથી મીઠાઈ ઝડપથી શેકાઈ જશે અને અંદરથી કાચી રહી શકે છે.

5. તૈયાર કરો કેસરવાળી મીઠી ચાસણી

એક વાસણમાં ખાંડ અને પાણી મિક્સ કરીને ગરમ કરો. ચાસણી એક તારની બને ત્યાં સુધી ઉકાળો. ત્યારબાદ તેમાં એલચી પાવડર અને કેસરના તાંતણા ઉમેરીને બરાબર મિક્સ કરો.

6. છેલ્લે ચાસણીમાં બોળીને પીરસો

હવે તળેલી ચંદ્રકલાને ગરમ ચાસણીમાં નાખીને લગભગ 2થી 3 મિનિટ સુધી રહેવા દો. ત્યારબાદ બહાર કાઢીને થોડી વાર ઠંડી થવા દો. તમારી સ્વાદિષ્ટ ચંદ્રકલા મીઠાઈ તૈયાર છે.

આ દિવાળીએ ઘરે બનાવો કંઈક ખાસ

ચંદ્રકલા મીઠાઈનો સૌથી મોટો ફાયદો એ છે કે તેને ઘરે સરળતાથી બનાવી શકાય છે. તેમાં માવો અને ડ્રાયફ્રૂટ્સ હોવાથી તેનો સ્વાદ પણ ખૂબ જ સરસ આવે છે. દિવાળીમાં ઘરે આવતા મહેમાનોને ચા સાથે આ મીઠાઈ પીરસશો તો ચોક્કસ તેઓને પસંદ આવશે.

એક ખાસ ટિપ્સ એ છે કે ચંદ્રકલા બનાવતી વખતે પૂરણ સંપૂર્ણ ઠંડું થયા પછી જ તેનો ઉપયોગ કરવો અને કિનારીઓ સારી રીતે બંધ કરવી. આથી તળતી વખતે પૂરણ બહાર નહીં આવે અને મીઠાઈનો આકાર પણ સુંદર રહેશે. તો આ દિવાળીએ બજારમાંથી મીઠાઈ લાવવાને બદલે ઘરે જ બનાવો સ્વાદિષ્ટ ચંદ્રકલા અને તહેવારની મીઠાશ બમણી કરો!