IPL 2026: ‘પહેલા જ બોલે સૂર્યવંશીની વિકેટ લેવાનો પ્લાન હતો’ – જાણો કોણ છે ડ્રીમ ડેબ્યૂ કરનાર પ્રફુલ્લ હિંગે
ક્રિકેટની દુનિયામાં ઘણીવાર એવું બને છે કે રાતોરાત કોઈ અજાણ્યો ચહેરો આખા દેશની હેડલાઈન્સ બની જાય છે. સોમવારની રાત્રે આઈપીએલના મેદાનમાં કંઈક આવું જ જોવા મળ્યું. મેચ પહેલા કદાચ ગણ્યા-ગાંઠ્યા લોકોએ જ પ્રફુલ્લ હિંગેનું નામ સાંભળ્યું હશે, પરંતુ મેચ પૂરી થતા સુધીમાં તો આ 24 વર્ષીય યુવા ઝડપી બોલર સોશિયલ મીડિયા પર છવાઈ ગયો હતો.
રાજસ્થાન રોયલ્સ અને સનરાઇઝર્સ હૈદરાબાદ વચ્ચેની આ હાઈ-વોલ્ટેજ મેચમાં પ્રફુલ્લ હિંગેએ જે રીતે ડેબ્યૂ કર્યું, તે કોઈ સપનાથી ઓછું નહોતું.
ઈશાન કિશનનો માસ્ટરસ્ટ્રોક અને પ્રફુલ્લનું તાંડવ
મેચ શરૂ થઈ ત્યારે બધાની નજર રાજસ્થાન રોયલ્સના ઓપનર્સ વૈભવ સૂર્યવંશી અને યશસ્વી જાયસવાલ પર હતી, જેઓ અત્યારે શાનદાર ફોર્મમાં છે. પરંતુ હૈદરાબાદના કેપ્ટન ઈશાન કિશને સૌને ચોંકાવતા બોલિંગની કમાન ડેબ્યૂ કરી રહેલા પ્રફુલ્લ હિંગેને સોંપી. રાજસ્થાનના બેટ્સમેનોએ કદાચ પ્રફુલ્લ વિશે ખાસ પ્લાનિંગ કર્યું નહોતું, અને તેનો જ ફાયદો પ્રફુલ્લને મળ્યો.
પોતાની પ્રથમ ઓવરના બીજા જ બોલે પ્રફુલ્લએ ખતરનાક વૈભવ સૂર્યવંશીને આઉટ કર્યો. ચોથા બોલે ધ્રુવ જુરેલ અને છેલ્લા બોલે પ્રિટોરિયસને પેવેલિયન ભેગા કરીને રાજસ્થાનની કમર તોડી નાખી. પ્રફુલ્લએ પોતાની 4 ઓવરમાં 34 રન આપીને 4 મહત્વની વિકેટો ઝડપી. સૌથી પ્રભાવશાળી વાત એ રહી કે તેણે 13 ડોટ બોલ ફેંક્યા હતા.
‘મેં પહેલા જ લખી રાખ્યું હતું કે હું 4-5 વિકેટ લઈશ’
મેચ બાદ પ્રફુલ્લએ પોતાની સફળતા વિશે વાત કરતા એક દિલચસ્પ ખુલાસો કર્યો. તેણે કહ્યું, “મેં ક્યાંક લખી રાખ્યું હતું કે જ્યારે પણ હું મારી પહેલી મેચ રમીશ, ત્યારે હું ચોક્કસપણે ચાર કે પાંચ વિકેટ લઈશ. હું માનસિક રીતે તૈયાર હતો કે મારે પાવરપ્લેમાં પ્રભુત્વ જમાવવું છે. હું માનું છું કે ઘણીવાર આપણે જે વિચારીએ છીએ, તે સાચું પડે છે.”
વૈભવ સૂર્યવંશીની વિકેટ વિશે વાત કરતા તેણે ઉમેર્યું, “વૈભવની વિકેટ મારી ફેવરિટ હતી. તે જબરદસ્ત ફોર્મમાં હતો અને મેં પહેલા જ નક્કી કર્યું હતું કે તેને પહેલો બોલ બાઉન્સર નાખીને આઉટ કરીશ. આ પ્લાનિંગમાં અમારા બોલિંગ કોચ વરુણ એરોને મને ઘણી મદદ કરી.”
નાગપુરથી આઈપીએલ સુધીની સફર
પ્રફુલ્લ હિંગેનો જન્મ નાગપુરમાં થયો છે. તેણે 13 વર્ષની ઉંમરે ક્રિકેટ રમવાની શરૂઆત કરી હતી. શરૂઆતમાં તેના પિતાએ તેને ક્લબ જોઈન કરવાની ના પાડી હતી કારણ કે તે ખૂબ નાનો હતો, પણ પછીથી તેની ધગશ જોઈને તેઓ તેને મેદાનમાં લઈ ગયા.
- ફર્સ્ટ-ક્લાસ ડેબ્યૂ: ઓક્ટોબર 2024માં વિદર્ભ માટે.
- રેકોર્ડ: 11 ઇનિંગ્સમાં 16 વિકેટ સાથે રણજી ટ્રોફીમાં નિયમિત બોલર રહ્યો.
- આદર્શ: પ્રફુલ્લ ઓસ્ટ્રેલિયન દિગ્ગજ પેંટ કમિન્સને પોતાનો આદર્શ માને છે અને તેની સાથે ડ્રેસિંગ રૂમ શેર કરવાની તેની ઈચ્છા હતી, જે SRH માં પૂરી થઈ.
કેપ્ટન ઈશાન કિશને કર્યા ભારોભાર વખાણ
કેપ્ટન ઈશાન કિશને પ્રફુલ્લના પર્ફોર્મન્સ પર ખુશી વ્યક્ત કરતા કહ્યું, “તમારે ખેલાડીની અંદર કેટલી ભૂખ અને મોટિવેશન છે તે જોવું પડે છે. પ્રફુલ્લ આખી સીઝન વરુણ એરોન સાથે મહેનત કરી રહ્યો હતો અને સિનિયર ખેલાડીઓ પાસેથી સતત શીખતો હતો. આજે તેને હોમ ગ્રાઉન્ડ પર મોકો આપવો એક સાચો નિર્ણય સાબિત થયો.”
નોંધનીય છે કે આ મેચમાં ઈશાન કિશને પોતે પણ શાનદાર બેટિંગ કરી હતી. તેણે માત્ર 44 બોલમાં 91 રન ફટકાર્યા હતા, જેમાં 8 ચોગ્ગા અને 6 છગ્ગા સામેલ હતા.
મેચનું ટૂંકું તારણ
સનરાઇઝર્સ હૈદરાબાદે પહેલા બેટિંગ કરતા 20 ઓવરમાં 6 વિકેટ ગુમાવીને 216 રનનો વિશાળ સ્કોર બનાવ્યો હતો. જવાબમાં રાજસ્થાન રોયલ્સની ટીમ પ્રફુલ્લ હિંગેની ઘાતક બોલિંગ સામે ટકી શકી નહીં અને 19 ઓવરમાં માત્ર 159 રન પર ઓલઆઉટ થઈ ગઈ. આ રીતે હૈદરાબાદે 57 રનથી ભવ્ય વિજય મેળવ્યો.
પ્રફુલ્લ હિંગેનું આ પ્રદર્શન બતાવે છે કે ભારતીય ડોમેસ્ટિક ક્રિકેટમાં કેટલી પ્રતિભા છુપાયેલી છે. હવે જોવાનું એ રહેશે કે આ યુવા બોલર આગામી મેચોમાં પોતાનું આ ફોર્મ જાળવી રાખી શકે છે કે નહીં.
