ચાહકોના વિરોધ બાદ હેમ્પશાયર દ્વારા ન્યૂઝીલેન્ડના ઓલરાઉન્ડરને પડતો મૂકવામાં આવ્યો: ખેલાડી પર હતા બળાત્કારના આરોપો
ઈંગ્લિશ કાઉન્ટી ક્રિકેટમાંથી એક મોટો નિર્ણય સામે આવ્યો છે. હેમ્પશાયર ક્રિકેટ ક્લબે ન્યૂઝીલેન્ડના ઓલરાઉન્ડર સ્કોટ કુગેલેઇજનને પોતાની ટીમમાંથી બહાર કરી દીધો છે. ક્લબે તાજેતરમાં જ કાઉન્ટી ચેમ્પિયનશિપની બાકીની ચાર મેચો માટે કુગેલેઇજન સાથે કરાર કર્યો હતો. જોકે, વોરવિકશાયર સામેની મેચ માટે 15 સભ્યોની ટીમમાં તેનું નામ સામે આવતા જ સોશિયલ મીડિયા અને ક્રિકેટ ચાહકોમાં ભારે આક્રોશ જોવા મળ્યો હતો, જેના પરિણામે ક્લબે 24 કલાકની અંદર પોતાના નિર્ણયમાં ફેરફાર કરવો પડ્યો છે.
તીવ્ર વિરોધ બાદ ક્લબે જારી કર્યું સત્તાવાર નિવેદન
સ્કોટ કુગેલેઇજનને ટીમમાં સામેલ કરવાના નિર્ણય સામે ચાહકો અને ક્લબના કર્મચારીઓએ વિરોધ નોંધાવ્યો હતો. સોશિયલ મીડિયા પર ચાહકોના વિરોધ અને મેચ બાયકોટની ચીમકી બાદ હેમ્પશાયર ક્રિકેટે 2 સપ્ટેમ્બરે એક સત્તાવાર નિવેદન બહાર પાડીને સ્થિતિ સ્પષ્ટ કરી હતી.
ક્લબે જણાવ્યું હતું કે, “અમારા સ્ટાફ અને ચાહકોના પ્રતિભાવો તેમજ મંતવ્યોને ધ્યાનમાં લીધા પછી, હેમ્પશાયર ક્રિકેટ પુષ્ટિ કરે છે કે સ્કોટ કુગેલેઇજન ક્લબનું પ્રતિનિધિત્વ નહીં કરે. અમે અમારા ચાહકોના જુસ્સાનું સન્માન કરીએ છીએ અને તેમના વિચારો રજૂ કરવા બદલ આભાર માનીએ છીએ. હવે અમારું સંપૂર્ણ ધ્યાન કાઉન્ટી ચેમ્પિયનશિપની અંતિમ ચાર મેચો દરમિયાન ટીમને સમર્થન આપવા પર છે. અમે દરેકને વિનંતી કરીએ છીએ કે આ નિર્ણાયક તબક્કામાં ટીમ સાથે એક થઈને ઊભા રહે.”
જૂના વિવાદો અને નિર્દોષ છુટકારો
34 વર્ષીય સ્કોટ કુગેલેઇજન પર વર્ષ 2015માં બળાત્કાર અને લૈંગિક શોષણનો ગંભીર આરોપ લાગ્યો હતો. આ મામલે તેના પર બે વખત ટ્રાયલ ચાલી હતી. 2016માં યોજાયેલી પ્રથમ ટ્રાયલમાં જ્યુરી કોઈ ચોક્કસ નિર્ણય પર પહોંચી શકી ન હતી, જ્યારે 2017માં યોજાયેલી બીજી ટ્રાયલમાં અદાલતે તેને તમામ આરોપોમાંથી મુક્ત (નિર્દોષ) જાહેર કર્યો હતો.
નિર્દોષ છૂટ્યા હોવા છતાં, જ્યારે પણ તેની પસંદગી થાય છે ત્યારે વિવાદો સર્જાય છે. આ અગાઉ 2023માં જ્યારે ન્યૂઝીલેન્ડ ટીમે ઈંગ્લેન્ડ સામેની ટેસ્ટ મેચ માટે ઘાયલ કાયલ જેમીસનના સ્થાને કુગેલેઇજનનો સમાવેશ કર્યો હતો, ત્યારે પણ ચાહકો દ્વારા ઉગ્ર વિરોધ કરવામાં આવ્યો હતો. તે સમયે ન્યૂઝીલેન્ડના હેડ કોચ ગેરી સ્ટેડે આ પસંદગીનો બચાવ કર્યો હતો.
A statement from Hampshire Cricket. pic.twitter.com/S2Zf6dyqZw
— Hampshire Cricket (@hantscricket) September 2, 2026
આંતરરાષ્ટ્રીય ક્રિકેટ કારકિર્દી
કુગેલેઇજને ન્યૂઝીલેન્ડ માટે તમામ ત્રણ ફોર્મેટમાં પ્રતિનિધિત્વ કર્યું છે, જેમાં તેણે 3 ટેસ્ટ, 2 વનડે અને 18 T20 આંતરરાષ્ટ્રીય મેચો રમી છે. તેણે માર્ચ 2024માં ક્રાઈસ્ટચર્ચમાં ઓસ્ટ્રેલિયા સામે પોતાની છેલ્લી આંતરરાષ્ટ્રીય મેચ રમી હતી. હાલમાં હેમ્પશાયરની ટીમ પોઈન્ટ ટેબલમાં તળિયે છે અને રેલિગેશનથી બચવા માટે સંઘર્ષ કરી રહી છે, પરંતુ ચાહકોની લાગણીઓને ધ્યાનમાં રાખીને ક્લબે આ ખેલાડીને રમાડવાનો ઈનકાર કરી દીધો છે.
