‘ક્રિકેટ છોડી દઈશ પણ ઈમ્પેક્ટ પ્લેયર નહીં બનું’: જ્યારે વિરાટ કોહલીને પોતાની જ જીદ સામે હારવું પડ્યું!
ક્રિકેટના મેદાનમાં રેકોર્ડ તોડવા અને જીત મેળવવી એ વિરાટ કોહલી માટે નવી વાત નથી, પરંતુ તાજેતરમાં એક એવી ઘટના બની જેણે ચાહકોને આશ્ચર્યમાં મૂકી દીધા છે. વિરાટ કોહલી, જે પોતાની ફિટનેસ અને આક્રમક રમત માટે જાણીતો છે, તેણે વર્ષો પહેલા જે નિયમનો સખત વિરોધ કર્યો હતો, આખરે સંજોગોવશાત તેણે એ જ નિયમનો સહારો લેવો પડ્યો. લખનૌ સુપર જાયન્ટ્સ (LSG) સામેની મેચમાં વિરાટ કોહલી ‘ઈમ્પેક્ટ પ્લેયર’ તરીકે મેદાનમાં ઉતર્યો અને પોતાની અડધી સદીની નજીકની ઇનિંગથી ટીમને જીત અપાવી.
શું હતો વિરાટનો એ જૂનો સંકલ્પ?
ભારતીય ક્રિકેટ કંટ્રોલ બોર્ડ (BCCI) દ્વારા વર્ષ 2023માં આઈપીએલમાં ‘ઈમ્પેક્ટ પ્લેયર’નો નવો નિયમ રજૂ કરવામાં આવ્યો હતો. આ નિયમ મુજબ, કોઈપણ ટીમ મેચ દરમિયાન પોતાના પ્લેઈંગ-11 માંથી એક ખેલાડીને બદલીને બીજા ખેલાડીને મેદાનમાં ઉતારી શકે છે. જ્યારે રોહિત શર્મા અને એમ.એસ. ધોની જેવા દિગ્ગજો આ નિયમ હેઠળ રમતા જોવા મળ્યા, ત્યારે વિરાટ કોહલીએ આ અંગે ખૂબ જ કડક વલણ અપનાવ્યું હતું.
કોહલીના ભૂતપૂર્વ સાથી ખેલાડી સ્વસ્તિક ચિકારાએ એક ખુલાસો કર્યો હતો કે કોહલી આ નિયમના સખત વિરુદ્ધમાં હતો. કોહલીએ ખાનગી વાતચીતમાં સ્પષ્ટપણે કહ્યું હતું કે, “જ્યાં સુધી હું ક્રિકેટ રમીશ, ત્યાં સુધી હું સંપૂર્ણ ફિટ રહીશ. હું ઈમ્પેક્ટ પ્લેયરની જેમ નહીં, પણ સિંહની જેમ રમીશ. હું પૂરી 20 ઓવર ફિલ્ડિંગ કરીશ અને પછી બેટિંગ પણ કરીશ. જે દિવસે મારે અડધી મેચ રમવા માટે ઈમ્પેક્ટ પ્લેયર બનવું પડશે, તે દિવસે હું ક્રિકેટને અલવિદા કહી દઈશ.”
ચિન્નાસ્વામી સ્ટેડિયમમાં બદલાયેલું દ્રશ્ય
બુધવારે બેંગલુરુના એમ. ચિન્નાસ્વામી સ્ટેડિયમમાં જ્યારે આરસીબી (RCB) અને લખનૌ (LSG) આમને-સામને હતા, ત્યારે કંઈક એવું બન્યું જેની કોઈએ કલ્પના કરી નહોતી. વિરાટ કોહલી પ્લેઈંગ-11 માં સામેલ નહોતો, પરંતુ બીજી ઇનિંગમાં તે ‘ઈમ્પેક્ટ પ્લેયર’ તરીકે બેટિંગ કરવા આવ્યો. પોતાની જૂની વાતથી વિપરીત જઈને કોહલીએ આ ભૂમિકા સ્વીકારી. આ પાછળનું મુખ્ય કારણ તેની ફિટનેસ અને ટીમની જરૂરિયાત હતી.
મેચની શરૂઆતમાં જ્યારે આરસીબીના કેપ્ટન રજત પાટીદારે ટોસ જીત્યો, ત્યારે તેમણે કોહલીના રમવા અંગે કોઈ સ્પષ્ટતા કરી નહોતી. જોકે, પ્રેક્ટિસ સેશન દરમિયાન કોહલીના ડાબા પગ પર ભારે પટ્ટી બાંધેલી જોવા મળી હતી, જેનાથી સ્પષ્ટ હતું કે તે સંપૂર્ણ રીતે સ્વસ્થ નથી. તેમ છતાં, ટીમ માટે મેચ જીતવી જરૂરી હતી, તેથી કોહલીએ ઈમ્પેક્ટ પ્લેયર તરીકે મેદાનમાં ઉતરીને જવાબદારી નિભાવી.
ઈજા છતાં વિસ્ફોટક બેટિંગ: સિંહ જેવી ગર્જના
ભલે કોહલી ફિટ નહોતો, પણ તેની બેટિંગમાં એ જ જૂની તાજગી જોવા મળી. તેણે ફિલ સોલ્ટ સાથે ઓપનિંગ કરી અને મેદાનની ચારે બાજુ ચોગ્ગાની રમઝટ બોલાવી દીધી. ખાસ કરીને મોહમ્મદ શમી અને પ્રિન્સ યાદવ જેવા બોલરો સામે તેણે આક્રમક અભિગમ અપનાવ્યો. કોહલીએ માત્ર 20 બોલમાં 40 રન ફટકારીને પાવરપ્લેમાં આરસીબીને મજબૂત સ્થિતિમાં લાવી દીધી હતી.
દુર્ભાગ્યવશ, તે પોતાની અડધી સદી પૂરી કરવામાં માત્ર એક રનથી ચૂકી ગયો અને આવેશ ખાનનો શિકાર બન્યો. તેણે 49 રનની શાનદાર ઈનિંગ રમી, જેણે આરસીબી માટે 147 રનનો ટાર્ગેટ આસાન બનાવી દીધો. આરસીબીએ આ મેચ 15.1 ઓવરમાં જ જીતી લીધી અને પોઈન્ટ ટેબલમાં ટોચનું સ્થાન પ્રાપ્ત કર્યું.
શા માટે લેવો પડ્યો આ નિર્ણય?
કોહલીના આ યુ-ટર્ન પાછળ તેની ઈજા જવાબદાર હતી. મુંબઈ ઇન્ડિયન્સ સામેની છેલ્લી મેચમાં ફિલ્ડિંગ દરમિયાન તેના ટખના (Ankle) માં ઈજા થઈ હતી. મેચ બાદ કોહલીએ પોતે સ્વીકાર્યું હતું કે, “હું હજી 100% ફિટ નથી. છેલ્લા કેટલાક દિવસોથી મારા ઘૂંટણમાં તકલીફ છે અને મને શારીરિક રીતે પણ અસ્વસ્થતા અનુભવાઈ રહી હતી. પરંતુ ટીમના હિતમાં મેદાનમાં ઉતરવું જરૂરી હતું.”
