તિલક વર્મા માટે ‘કાળ’ બન્યો મુકેશ કુમાર: 5 માંથી 4 વાર કર્યો શિકાર, ખાતું ખોલ્યા વગર જ પેવેલિયન ભેગો કર્યો!
IPL 2026 ની 8મી મેચમાં દિલ્હી કેપિટલ્સના ફાસ્ટ બોલર મુકેશ કુમારે મુંબઈ ઈન્ડિયન્સના બેટ્સમેનોની ઊંઘ હરામ કરી દીધી છે. મુંબઈ સામેની આ હાઈ-વોલ્ટેજ મેચમાં દિલ્હીએ ટોસ જીતીને પહેલા બોલિંગ કરવાનો નિર્ણય કર્યો અને મુકેશ કુમારે આ નિર્ણયને સાચો સાબિત કરવામાં જરાય વાર ન લગાડી. પોતાની ધારદાર બોલિંગથી તેણે મુંબઈની મજબૂત બેટિંગ લાઇન-અપના પાયા હચમચાવી દીધા હતા.
એક જ ઓવરમાં મુંબઈને આપ્યા બે મોટા ઝટકા
મેચની શરૂઆતમાં જ મુકેશ કુમારે બોલ હાથમાં લીધો અને ત્રીજી ઓવરમાં પોતાનો અસલી જાદુ બતાવ્યો. આ ઓવરના ત્રીજા બોલ પર તેણે મુંબઈના ઓપનર રાયન રિકલટનને આઉટ કરીને દિલ્હીને પહેલી સફળતા અપાવી. પરંતુ અસલી મજા તો પાંચમા બોલ પર આવી, જ્યારે તેણે મુંબઈના સ્ટાર બેટ્સમેન તિલક વર્માને શૂન્ય રને પેવેલિયનનો રસ્તો બતાવ્યો. મુકેશે એક સ્લોઅર ફુલર બોલ ફેંક્યો, જેના પર તિલક છેતરાઈ ગયો અને હવામાં શોટ રમ્યો. મુકેશ કુમારે જમીન પર સરકતા (ડાઈવ લગાવીને) અદભૂત કેચ ઝડપીને તિલકની ઇનિંગનો અંત આણ્યો હતો.
તિલક વર્મા સામે મુકેશનું શાનદાર ‘રિપોર્ટ કાર્ડ’
આંકડા પર નજર કરીએ તો ખબર પડે છે કે તિલક વર્મા માટે મુકેશ કુમાર સૌથી મોટો પડકાર સાબિત થઈ રહ્યો છે. અત્યાર સુધી આઈપીએલમાં બંને વચ્ચે થયેલા 5 મુકાબલામાં મુકેશે તિલકને 4 વખત આઉટ કર્યો છે. આ દરમિયાન તિલક મુકેશ સામે માત્ર 26 રન જ બનાવી શક્યો છે અને તેની સરેરાશ માત્ર 6.5 ની રહી છે. મુકેશની સચોટ લાઈન-લેન્થ અને સ્લોઅર બોલ તિલક જેવા આક્રમક બેટ્સમેનને સતત મુશ્કેલીમાં મૂકી રહ્યા છે.
પાવરપ્લેમાં મુંબઈની હાલત કફોડી
મુકેશ કુમારની આ ઘાતક બોલિંગને કારણે મુંબઈ ઈન્ડિયન્સે માત્ર 18 રનમાં જ પોતાની 2 મહત્વની વિકેટો ગુમાવી દીધી હતી. જોકે, શરૂઆતના ઝટકા બાદ રોહિત શર્મા અને સૂર્યકુમાર યાદવે દાવ સંભાળ્યો હતો અને પાવરપ્લેના અંતે મુંબઈનો સ્કોર 41 રન સુધી પહોંચાડ્યો હતો. તેમ છતાં, મુકેશ કુમારે જે શરૂઆત દિલ્હીને અપાવી તેનાથી મુંબઈની ટીમ શરૂઆતથી જ દબાણમાં જોવા મળી હતી.
