WPL 2026: ફાઇનલિસ્ટ ટીમો નક્કી, ખિતાબી મુકાબલો આ દિવસે રમાશે
મહિલા પ્રીમિયર લીગ (WPL) 2026 હવે પોતાના અંતિમ ચરણમાં પહોંચી ગઈ છે. એલિમિનેટર મેચમાં દિલ્હી કેપિટલ્સે શાનદાર પ્રદર્શન કરતા ગુજરાત જાયન્ટ્સને 7 વિકેટે હરાવીને ફાઇનલમાં પોતાની જગ્યા પાકી કરી લીધી છે. આ જીત સાથે જ WPL 2026ની ફાઇનલમાં ટકરાવનારી બંને ટીમોના નામ સામે આવી ગયા છે.
એલિમિનેટર મેચમાં દિલ્હીનું દમદાર પ્રદર્શન
WPL 2026ની એલિમિનેટર મેચ વડોદરાના કોટામ્બી સ્ટેડિયમ ખાતે રમાઈ હતી. આ મેચમાં ગુજરાત જાયન્ટ્સે ટોસ જીતીને પહેલા બેટિંગ કરવાનો નિર્ણય લીધો, પરંતુ દિલ્હી કેપિટલ્સના મજબૂત બોલિંગ સામે ગુજરાતની ટીમ મોટો સ્કોર બનાવવામાં નિષ્ફળ રહી. ગુજરાત તરફથી બેથ મૂનીએ અડધી સદીની લડાકૂ ઇનિંગ્સ રમી, છતાં ટીમ માત્ર 168 રન સુધી જ પહોંચી શકી.169 રનના લક્ષ્યનો પીછો કરવા ઉતરેલી દિલ્હી કેપિટલ્સની શરૂઆત શાનદાર રહી. શેફાલી વર્મા, લિઝેલ લી અને કેપ્ટન જેમિમાહ રોડ્રિગ્સે ઉત્તમ બેટિંગ કરી અને ટીમને સરળ જીત અપાવી. દિલ્હીએ માત્ર 3 વિકેટ ગુમાવીને લક્ષ્ય હાંસલ કરી લીધું અને એકતરફી રીતે મેચ જીતી લીધી.
ફાઇનલમાં દિલ્હી અને RCB વચ્ચે ટક્કર
આ જીત સાથે દિલ્હી કેપિટલ્સ ફાઇનલમાં પહોંચી ગઈ છે, જ્યાં તેનો મુકાબલો રોયલ ચેલેન્જર્સ બેંગલોર (RCB) સામે થશે. RCB પહેલેથી જ ફાઇનલ માટે ક્વોલિફાય કરી ચૂકી હતી. હવે WPL 2026ની ખિતાબી મેચમાં આ બે દિગ્ગજ ટીમો આમને-સામને આવશે.
WPL 2026 ફાઇનલ શેડ્યૂલ
મહિલા પ્રીમિયર લીગ 2026ની ફાઇનલ મેચ 5 ફેબ્રુઆરીના રોજ વડોદરાના કોટામ્બી સ્ટેડિયમ ખાતે રમાશે. મેચ સાંજે 7:30 વાગ્યે શરૂ થશે, જ્યારે ટોસ માટે બંને ટીમોના કેપ્ટન 7 વાગ્યે મેદાન પર ઉતરશે.આ મેચમાં રોયલ ચેલેન્જર્સ બેંગલોરની કમાન સ્મૃતિ માંધાણા સંભાળશે, જ્યારે દિલ્હી કેપિટલ્સની આગેવાની જેમિમાહ રોડ્રિગ્સ કરશે. બંને કેપ્ટનોએ સમગ્ર સીઝનમાં શાનદાર નેતૃત્વ કર્યું છે, જેના કારણે તેમની ટીમો ફાઇનલ સુધી પહોંચી શકી છે.
RCB અને દિલ્હીનો ફાઇનલનો ઇતિહાસ
રોયલ ચેલેન્જર્સ બેંગલોરે અગાઉ 2024માં WPL ખિતાબ જીત્યો હતો. જ્યારે બાકી બે સીઝનમાં ટીમ લીગ સ્ટેજમાંથી જ બહાર થઈ ગઈ હતી. આ વખતે RCB બીજી વાર ટ્રોફી જીતવાના ઇરાદા સાથે મેદાનમાં ઉતરશે.બીજી તરફ, દિલ્હી કેપિટલ્સની ટીમ દરેક સીઝનમાં ફાઇનલ સુધી પહોંચી છે, પરંતુ હજી સુધી એકપણ વખત ખિતાબ જીતવામાં સફળ રહી નથી. આ સીઝનમાં દિલ્હી પાસે પોતાનો પહેલો WPL ખિતાબ જીતવાની સુવર્ણ તક છે.
ફાઇનલ માટે ઉત્સાહ ચરમસીમાએ
WPL 2026ની ફાઇનલને લઈને ચાહકોમાં ભારે ઉત્સાહ જોવા મળી રહ્યો છે. એક તરફ અનુભવી અને સંતુલિત RCB છે, તો બીજી તરફ સતત ફાઇનલમાં પહોંચતી પરંતુ ટ્રોફીથી દૂર રહેલી દિલ્હી કેપિટલ્સ. હવે જોવું રસપ્રદ રહેશે કે આ વખતે ઇતિહાસ બદલાશે કે RCB પોતાનું બીજું ખિતાબ જીતશે.
