કિયા સોરેન્ટો 4 સપ્ટેમ્બરે ભારતમાં થશે લોન્ચ: હાઇબ્રિડ અને ડીઝલ એન્જિન સાથે પ્રીમિયમ SUV માર્કેટમાં મચાવશે ધમાલ
દક્ષિણ કોરિયાની અગ્રણી વાહન ઉત્પાદક કંપની કિયા (Kia) ભારતીય ઓટોમોબાઇલ માર્કેટમાં પોતાની પકડ વધુ મજબૂત કરવા માટે એક નવો ધડાકો કરવા જઈ રહી છે. તાજેતરમાં લોન્ચ કરાયેલી કિયા સાયરોસ EV ની સફળતા બાદ, કંપની હવે ભારતીય ગ્રાહકો માટે પોતાની પ્રીમિયમ 7-સીટર SUV કિયા સોરેન્ટો (Kia Sorento) લાવવાની તૈયારી કરી ચૂકી છે. આ કાર આગામી 4 સપ્ટેમ્બર 2026 ના રોજ ભારતમાં સત્તાવાર રીતે લોન્ચ કરવામાં આવશે.
કિયા સોરેન્ટો ભારતમાં કંપનીના ફ્લેગશિપ પ્રીમિયમ SUV લાઇનઅપનો હિસ્સો બનશે. દેશભરની અધિકૃત ડીલરશિપ પર આ પ્રીમિયમ SUV માટેનું અનઓફિશિયલ બુકિંગ પણ શરૂ કરી દેવામાં આવ્યું છે. આ કાર પોતાના આક્રમક લુક, વૈભવી ઈન્ટિરિયર અને હાઇબ્રિડ પાવરટ્રેન ટેકનોલોજીના કારણે ભારતીય માર્કેટમાં પહેલેથી જ ચર્ચાનો વિષય બની ગઈ છે.
અંદાજિત કિંમત અને ભારતીય બજારમાં સ્પર્ધા
કિયાએ હજુ સુધી સોરેન્ટોની સત્તાવાર કિંમતનો ખુલાસો કર્યો નથી, પરંતુ ઓટો એક્સપર્ટ્સના મતે આ પ્રીમિયમ SUVની એક્સ-શોરૂમ કિંમત ₹35 લાખથી ₹40 લાખ ની વચ્ચે હોઈ શકે છે. આ પ્રાઇસ રેન્જમાં ભારતીય બજારમાં પહેલેથી જ વર્ચસ્વ ધરાવતી કેટલીક મોટી SUVs સાથે તેની સીધી સ્પર્ધા થશે.
કિયા સોરેન્ટોનો મુખ્ય મુકાબલો આ ક્ષેત્રની નિર્વિવાદ કિંગ ગણાતી ટોયોટા ફોર્ચ્યુનર (Toyota Fortuner), સ્કોડા કોડિયાક (Skoda Kodiaq), ફોક્સવેગન ટેરોન (Volkswagen Tayron), જીપ મેરિડિયન (Jeep Meridian) અને એમજી મેજેસ્ટોર (MG Majestor) જેવી પ્રીમિયમ 3-રો SUVs સાથે થશે. અત્યાર સુધી ફોર્ચ્યુનરનો દબદબો રહેલા આ સેગમેન્ટમાં સોરેન્ટોના હાઇબ્રિડ એન્જિન અને આધુનિક ફિચર્સ મોટો પડકાર ફેંકી શકે છે.
દમદાર હાઇબ્રિડ અને ડીઝલ પાવરટ્રેન વિકલ્પો
કિયા સોરેન્ટોને ભારતીય રસ્તાઓ અને ગ્રાહકોની જરૂરિયાતોને ધ્યાનમાં રાખીને દમદાર એન્જિન ઓપ્શન્સ સાથે રજૂ કરવામાં આવશે. ગ્લોબલ વર્ઝનની જેમ જ ભારતીય મોડલમાં પણ હાઇબ્રિડ અને ડીઝલ એમ બંને પાવરટ્રેન વિકલ્પો મળશે:
1.6-લિટર પેટ્રોલ હાઇબ્રિડ એન્જિન: આ ચાર-સિલિન્ડર પેટ્રોલ હાઇબ્રિડ એન્જિન 238 bhp નો મહત્તમ પાવર અને 380 Nm નો ટોર્ક જનરેટ કરવાની ક્ષમતા ધરાવે છે. આ હાઇબ્રિડ ટેકનોલોજી ઉત્તમ પર્ફોર્મન્સની સાથે સાથે શ્રેષ્ઠ ફ્યુઅલ એફિશિયન્સી (માઇલેજ) પણ આપશે.
2.2-લિટર ડીઝલ એન્જિન: ડીઝલ પ્રેમીઓ માટે કિયા 2.2-લિટરનું એન્જિન ઓફર કરશે, જે 202 hp નો પાવર અને 441 Nm નો તોતિંગ ટોર્ક જનરેટ કરશે. આ એન્જિન લાંબા પ્રવાસ અને ઓફ-રોડિંગ પ્રેમીઓ માટે શ્રેષ્ઠ સાબિત થશે.
આ SUV લાઇનઅપમાં મેન્યુઅલ અને ઓટોમેટિક ગિયરબોક્સના વિકલ્પો ઉપલબ્ધ હશે. જોકે, શરૂઆતી તબક્કે ભારતીય મોડલ માત્ર ફ્રન્ટ-વ્હીલ ડ્રાઇવ (FWD) સિસ્ટમ સાથે જ લોન્ચ થાય તેવી શક્યતા છે.
શાનદાર સીટિંગ લેઆઉટ અને વિશાળ સ્પેસ
પરિવાર અને લાંબા પ્રવાસને ધ્યાન સમાન રાખીને ડિઝાઇન કરાયેલી કિયા સોરેન્ટોની કુલ લંબાઈ 4,815 મિમી છે. તેનો આઉટર લુક અને ડાઇમેન્શન વૈશ્વિક માર્કેટમાં ઉપલબ્ધ મોડલ જેવા જ રાખવામાં આવ્યા છે. ભારતમા આ SUV 6-સીટર અને 7-સીટર એમ બંને લેઆઉટમાં ઉપલબ્ધ થશે:
7-સીટર વેરિઅન્ટ: આ મોડલમાં સેન્ટર રો (બીજી લાઇન)માં 60:40 રેશિયો વાળી 3-સીટર બેન્ચ સીટ આપવામાં આવી છે. જ્યારે ત્રીજી રો માં 50:50 રેશિયોમાં ડિવાઇડ થતી સીટો છે. ત્રીજી લાઇન સુધી પહોંચવા માટે કંપનીએ વન-ટચ સ્લાઇડ-એન્ડ-ફોલ્ડ સુવિધા આપી છે.
6-સીટર વેરિઅન્ટ: હાઇબ્રિડ અને ટોપ-એન્ડ વેરિઅન્ટ્સમાં 6-સીટર લેઆઉટ મળશે, જેમાં બીજી લાઇનમાં પ્રીમિયમ કેપ્ટન સીટ્સ (Captain Chairs) આપવામાં આવી છે, જે મુસાફરોને પ્લેન જેવો વૈભવી અનુભવ કરાવશે.
હાઇ-ટેક ફિચર્સ અને સેફ્ટીની ભરમાર
કિયા પોતાની કાર્સમાં લેટેસ્ટ ટેકનોલોજી આપવા માટે જાણીતી છે, અને સોરેન્ટો પણ તેમાં અપવાદ નથી. આ SUV ના કેબિનમાં પગ મૂકતા જ તમને એક ફ્યુચરિસ્ટિક અને લક્ઝુરિયસ વાતાવરણનો અનુભવ થાય છે. તેમાં મળતા મુખ્ય ફિચર્સ નીચે મુજબ છે:
ડ્યુઅલ 12.3-ઇંચ સ્ક્રીન સેટઅપ: ઇન્ફોટેનમેન્ટ અને ડિજિટલ ઇન્સ્ટ્રુમેન્ટ ક્લસ્ટર માટે ડ્યુઅલ ડિસ્પ્લે.
કનેક્ટિવિટી: વાયરલેસ એન્ડ્રોઇડ ઓટો (Android Auto) અને અલ્ટીમેટ એસપોર્ટ એપલ કારપ્લે (Apple CarPlay).
કમ્ફર્ટ એન્ડ કન્વિનિયન્સ: પૅનોરામિક સનરૂફ, ડ્યુઅલ-ઝોન ક્લાઇમેટ કન્ટ્રોલ, વાયરલેસ ચાર્જિંગ પેડ, પાવર ડ્રાઇવર સીટ અને હેડ-અપ ડિસ્પ્લે (HUD).
સેન્ટ્રલ કન્સોલ: ટચ-કેપેસિટીવ પેનલ સાથે ચાર-સ્પોક સ્ટીયરીંગ વ્હીલ અને ઇલેક્ટ્રોનિક પાર્કિંગ બ્રેક.
આ ઉપરાંત, સુરક્ષાના દૃષ્ટિકોણથી તેમાં 6 થી 8 એરબેગ્સ, ABS સાથે EBD, 360- ડિગ્રી કેમેરા અને સૌથી મહત્વનું લેવલ-2 ADAS (Advanced Driver Assistance Systems) જેવા અદ્યતન સેફ્ટી ફિચર્સ પણ આપવામાં આવશે.
ભારતીય માર્કેટ માટે કિયા સોરેન્ટોનું મહત્વ
ભારતમાં હાલના સમયે લક્ઝરી અને પ્રીમિયમ SUVs નો ક્રેઝ ઝડપથી વધી રહ્યો છે. ગ્રાહકો હવે માત્ર મોટી કાર નહીં પણ તેમાં ઉત્તમ માઇલેજ, પર્યાવરણને અનુકૂળ ટેકનોલોજી અને હાઇ-ટેક ફિચર્સની પણ અપેક્ષા રાખે છે. કિયા સોરેન્ટોનું હાઇબ્રિડ એન્જિન પેટ્રોલ અને ડીઝલના વધતા ભાવ વચ્ચે ગ્રાહકો માટે એક ઉત્તમ વિકલ્પ બની શકે છે.
4 સપ્ટેમ્બરના રોજ થનારા આ લોન્ચિંગ બાદ ભારતીય પ્રીમિયમ SUV સેગમેન્ટમાં મોટી હલચલ જોવા મળશે તે નક્કી છે. જો કિયા આ કારની કિંમત આક્રમક રાખવામાં સફળ રહે છે, તો ફોર્ચ્યુનર અને કોડિયાક જેવી પ્રસ્થાપિત કાર્સ માટે માર્કેટમાં ટકી રહેવું મુશ્કેલ બની જશે.
