દુલીપ ટ્રોફીમાં 2 વિકેટ લીધા પછી વૈભવ સૂર્યવંશીએ કર્યો મોટો ખુલાસો; કહ્યું- “કેપ્ટન જાણતા ન હતા કે હું વિકેટ ટેકર બોલર છું”
ભારતીય ઘરેલુ ક્રિકેટની પ્રતિષ્ઠિત દુલીપ ટ્રોફી 2026ની પ્રથમ ક્વાર્ટર ફાઈનલ મેચમાં પૂર્વ ઝોને (East Zone) શાનદાર પ્રદર્શન કરતા ઉત્તર પૂર્વ ઝોન (North East Zone) સામે ઈનિંગ્સ અને 210 રનની ભવ્ય જીત નોંધાવી સેમિફાઈનલમાં સ્થાન બનાવી લીધું છે. ઈશાન કિશનની આગેવાની હેઠળ રમેલી પૂર્વ ઝોનની ટીમમાં 15 વર્ષીય વિસ્ફોટક ખેલાડી વૈભવ સૂર્યવંશી પણ સામેલ હતો. આ મેચમાં વૈભવ બેટથી માત્ર 8 રન બનાવી આઉટ થયો હતો, પરંતુ તેણે બોલિંગમાં અચાનક કમાલ કરી 3 ઓવરમાં માત્ર 11 રન આપી 2 મહત્વપૂર્ણ વિકેટ ઝડપી હતી.
મેચ બાદ BCCI દ્વારા સોશિયલ મીડિયા પર શેર કરવામાં આવેલા એક ખાસ વીડિયોમાં વૈભવ સૂર્યવંશીએ પોતાની બોલિંગ અને કેપ્ટન ઈશાન કિશન સાથે થયેલી રસપ્રદ વાતચીત વિશે મોટો ખુલાસો કર્યો છે.
“ઈશાન ભાઈને લાગ્યું કે તેઓ જોખમ લઈ રહ્યા છે” વૈભવે રણનીતિ પરથી પડદો ઊંચક્યો
વૈભવ સૂર્યવંશીએ BCCI સાથે વાત કરતા બોલિંગ મળ્યા સમયના વાતાવરણ અને પોતાની માનસિકતા વિશે રસપ્રદ વાત કહી. તેણે જણાવ્યું કે, “જ્યારે બીજી ઈનિંગ્સમાં ઉત્તર પૂર્વ ઝોનના બેટ્સમેનો વિકેટ બચાવીને રમી રહ્યા હતા, ત્યારે કેપ્ટન ઈશાન ભૈયાએ મને પાર્ટ-ટાઈમ બોલિંગ આપવાનો નિર્ણય કર્યો. ઈશાન ભૈયાને લાગ્યું કે તેઓ મને બોલ સોંપીને એક નાનું જોખમ લઈ રહ્યા છે, પરંતુ તેઓ એ નહોતા જાણતા કે હું એક વિકેટ લેનાર બોલર છું!”
૧૫ વર્ષીય ડાબોડી સ્પિનરે આગળ ઉમેર્યું કે, “મારા મનમાં એ જ વિચાર ચાલી રહ્યો હતો કે ભલે મને 2 કે 3 ઓવર બોલિંગ મળે અથવા હું 5 વિકેટ લઈ લઉં, મારી પાસે ઓવરો મર્યાદિત જ રહેવાની છે. તેથી મારે તે જ ઓવરોમાં યોગ્ય લાઈન અને લેન્થ પર બોલિંગ કરવી પડશે. જ્યારે બેટ્સમેન તરીકે તમે રન ન બનાવી શકો અને પછી બોલિંગમાં વિકેટ લઈને ટીમની જીતમાં યોગદાન આપો, ત્યારે એક અનોખો આનંદ અને સંતોષ મળે છે.”
બેટિંગમાં નિષ્ફળતા બાદ બોલિંગમાં બતાવ્યો ચમકારો
દુલીપ ટ્રોફીના આ રેડ-બોલ ફોર્મેટની ડેબ્યૂ મેચમાં વૈભવ પાસે બેટથી મોટી ઈનિંગની અપેક્ષા હતી. જોકે, પૂર્વ ઝોનની પ્રથમ ઈનિંગ્સમાં તેણે સતત બે ચોગ્ગા ફટકાર્યા પછી તરત જ 8 રનના અંગત સ્કોર પર વિકેટ ગુમાવી દીધી હતી. પરંતુ મેચના ત્રીજા દિવસે તેણે પોતાની લેફ્ટ-આર્મ ઓર્થોડોક્સ સ્પિન બોલિંગથી ઉત્તર પૂર્વ ઝોનના કિશન લિંગડોહ અને ઇમ્લિવતી લેમટૂરને એક જ ઓવરમાં આઉટ કરીને મેચની કાયાપલટ કરી દીધી હતી.
વૈભવે હસતા હસતા કહ્યું કે, “જ્યારે પણ કોઈ બેટ્સમેન વિકેટ લે છે, ત્યારે તેને અદભુત આનંદ મળે છે. તમે કોઈપણ બેટ્સમેનને પૂછશો તો તેને બોલિંગ કરવાનો એટલો જ ઉત્સાહ હોય છે જેટલો કોઈ બોલરને બેટિંગ કરવાનો હોય છે.”
𝐁𝐨𝐰𝐥 𝐢𝐭 𝐥𝐢𝐤𝐞 𝐕𝐚𝐢𝐛𝐡𝐚𝐯 𝐒𝐨𝐨𝐫𝐲𝐚𝐯𝐚𝐧𝐬𝐡𝐢 🎯
Meet the secret wicket-taker who enjoys bowling and answered his captain’s ‘risky’ call 🤙 – By @jigsactin#DuleepTrophy pic.twitter.com/ZhZ0QkeyZm
— BCCI Domestic (@BCCIdomestic) August 29, 2026
૩૦ ઓગસ્ટથી રમાશે સેમિફાઇનલ, વૈભવ પર ફરી રહેશે સસપન્સ
દુલીપ ટ્રોફી 2026ની સેમિફાઇનલ મેચો 30 ઓગસ્ટથી બેંગલુરુના BCCI સેન્ટર ઓફ એક્સેલન્સ ખાતે શરૂ થઈ રહી છે. પ્રથમ સેમિફાઇનલમાં પૂર્વ ઝોનનો મુકાબલો સેન્ટ્રલ ઝોન (Central Zone) સામે થશે, જ્યારે બીજી સેમિફાઇનલમાં દક્ષિણ ઝોન (South Zone) અને ઉત્તર ઝોન (North Zone) સામસામે ટકરાશે.
