અર્જુન રણતુંગાએ શેન વોર્નને ‘ઓવરરેટેડ’ કહ્યાના 30 વર્ષ બાદ મોટો ખુલાસો, અરવિંદ ડી સિલ્વાએ જણાવ્યું શું થયું હતું
ક્રિકેટ ઈતિહાસમાં અર્જુન રણતુંગા અને શેન વોર્ન વચ્ચેની દુશ્મનાવટ જગજાહેર છે. આ બંને દિગ્ગજો ક્યારેય એકબીજાના મિત્ર રહ્યા નથી. રણતુંગાએ તો ત્યાં સુધી કહ્યું હતું કે વોર્ન એક ‘ઓવરરેટેડ’ બોલર છે અને યુવાનો માટે ‘રોલ મોડેલ’ નથી. હવે વોર્નના અવસાનના ચાર વર્ષ બાદ, શ્રીલંકાના પૂર્વ દિગ્ગજ બેટ્સમેન અરવિંદ ડી સિલ્વાએ આ વિવાદ અને તેના કારણે વોર્નની માનસિકતા પર થયેલી અસર વિશે એક રસપ્રદ કિસ્સો શેર કર્યો છે.
રણતુંગાની માઈન્ડ ગેમ: ફાઈનલ પહેલા વોર્નને કર્યા પરેશાન
અરવિંદ ડી સિલ્વાએ એક કાર્યક્રમ દરમિયાન ખુલાસો કર્યો કે ૧૯૯૬ના વર્લ્ડ કપ ફાઈનલ પહેલા રણતુંગાએ જાણીજોઈને એક નિવેદન આપ્યું હતું. રણતુંગાએ કહ્યું હતું કે, “મને સમજાતું નથી કે લોકો શેન વોર્નની આટલી પ્રશંસા કેમ કરે છે, તે કોઈ મહાન બોલર નથી.” ડી સિલ્વાના મતે, આ વિરોધી ખેલાડીના મગજમાં ઘૂસી જવાની એક રીત હતી અને તે સંપૂર્ણપણે સફળ રહી હતી.
ડી સિલ્વાએ જણાવ્યું કે, નિવૃત્તિના ઘણા સમય બાદ શેન વોર્ને પોતે આ વાતનો સ્વીકાર કર્યો હતો. વોર્ને કહ્યું હતું કે, “હવે મને સમજાયું કે રણતુંગાએ એવું કેમ કહ્યું હતું. તે વાત મારા મનમાં એટલી ઊંડી બેસી ગઈ હતી કે જ્યારે પણ હું તેમને બોલિંગ કરતો ત્યારે મારું ધ્યાન બોલિંગ પર નહીં, પણ તેમને આઉટ કરવા પર જ રહેતું હતું. આ કારણે હું મારી લય ગુમાવી બેઠો હતો.”
૧૯૯૬ વર્લ્ડ કપ ફાઈનલ: જ્યારે રણતુંગાએ વોર્નને હરાવ્યા
રણતુંગાની ટિપ્પણીની અસર ૧૯૯૬ના વર્લ્ડ કપ ફાઈનલમાં સાફ જોવા મળી હતી. ૨૪૨ રનના લક્ષ્યનો પીછો કરતી વખતે જ્યારે રણતુંગા બેટિંગમાં આવ્યા, ત્યારે શેન વોર્ન તેમને જોઈને ભડકી ગયા હતા. વોર્ને રણતુંગાને ઘૂરીને જોયા હતા, પરંતુ શ્રીલંકન કેપ્ટન શાંત રહ્યા. વોર્ને રણતુંગાને ઉશ્કેરવાના ચક્કરમાં ઘણી નબળી ગેંદો ફેંકી, જેનો રણતુંગાએ ભરપૂર ફાયદો ઉઠાવ્યો. રણતુંગા ૩૭ બોલમાં ૪૭ રન બનાવી અણનમ રહ્યા અને શ્રીલંકાને પ્રથમ વખત વર્લ્ડ કપ જીતાડ્યો.
આંકડાકીય સરખામણી: બે દિગ્ગજોની કારકિર્દી
ભલે મેદાનની બહાર બંને વચ્ચે મતભેદો રહ્યા હોય, પરંતુ બંનેએ ક્રિકેટમાં અપ્રતિમ સિદ્ધિઓ હાંસલ કરી છે:
અર્જુન રણતુંગા: ૮૩ ટેસ્ટમાં ૫૧૦૫ રન અને વનડેમાં ૭૪૫૬ રન. શ્રીલંકાને વિશ્વ વિજેતા બનાવનાર કેપ્ટન.
શેન વોર્ન: ક્રિકેટ ઇતિહાસના મહાન લેગ-સ્પિનર. ૧૪૫ ટેસ્ટમાં ૭૦૮ વિકેટ અને વનડેમાં ૨૯૩ વિકેટ. ૧૯૯૯ના વર્લ્ડ કપ વિજેતા ટીમનો ભાગ.
“Arjuna said Warne wasn’t a great bowler…”
30 years later, Aravinda reveals what happened next.
“Warne told me he lost control… he only wanted Arjuna’s wicket.”
Mind games. Big stage. Big impact. pic.twitter.com/34ycroOb5w
— NewsWire (@NewsWireLK) March 17, 2026
વોર્ને પોતાની કિતાબ ‘શુન વોર્ન્સ સેન્ચુરી’માં રણતુંગાને પોતાના ટોપ ૧૦૦ ક્રિકેટરોમાં ૯૩માં નંબરે રાખ્યા હતા, જે દર્શાવે છે કે નિવૃત્તિ બાદ પણ તે ખટાશ પૂરી થઈ નહોતી. જોકે, ડી સિલ્વાનો આ ખુલાસો સાબિત કરે છે કે ક્રિકેટ માત્ર કૌશલ્યની જ નહીં, પણ માનસિક મજબૂતીની પણ રમત છે.
